Search form

Levitiko 13

Milao yabulwazi bwacinsenda

1Lino Jehova wakaambila Musa a-Aroni kuti, 2-Na muntu wazimba kulukanda lwamubili wakwe, nanka kuba atukoto tukoto, nanka tubata, elyo kwabuka bulwazi bwacipele mulukanda lwamubili wakwe, aletwe kuli-Aroni mupaizi na kuluumwi wabana bakwe. 3Lino mupaizi abone bulwazi bwamulukanda lwamubili wakwe, nkabela na boya bwamubulwazi bwatuba, alimwi bulwazi bulaboneka kuti bulibbookede kwiinda lukanda lumwi lwamubili, nkokuti mbobulwazi bwacinsenda. Mupaizi abubona, aambe kuti ulisofweede. 4Pele na tubata twalukanda lwamubili wakwe twatuba nekubaboobo tatuboneki kuti tulibbookede kwiinda lukanda lumwi, aboya tabutubi, mupaizi uleelede kumujalila mazuba aali musanu aabili. 5Bwaca buzuba bwamusanu aabili, mupaizi amubone alimwi, nkabela na wabona kuti bulwazi bwaleka, tabuyandilide mulukanda lwakwe, mupaizi amujalile mazuba aamwi aali musanu aabili. 6-Bwaca buzuba bwamusanu aabili, mupaizi amubone alimwi; na wabona kuti bulwazi tabucibonekesyi, tabuciyandilide mulukanda lwakwe, mupaizi aambe kuti ulasalala. Ntukoto-tukoto buyo. Asanzye zyakusama zyakwe, elyo ulasalala. 7Pele na tukoto-tukoto twayandilila mulukanda lwakwe, naamana kubonwa kumupaizi kukusalazigwa, uleelede kubonwa alimwi kumupaizi. 8-Elyo mupaizi, na wabona kuti tukoto-tukoto twayandilila mulukanda lwakwe, mupaizi aambe kuti ulisofweede, mbobulwazi bwacinsenda.

9-Muntu uuciswa bulwazi bwacinsenda aletwe kumupaizi. 10-Lino mupaizi, na wabona kuti kuli buzimbe butuba mulukanda, aboobo buzimbe bwatubya boya, alimwi mulimbubo muli nyama iisinkaukide, 11mbobulwazi bwacinsenda citamani mulukanda lwamubili wakwe, aboobo mupaizi uleelede kwaamba kuti ulisofweede. Atajalilwi pe, nkaambo ulisofweede. 12Pele na cinsenda cayandilila mulukanda mane cazulizya lukanda loonse lwamulwazi kuzwa kumutwe akusikila kuzituta, koonse koonse meso aamupaizi nkwaabona, 13mupaizi na abona kuti bulwazi bwazulizya mubili wakwe woonse, aambe kuti oyo muntu wasalala. Mubili woonse watuba, aboobo ulasalala. 14Pele buzuba bumwi, na kwaboneka nyama iisinkaukide, ulasofwaala. 15-Mupaizi abona nyama iisinkaukide, aambe kuti ulisofweede, Nyama iisinkaukide ilisofweede, mbobulwazi bwacinsenda. 16-Pele eyo nyama iisinkaukide, na yasanduka alimwi kutuba, aboole kumupaizi, 17-elyo mupaizi abona kuti bulwazi bwasanduka kutuba, mupaizi aambe kuti oyo muntu ulasalala. Ulasalala.

18-Na mulukanda lwamubili mwaboneka cilonda, alimwi capona, 19elyo mucibaka cacilonda mwaboneka buzimbe butuba nanka tubata tutuba akusalala, cibonwe kumupaizi. 20Lino mupaizi abona, na kwaboneka kuti bulibbookede kwiinda lukanda lumwi, abwalo boya bwasanduka kutuba, mupaizi aambe kuti ulisofweede. Mbobulwazi bwacinsenda, bwabuka mucilonda. 21Pele na mupaizi wabona kuti taakwe boya butuba, alimwi tabubbokede kwiinda lukanda lumwi, tabucibonekesyi, mupaizi amujalile mazuba aali musanu aabili. 22Lino na buciya buyandilila mulukanda lwakwe, mupaizi aambe kuti ulisofweede, mbobulwazi. 23-Pele na tubata tuliimvwi mpotubede akutayandilila, nkokuti mubata wacilonda buyo; elyo mupaizi aambe kuti ulasalala.

24Na mulukanda lwamubili mwaboneka kutumpa mbuli mulilo, elyo oko kutumpa kwasinkauka, kwaba ibbika lisalala-salala kutuba na lituba, 25-mupaizi amubone, lino na wabona kuti boya bwamubbika bwasanduka, bwatuba, alimwi lilibbookede kwiinda lukanda lumwi, ncecinsenda cabuka mubbika. Mupaizi aambe kuti ulisofweede. Mbobulwazi bwacinsenda. 26Pele na mupaizi wabona kuti mubbika tamukwe boya butuba, alimwi talibbookede kwiinda lukanda, alimwi talibonekesyi, mupaizi amujalile mazuba aali musanu aabili. 27-Lino mubuzuba bwamusanu aabili mupaizi amulange. Na wabona kuti bulwazi buciya buyandilila mulukanda, mupaizi aambe kuti ulisofweede. Mbobulwazi bwacinsenda. 28Pele na ibbika liliimvwi buyo, taliyandilili mulukanda, alimwi talicibonekesyi, nkokuzimba kwakutumpa. Mupaizi aambe kuti ulasalala, nkaambo ndubata lwakutumpa buyo.

29Alimwi mwaalumi na mwanakazi na ulijisi bulwazi kumutwe nanka kucilezu, 30-mupaizi abone bulwazi. Na wabona kuti bulibbookede kwiinda lukanda lumwi, alimwi boya bwabo bwabalangala, bwaubauba, mupaizi aambe kuti ulisofweede, Ncecipele, Ncecinsenda cakumutwe na cakucilezu. 31Pele mupaizi naabona obo bulwazi bwacipele, na wabona kuti tabubbookede kwiinda lukanda lumwi, alimwi taakwe boya busia, mupaizi ajalile muntu oyo uujisi bulwazi bwacipele mazuba aali musanu aabili.

32Lino mubuzuba bwamusanu aabili mupaizi alange bulwazi. Na wabona kuti bulwazi tabuciyi buyandilila, alimwi taakwe boya bubalangala, alimwi tabubbookede kwiinda lukanda lumwi, 33-alinyoole, pele atalinyooli ali bulwazi. Lino mupaizi ajalile oyo mulwazi lwabili mazuba aali musanu aabili. 34Lino mubuzuba bwamusanu aabili mupaizi abone cipele. Na wabona kuti cipele taciciyi buyandilila mulukanda, alimwi tacibbookede kwiinda lukanda lumwi, mupaizi aambe kuti ulisalede, Asanzye zyakusama zyakwe, asalale. 35Pele na cipele ciciya buyandilila mulukanda naamana kusalazigwa, 36mupaizi amubone. Na wabona kuti cipele ciciya buyandilila mulukanda, mupaizi atalangauli boya bubalangala. Ulisofweede. 37-Pele na wabona kuti cipele caleka, alimwi kwamena boya busia, nkokuti cipele capona, Ulasalala. Mupaizi aambe kuti wasalala.

38Na mwaalumi na mwanakazi ulijisi mabata mulukanda lwamubili, nkokuti mabata aatuba, 39mupaizi amubone. Na wabona kuti mabata aamumubili wakwe taatubisyi, ncintambwe buyo cili mulukanda, Ulasalala.

40-Na isusu lyamuntu lyakuluka, ngusimpanza, nekubaboobo ulasalala. 41Alimwi na isusu lyakwe lyakuluka kunkumu yakwe, ngusinjenya, nekubaboobo ulasalala. 42Pele na mukati kampanza na munjenya mwaboneka bulwazi busalala-salala kutuba, ncecinsenda cabuka mumpanza na munjenya. 43-Mupaizi amubone. Na wabona kuti obo bulwazi bwamumpanza na bwamunjenya bwasalala-salala kutuba mbubonya mbuli cinsenda camulukanda lwamubili, 44ngusicinsenda, ulisofweede. Mupaizi aambe kuti ulisofweede. Bulwazi bwakwe buli kumutwe wakwe.

45-Lino sicinsenda uujisi bulwazi, asame zyakusama zideluukide, atebezye masusu aamutwe wakwe, alivumbe kumulomo, akulila kuti, Kusofwaala! Kusofwaala! 46-Mazuba oonse bulwazi nebucili mulinguwe, ulisofweede. Wasofwaala, Uleelede kukala alike anze lyazilao.

47-Acalo cakusama cijisi bulwazi bwacinsenda, neciba cakusama caboya neciba cakusama cabutonge, 48neciba citungidwe neciba cilukidwe, neciba caboya neciba cabutonge, neciba cibaki cazikanda neciba cintu cimwi cazikanda, 49na kwabonwa kuti bulwazi bulasiasia nanka bulasalala-salala, mulicakusama eco na muzikanda ezyo, nemuba mucintu citungidwe nemuba mucintu cilukidwe, nemuba mucintu cimwi cazikanda, mbobulwazi bwacinsenda. Cileelede kutondezegwa kumupaizi. 50-Lino mupaizi amana kubona bulwazi, ajalile cintu eco cili abulwazi mazuba aali musanu aabili. 51-Lino mubuzuba bwamusanu aabili abone bulwazi. Na wabona kuti bulwazi bwayandilila mulicakusama eco, nemuba mucintu citungidwe nemuba mucintu cilukidwe, na muzikanda ezyo, kufumbwa milimo iibelesegwa zikanda, bulwazi ncecinsenda cibi, Cilisofweede. 52Uleelede kutenta cakusama eco cili abulwazi, neciba cintu citungidwe neciba cintu cilukidwe, nebuba boya nebuba butonge, neciba cintu cimwi cili buti cazikanda. Ncecinsenda cibi. Cileelede kutentwa mumulilo.

53Pele na mupaizi wabona kuti bulwazi tabuciyi buyandilila mulicakusama eco, neciba cintu citungidwe neciba cintu cilukidwe, neciba cibelesyo cimwi cazikanda, 54mupaizi alailile bantu kuti basanzye cintu eco cili abulwazi. Bamana kusanzya, mupaizi acijalile lwabili mazuba aali musanu aabili. 55Lino mupaizi uleelede kubona cintu cili abulwazi, camana kusanzigwa, nkabela na wabona kuti bulwazi tabusanduki, nekuba kuti tabuciyi buyandilila, cilisofweede. Amucitente mumulilo. Na bulwazi buli atala nanka mukati, ncintu comwe.

56Pele na mupaizi wabona kuti bulwazi tabucibonekesyi, cintu camana buyo kusamba, acikwamune mucakusama na mu cikanda na mucintu citungidwe na mucintu cilukidwe. 57Na ciciboneka mulicakusama eco na mucintu eco citungidwe na mucintu eco cilukidwe na mucintu cili buti cacikanda, nkokuti ciya buyandilila, Lino cintu eco cili abulwazi citentwe mumulilo. 58Pele na bulwazi bwamana mulicakusama eco na mucintu eco citungidwe na mucintu eco cilukidwe na mucintu cimwi cazikanda, camana buyo kusamba, cileelede kusanzigwa lwabili, cisalale. 59Oyo ngumulao wabulwazi bwacinsenda bwamulizyakusama, ne ziba zyaboya neziba zyabutonge, neziba zintu zitungidwe neziba zintu zilukidwe, neciba cintu cili buti cacikanda, muzibe na cilasalala na cilisofweede.