Search form

Matalikilo 50

Kufwa kwa-Jakobo

1-Mpawo Josefa wakawida abusyu bwawisi, walila alinguwe wamumyonta, 2-Lino Josefa wakalailila balanda bakwe basilisi kuti bayanike mutunta wawisi, aboobo basilisi bakayanika mutunta wa-Israyeli. 3-Kwakamana mazuba aali makumi one, nkaambo ngomweelwe wamazuba aakuyanika mutunta. Nkabela ba-Egepita bakamulila mazuba aali makumi aali musanu aabili.

4-Lino mazuba aakulilwa kwakwe naakamana, Josefa wakaambila basiŋanda ba-Farao kuti, Na ndijene buuya mumeso aanu, amwaambile Farao kuti, 5-Taata wakandikonkezya, wati, Ndaamba kufwa; kukabanda kangu nkendakalisida munyika ya-Kanana nkooko nkumweelede kundivwikila, Lino njiinke, nkazike taata. Njooboola. 6Nkabela Farao wakati, Mbubo, inka, ukavwike uso, mbubonya mbwaakakukonkezya. 7Elyo Josefa wakainka kuyoovwika wisi. Abalo balanda boonse ba-Farao bakainka awe, bapati baŋanda yakwe, abapati boonse banyika ya-Egepita, 8aluzubo loonse lwa-Josefa, ababunyina, aluzubo lwawisi. Bacece babo luzutu, ambelele zyabo aŋombe zyabo, nzebakasia munyika ya-Goseni. 9Wakaya ankalaki abasimbizi, inkamu impati loko. 10-Basike kubbuwa lyacipolelo lya-Atadi, kutala lya-Jordano, bakalila nkukonya oko akulila kupati kuyoosya loko, 11Nkabela bantu banyika ya-Kanana, nibakabona kulila oko kwakucipolelo ca-Atadi, bakati, Oku kulila kwaba-Egepita kulayoosya loko. Nciceeco kuntu oko ncikwakapedwa izina lya-Abeli-mizraimu. Kuli mutala lya-Jordano, 12Aboobo bana bakwe bakamucitila mbubonya mbwaakabalailila. 13-Bana bakwe bakamutola kunyika ya-Kanana, bamuvwika musempo lyamumuunda wa-Makipela, kunembo lya-Mamre, muunda Abrahamu ngwaakaula kuli-Efroni mu-Hi ti, kuti auvube, ube mavwikilo. 14Amane kuzika wisi, Josefa wakapiluka ku-Egepita ababunyina aboonse mbaakainkide abo kuyoovwika wisi.

Mamanino aabuumi bwa-Josefa

15-Lino babunyina Josefa, nibakabona kuti wisaabo wafwa, bakati, Ambweni Josefa ulatusula akutuboozezya bubi boonse mbutwakamucitila. 16Elyo bakatumina Josefa mulazyo wakuti, Uso naatakalina kufwa wakalailila kuti, 17-Mbuboobu mbumweelede kwaambila Josefa. Wence ulekelele bakulana bako milandu yabo azibi zyabo, nkaambo bakakucitila bubi. Lino twakumbila kuti utulekelele milandu yesu tobalanda ba-Leza wauso. Mpawo Josefa wakalila naakamvwa majwi aabo. 18-Nkabela bakulana bakwe bakasika kuzoovundama kubusyu bwakwe, bati, Bona! Tuli balanda bako. 19-Lino Josefa wakabaambila kuti, Mutayoowi. Sa mebo ndi mucibaka caLeza? 20-Inywe mwakayeeya kundicitila bubi, pele Leza wakabusandula kuba bubotu, kuti acite makani ngemubwene sunu, kukuponya bantu banji. 21-Lino mutayoowi pe, Njoomulela, nywebo abacece banu. Mbuboobo mbwaakabaumbulizya akutontozya myoyo yabo.

22Lino Josefa kakede mu-Egepita, walo aluzubo lwawisi. Nkabela Josefa wakapona myaka iili mwa nda akumi, 23-Nkabela Josefa wakabona bana ba-Efraimu bamuzukulu watatu; abalo bana ba-Makiri mwana waManase bakazyalwa amazwi aa-Josefa. 24-Lino Josefa wakaambila baku la na bakwe kuti, Mebo ndaamba kufwa, pele Leza ncobeni unoomuswaya akumupozya munyika ino kuti muye kunyika eyo njaakakonkezya kuli-Abrahamu­ akuli-Izaka akuli-Jakobo. 25-Lino Josefa wakakonkya bana baIsrayeli kuti, Ncobeni Leza unooyoomuswaya, lino zifuwa zyangu muleelede kuzitola kuzwa okuno, 26Elyo Josefa wakafwa, Kali amyaka iili mwanda akumi lyomwe, Nkabela bakayanika mutunta wakwe akumubika mucilondwedo mu-Egepita.