Search form

Matalikilo 8

Izambangulwe mbulyakayuminina

1-Lino Leza wakaibaluka Nowa abaumi boonse abanyama mbaakali abo mubwaato. Mpawo Leza wakaungya muuwo anyika, nkabela maanzi akatalika kuyosa. 2-Tusensa toonse twamatoolo azipulo zyakujulu zyoonse zyakasinkwa, awalo mucobocobo wakalesegwa. 3-Maanzi akali kuya buunguluka ansi, mane lumwi kumamanino aamazuba aali mwanda amakumi osanwe maanzi akaceya. 4Lino mumwezi wamusanu aibili, mubuzuba bwakumi amusanu aabili bwamumwezi, bwaato bwakacuta azilundu zyaArarati. 5Nkabela maanzi akacili kuya buceya mane kusikila kumwezi wakumi, lino mumwezi wakumi, mubuzuba butaanzi bwamumwezi, mitwe yazilundu yakaboneka.

6-Amane buyo mazuba aali makumi one, Nowa wakajalula cipulo ncakacitide mubwaato, 7-watuma cikwangala. Nkabela wakauluka-uluka koonse koonse mane maanzi akayuminina ansi. 8Alimwi wakatuma inziba, kuti abone na maanzi atalika kuceya ansi. 9-Pele inziba teeyakajana mpiikonzya kukalila amyeendo yayo, aboobo yakapiluka kulinguwe mubwaato, nkaambo maanzi akacili manji atala anyika. Mpawo wakatandabika ijanza lyakwe, waijata, waiboozya mubwaato mwaakabede. 10Lino wakalindila alimwi mazuba aali musanu aabili, watuma inziba lwabili kuzwa mubwaato. 11-Elyo kuciindi cakumazuba inziba yakaboola kulinguwe, amumulomo wayo kiijisi itu lyaolifa ndeyakaakucela. Mpawo Nowa wakaziba kuti maanzi atalika kuceya ansi. 12Lino wakalindila alimwi mazuba aali musanu aabili, watuma inziba, pele tiikwe neyakaboola limbi pe.

13Lino mumwaka wamyanda iili musanu aumwi amwaka omwe, mumwezi mutaanzi, mubuzuba butaanzi bwamumwezi, maanzi akayuminina ansi. Mpawo Nowa wakavumbula lululi lwabwaato, wasondela, wabona kuti nyika yayuma. 14Nkabela mumwezi wabili, mubuzuba bwakumi amusanu aibili bwamumwezi, nyika yakayuma ntantalu. 15Lino Leza wakaambila Nowa kuti, 16-Kamuzwa mubwaato, yebo abanako, abana bako abamukabana bako boonse. 17-Banyama boonse mboli abo bamisyobo misyobo, bayuni aŋombe abauka boonse bayavula ansi, uzwe abo, kuti babe isaula ansi, bazyalisye akuvula ansi. 18Mpawo Nowa wakazwa abana bakwe abanakwe abamukabana bakwe boonse. 19Banyama boonse, abauka boonse abayuni boonse, boonse baumi bamisyobo misyobo bayavula ansi, boonse biyo bakazwa mubwaato.

20-Lino Nowa wakayakila Jehova cipaililo, nkabela wakabweza bamwi banyama basalala bamisyobo yoonse abayuni basalala bamisyobo yoonse, watuulila zituuzyo mpoonya awo acipaililo. 21-Mpawo Jehova naakamvwa bweema bubotu, Jehova wakaamba mumoyo wakwe kuti, Nsikooyootuka limbi nyika nkaambo kabantu pe, nkaambo miyeeyo yamoyo wamuntu mibi lyoonse kuzwa kubwanike bwakwe, alimwi nsikooyoouma limbi baumi boonse mbuli mbondakacita. 22-Nyika niiciliwo, ciindi cakubyala aciindi cakutebula, impeyo ankasaalo, cilimo amainza, isikati amasiku, zyoonse tazikooyooleka.