Search form

Matalikilo 6

Nowa mbwaakali mululami akati kabantu basizibi

1-Lino bantu nibakatalika kuvula ansi, alimwi nibakali kuzyala bana basimbi, 2-bana ba-Leza bakabona bana basimbi babantu kuti mbabotu, nkabela bakakwata kufumbwa mbobakali kuyanda akati kabo. 3-Mpawo Jehova wakaamba kuti, Muuya wangu tuukooyookazyanya lyoonse amuntu pe, nkaambo ninyama buyo. Mazuba aakwe ayooba myaka iili mwaanda amakumi obile. 4-Mumazuba alya kakuli babbabbani ansi. Nkabela kusule lyayaaya, bana ba-Leza nibakaswanana abana basimbi babantu, bakabazyalila bana, mbombabo bakaba basinguzu baciindi, bantu basimpuwo.

5-Lino Jehova wakabona kuti bubi bwabantu baansi bulayoosya, amiyeeyo yoonse bantu njibayeeya mumyoyo yabo mibi luzutu mazuba oonse, 6-aboobo­ Jehova wakausa nkaambo kakulenga muntu, wakapenga mumoyo wakwe. 7Nkabela Jehova wakaamba kuti, Bantu mbondakalenga, nzoobaziminganya ansi. Nzooziminganya bantu abanyama, bauka abayuni bakujulu boonse, nkaambo nda usa kuti ndakabalenga. 8-Pele Nowa wakafwidwa luzyalo mumeso aa-Jehova.

9-Njeeyi mizukulu ya-Nowa. Nowa kali muntu uululeme, katajisi kampenda, akati kabasaanyina. Nowa wakali kweenda a-Leza. 10Nkabela Nowa wakazyala bana botatwe, Semu, Hamu a-Jafeti.

11Lino nyika yakabija kumeso aa-Leza, alimwi nyika yakazula luuni. 12-Lino Leza wakabona kuti nyika yabija, nkaambo bantu boonse bakalibisizye inzila zyabo ansi, 13-nkabela Leza wakaambila Nowa kuti, Ndakanza kumanisya bantu boonse, nkaambo nyika ilizwide luuni nkaambo kabo. Ncobeni njoobanyonyoona anyika yoonse. 14Kolipangila bwaato bwazisamu zyagofa. Obu bwaato ubucite azimpetu, alimwi uleelede kubuziluluzya mukati aanze insakizi. 15Mbuboobu mboelede kubucita. Bulamfu bwabwaato buleelede kuba tukokola tuli myanda yotatwe, bwaamba bwabo bube tukokola tuli makumi osanwe, abwiime bwabo bube tukokola tuli makumi otatwe. 16Ucite impulunguzyo mubwaato, zibe kakokola komwe kuzwa kulululi, Awalo mulyango wabwaato uubike mulubazu lwabo. Alimwi yaka zimpetu zyaansi, azimwi zyabili zyakujulu, azimwi zyatatu kujulu lyazeezyo. 17-Lino mebo ndaleta izambangulwe lyamaanzi ansi lyakunyonyoozya nyama yoonse yabaumi baputa ansi, Boonse buyo bali munyika bayoozanga. 18Pele webo tuyootangana cizuminano ayebo, aboobo uyoonjila mubwaato, webo abana bako amukaako abamukabana bako. 19Alimwi akati kabanyama bamisyobo yoonse, uyoonjizya bobile bobile mubwaato kuti baponesegwe anduwe, Bayooba mweenze amuzyazi. 20Abalo bayuni bamisyobo misyobo, abanyama bamisyobo misyobo, abauka bamisyobo misyobo bayavula ansi bobile bobile baleelede kuba ayebo kuti baponesegwe. 21-Alimwi bweza zilyo zyamisyobo yoonse, kufumbwa ziligwa, ukazilondole, kuti zibe bulilu bwako abulilu bwabo. 22-Lino Nowa wakacita obo. Wakacita mbubonya mbuli Leza mbwakamulailila.