Search form

Matalikilo 9

Cizuminano Leza ncaakatangana anyika

1-Lino Leza wakalongezya Nowa abana bakwe, wabaambila kuti, Amuzyalisye, muvule, muzuzye nyika. 2-Banyama boonse baansi abayuni boonse bakujulu bamuyoowe akukankama kubusyu bwanu. Boonse biyo, abauka bayavula ansi answi zyamulwizi, baabwa mumaanza aanu. 3-Baumi boonse bayavula ansi bayoomubeda zilyo, mbubonya mbuli zisyu zisia-sia. Zyoonse biyo ndamupa nzizyo. 4-Pele tamweelede kulya nyama antoomwe abuumi bwayo, nkokuti bulowa bwayo. 5-Ncobeni bulowa bwanu, bulowa bwabuumi bwanu, njoobuyandaula. Kumaanza aabanyama boonse njoobuyandaula, akumaanza aamuntu njoobuyandaula. Muntu umwi aumwi, kumaanza aamweenzinyina njooyandaula buumi bwakwe. 6-Kufumbwa muntu uutila bulowa bwamuntunyina, bulowa bwakwe alakwe buyootilwa kumaanza aamuntu, nkaambo muntu wakalengwa mucinkozya ca-Leza.

7-Lino nywebo amuzyalisye akuvula, mube banji munyika akuvula mulinjiyo.

8Elyo Leza wakaambila Nowa abana bakwe mbaakali abo kuti, 9Amubone! Mebo ndatangana anywe cizuminano cangu, nywebo alunyungu lwanu luciza, 10-abanyama boonse mbomuli abo, bayuni bakujulu abanyama baansi aboonse mbomuli abo mubwaato, banyama boonse biyo baansi. 11-Njootangana anywe cizuminano, nkabela bantu boonse tabakooyoonyonyoonwa limbi mumaanzi aazambangulwe. Takukooyooba limbi izambangulwe lyakuvwinyauna nyika. 12-Alimwi Leza wakaamba kuti, Nceeci citondezyo cacizuminano cangu ncitutangene anywe, inywe abaumi boonse mbomuli abo mumazyalani oonse. 13Ndabika fulicoongo wangu mujoba, abe citondezyo cacizuminano cangu ncitutangene anyika. 14Kuyooba kuti, na ndabusya ijoba ajulu lyanyika, fulicoongo wangu uyooboneka mujoba, 15-elyo njooyeeya cizuminano ncitutangene anywe, inywe abaumi boonse bamisyobo yoonse, Takukooyoosika limbi maanzi aazambangulwe kuzoovwinyauna bantu boonse. 16-Fulicoongo uyooba mukati kajoba, lino njoomulanga akuyeeya cizuminano citeeli ca-Leza ncatangene abaumi boonse bamisyobo yoonse yaansi. 17Leza wakaambila Nowa kuti, Nceeci citondezyo cacizuminano cangu ncintangene abaumi boonse baansi.

Hamu mbwaakasampaula wisi

18-Lino bana ba-Nowa ibakazwa mubwaato mbaaba: Semu a-Hamu a-Jafeti. Hamu nguwakazyala Kanana. 19-Aba botatwe bakali bana baNowa, nkabela mbembabo ibakazuzya nyika yoonse.

20-Lino Nowa wakatalika kulima nyika. Wakalima muunda wamasaansa 21-Lino naakanywa waini, wakakolwa, walivumbulula mucilao cakwe. 22Nkabela Hamu wisi Kanana wakabona cinswe cawisi, walwiida babunyina bakwe bobile ibakali anze. 23-Lino Semu a-Jafeti bakabweza cikobela, bacibika amakuko aabo bobile, beenda cibundasule, bavumba cinswe cawisaabo. Masyu aabo akali futete, aboobo teebakabona cinswe cawisaabo. 24Elyo Nowa naakasinsimuka kuzwa kukukolwa kwakwe, wakaziba mwanaakwe muniini ncaakamucitila, 25-nkabela wakati,

Aombolozekwe Kanana!

Uzooba muzike wabazike akati kabanyina!

26-Alimwi wakati,

Alumbwe Jehova Leza wa-Semu,

Kanana abe muzike wakwe.

27-Leza akomezye lunyungu lwa-Jafeti,

Akale muzilao zya-Semu.

Alakwe Kanana abe muzike wakwe.

28Nkabela izambangulwe nilyakamana, Nowa wakacili kupona myaka iili myanda yotatwe amakumi osanwe. 29-Aboobo mazuba oonse aa-Nowa akasika kumyaka iili myanda iili musanu aine amakumi osanwe, elyo wakafwa.