Search form

Matalikilo 48

Jakobo mbwaakalongezya bana ba-Josefa

1Lino kusule lyayaaya Josefa wakaambilwa kuti, Sa tobwene kuti uso waciswa? Mpawo wakatolelela bana bakwe bobile Manase a-Efrai­ mu. 2Elyo Jakobo wakalwiidwa kuti, Langa! Mwanaako Josefa wasika kuzookubona. Amvwe obo, Israyeli wakaliyumya-yumya, wanongomana abule. 3-Nkabela Jakobo wakaambila Josefa kuti, Leza Singuzuzyoonse wakalibonya kulindime ku-Luzi munyika ya-Kanana, wandilongezya, 4-wandaambila kuti, Ncobeni njookuzyazya loko, ube banji; njoocita kuti ube misyobo misyobo yabantu, alimwi nyika eyi njooipa lunyungu lwako, kuti lwiivube lyoonse alyoonse. 5-Lino aba bana bako bobile mbowakazyala munyika ya-Egepita, nkentanasika kulinduwe okuno ku-Egepita, mbibangu, Efraimu a-Manase mbibangu mbubonya mbuli Rubeni aSimeoni. 6Alunyungu lwako ndoyoozyala musule lyabo ndolwako. Bayooulikwa mbuli mazina aabakulana babo. 7-Nkaambo ciindi eco nindakazwa ku-Padani, ndakafwidwa Rakele munyika ya-Kanana, nitwakacili munzila, nikwakacisyeede kasinzo kusika ku-Efrata, nkabela ndakamuzika nkukonya oko munzila yakuya ku-Efrata (ngonguwo Betelehemu).

8Elyo Israyeli naakabona bana ba-Josefa, wakabuzya kuti, Ino mbani aba? 9-Nkabela Josefa wakavwiila wisi kuti, Mbombabo bana bangu Leza mbaakandipa okuno. Wakati, Wence balete kulindime, mbalongezye. 10-Nkabela meso aa-Israyeli akali agubi nkaambo kakucembaala, katakonzya kubona. Elyo Josefa wakabaswenya afwiifwi, nkabela wakabamyonta, wabakumbata. 11-Mpawo Israyeli wakaambila Josefa kuti, Teendakali kuyeeya kubona busyu bwako, pele Leza wandibonya alunyungu lwako. 12Lino Josefa wakabagwisya kumazwi aakwe, walikotamika ansi cakuvundama. 13Nkabela Josefa wakabeenzya boonse bobile, Efraimu mujanza lyakwe lyalulyo kuya kucimwensi cakwe ca-Israyeli, a-Manase mujanza lyakwe lyacimwensi kuya kululyo lwa-Israyeli, wabaswenya afwiifwi kulinguwe. 14Mpawo Israyeli wakatandabika ijanza lyakwe lyalulyo, wajata amutwe wa-Efraimu, ngonguwe mwanike, alyalo ijanza lyakwe lyacimwensi wakalijatya amutwe wa-Manase, aboobo wakapinganya maanza aakwe, nkaambo Manase kali mutaanzi, 15-Lino wakalongezya Josefa, wati,

Leza ngubakabelekela bamataata Abrahamu a-Izaka,

Leza iwakandeembela kuzwa kubwanike bwangu akusikila sunu,

16-Angelo iwakandivuna kububi boonse, alongezye balombe,

Kuti izina lyangu azina lyamatata Abrahamu a-Izaka likalilile mulimbabo,

Bavulisye mukati kanyika.

17-Lino Josefa naakabona kuti wisi wabika ijanza lyakwe lyalulyo amutwe wa-Efraimu, wakabijilwa, nkabela wakajata ijanza lyawisi kuti aligwisye amutwe wa-Efraimu akulitola amutwe wa-Manase, 18Josefa wakaambila wisi kuti, Takuli boobo, taata, Oyu ngumupati; bika ijanza lyako lyalulyo amutwe wakwe. 19-Pele wisi wakakaka, wati, Ndizi, mwanaangu. Ndizi. Alakwe uyooba musyobo, alakwe uyooba mupati, nekubaboobo mwanike wakwe uyooba mupati kwiinda nguwe, abazukulu bakwe bayooba misyobo minji. 20-Lino wakabalongezya buzuba obo mbubonya, wati, Ba-Israyeli bayoolongezya muzina lyako. Bayooamba kuti, Leza akucite kuti ube mbubonya mbuli Efraimu ambuli Manase. Nkabela wakabika Efraimu kunembo lya-Manase. 21-Lino Israyeli wakaambila Josefa kuti, Bona! Mebo ndaamba kufwa. Pele Leza uyooba anywebo, uyoomupilusya kunyika yabamausowanu. 22-Alimwi ndapa nduwe caabilo ncimwi kwiinda bananyokwe; ncencico ncindakanyanzya ba-Amori apanga lyangu abuta bwangu.