Search form

Matalikilo 47

Jakobo mbwaakabonesegwa kuli-Farao

1-Elyo Josefa wakasika kuli-Farao, wamwaambila kuti, Taata abakulana bangu ambelele zyabo aŋombe zyabo ambono zyabo zyoonse basika kuzwa kunyika ya-Kanana. Nkobali kunyika ya-Goseni. 2-Nkabela wakasala bantu hosanwe akati kabakulana bakwe, wabaimikizya kubusyu bwa-Farao. 3-Lino Farao wakabuzya bakulana bakwe kuti, Muli basimilimonzi? Bakavwiila Farao kuti, Swebo tobalanda bako tuli basikweembela imbelele, swebo abamatateesu boonse. 4-Alimwi bakaambila Farao kuti, Tweza kuzookala-kala munyika, nkaambo tacikwe mani aakucezya matanga esu, nkaambo ipamba lyalema mucisi ca-Kanana. Twakumbila tobalanda bako kuti tukale munyika ya-Goseni. 5Alimwi Farao wakaambila Josefa kuti, Uso abakulana bako basika kulinduwe. 6Nyika yoonse ya-Egepita ili kunembo lyako. Kazika uso abakulana bako mububotu bwanyika. Bakale munyika ya-Goseni. Alimwi na ulizi bantu bacenjede akati kabo, kobabika kuti babambe matanga aangu.

7-Lino Josefa wakanjizya Jakobo wisi, wamwiimikizya kubusyu bwaFarao, nkabela Jakobo wakalongezya Farao. 8Elyo Farao wakabuzya Jakobo kuti, Mazuba aamyaka yabuumi bwako ali buti? 9-Jakobo wakavwiila Farao kuti, Myaka yakweendeenda kwangu ili mwanda amakumi otatwe. Mazuba aamyaka yabuumi bwangu mace buyo, alimwi mabi, taana kweelana amazuba aamyaka yabuumi bwabamataata kuciindi cakweendeenda kwabo. 10-Mpawo Jakobo wakalongezya Farao, wazwa omo Farao mwaakabede, 11-Nkabela Josefa wakakazika wisi abakulana bakwe, wabapa civubilo munyika ya-Egepita, munyika imbotu, munyika ya-Ramese, mbubonya mbwaakalailila Farao. 12-Alimwi Josefa wakasanizya wisi abakulana bakwe aluzubo lwawisi zilyo mbubonya mbuli mweelwe wabasiŋanda babo,

Amwi makani aapamba lyaku-Egepita

13-Lino kwakabulika zilyo munyika yoonse, nkaambo ipamba lyakakomena loko, Nyika ya-Egepita anyika ya-Kanana yoonse zyakawizuka nkaambo kapamba. 14-Nkabela Josefa wakabungika mali oonse aakajanwa munyika ya-Egepita amunyika ya-Kanana nkaambo kazilyo nzibakali kuula; mali ayo Josefa wakaaleta muŋanda ya-Farao, 15-Lino mali oonse naakamaninina munyika ya-Egepita amunyika ya-Kanana, ba-Egepita boonse bakeza kuliJosefa, bati, Utwaabile zilyo. Sa ncibotu kuti tufwe mumeso aako? Nkaambo tacikwe mali. 16Elyo Josefa wakabaambila kuti, Amundipe iŋombe zyanu. Ndamuuzizya zilyo aŋombe zyanu na tacikwe mali. 17Mpawo bakaletela Josefa matanga aabo, nkabela Josefa wakabapa zilyo cakuulana ambizi amatanga aambelele aŋombe ambongolo. Wakabauzizya zilyo aŋombe zyabo zyoonse. 18Mwaka oyo umane, bakasika kulinguwe mumwaka wabili, bati, Tatukonzyi kusisa makani kumwami wesu, Mali amaninina, aalo matanga aŋombe aba aamwami wesu. Taakwe cintu cicisyeede kumeso aako O mwami wesu cita mibili yesu amyuunda yesu. 19Sa ncibotu kuti tufwe kumeso aako, swebo amyuunda yesu? Kotuula swebo amyuunda yesu, utupe zilyo. Tulaba bazike ba-Farao, swebo amyuunda yesu. Utupe imbuto, kuti tupone, tutafwi, ayalo nyika itanyonyooki.

20Aboobo Josefa wakaulila Farao nyika yoonse ya-Egepita, nkaambo baEgepita bakaulisya umwi aumwi muunda wakwe, nkaambo ipamba lyakabakataazya loko, Nyika yakaba ya-Farao, 21abalo bantu wakabanjizya mubuzike kuzwa kumagolelo amwi aa-Egepita kusikila kumagolelo amwi. 22-Nyika yabapaizi luzutu taakwe naakaiula, nkaambo bapaizi bakalipedwe caabilo kuzwa kuli-Farao, nkabela bakali kulya caabilo cabo Farao ncaakabapa, aboobo teebakauzya nyika yabo. 23Lino Josefa wakaambila bantu kuti, Amubone! Sunu ndamuula, nywebo anyika zyanu, mube ba-Farao. Nzeezi imbuto, Amubyale myuunda. 24Lino casika ciindi cakutebula, muleelede kupa Farao cipanzi casanu, azipanzi zyone ziyooba zyanu, zibe zyakubyazya azilyo zyakusanizya basiŋanda banu atwana twanu. 25-Bakati, Watuponya. Atujane buuya mumeso aamwami wesu, lino tuyooba bazike ba-Farao. 26-Mbuboobo Josefa mbwaakacita mulao munyika ya-Egepita, mbuucibede asunu, wakuti Farao apegwe cipanzi casanu. Nyika yabapaizi luzutu njiitali ya-Farao.

Bucembele bwa-Jakobo

27-Aboobo Israyeli wakalikede munyika ya-Egepita, mucisi ca-Goseni. Nkabela bakajana imbono mulinjiyo, alimwi bakazyalisya mane bavula loko. 28Lino Jakobo wakakala munyika ya-Egepita myaka iili ikumi amusanu aibili. Mazuba oonse aa-Jakobo, nkokuti myaka yoonse yabuumi bwakwe, akasika kumyaka iili mwanda amakumi one amusanu aibili. 29-Elyo ciindi cakufwa kwa-Israyeli nicakasika kufwaafwi, wakaita mwanaakwe Josefa, wamwaambila kuti, Na ncobeni ndijene luzyalo mumeso aako, bika ijanza lyako kunsi lyacibelo cangu, undicitile caluzyalo acakusyomeka, Utandizikili mucisi ca-Egepita pe. 30-Njanda koona mucooneno cabamatata. Uleelede kunditola kuzwa ku-Egepita, ukandivwike mumavwikilo aabo. Wakati, Njoocita mbubonya mboamba. 31-Wakati, Ndikonka. Mpawo wakamukonka. Elyo Israyeli wakalikotamika amusego wabulo bwakwe.