Search form

Levitiko 21

Milao yabapaizi: kulila kwabo, kukwata kwabo amakani amwi

1-Lino Jehova wakaambila Musa kuti, Ambila bapaizi, bana ba-Aroni, kuti kutabi naba omwe akati kabo uulisofwaazya nkaambo kamufu akati kabantu bakwe, 2cita sikamukowanyina loko, mbuli banyina, na wisi, na mwanaakwe mulombe, na mwanaakwe musimbi, na munyina, 3na mucizi wakwe uutakwetwe, (Uli afwiifwi kulinguwe, nkaambo katanakwatwa, aboobo ulakonzya kulisofwaazya nkaambo kakwe.) 4Teelede kulisofwaazya mbuli mulumi akati kabantu bakwe, kuti atasampauliki. 5-Batalinyooli kumutwe nanka kunyoola zyooko zyacilezu nanka kulinengaula amubili 6-Basalale kubusyu bwa-Leza wabo, kuti batasofwaazyi izina lyaLeza wabo, nkaambo mbembabo batuula zipaizyo zitentelwa Jehova, zilyo zya-Leza wabo, aboobo baleelede kusalala. 7-Batakwati mwanakazi simamambe nanka iwakasofwaazigwa; batakwati mwanakazi iwakalekana amulumaakwe; nkaambo mupaizi ulasalala kumeso aa-Leza wakwe. 8-Muleelede kumusalazya, nkaambo ngonguwe uutuula zilyo zya-Leza wako; uleelede kusalala kumeso aako, nkaambo ndasalala mebo nde-Jehova uumusalazya. 9-Kufumbwa mwana musimbi wamupaizi uulisofwaazya kukucita bwaamu, wasofwaazya wisi; atentwe mumulilo.

10-Mupaizi mupati akati kababunyina, iwakananikwa amafuta amutwe wakwe akusalazigwa kuti asame zikobela, teelede kutebununa masusu aakwe nanka kudeluula zyakusama zyakwe. 11-Teelede kunjila muli mutunta nekuba kulisofwaazya kulila wisi na banyina. 12-Alimwi teelede kuzwa mucikombelo nekuba kusofwaazya cikombelo ca-Leza wakwe, nkaambo munsini wakunanika kwa-Leza wakwe uli alinguwe. Ndime Jehova. 13-Akwate mwanakazi nakalindu. 14Teelede kukwata mukamufu nanka muleke nanka iwakabisigwa nanka sibuvuule. Akwate nakalindu akati kabantu bakwe, 15-kuti atasofwaazyi lunyungu lwakwe akati kabantu bakwe, nkaambo ndime Jehova uumusalazya.

16Alimwi Jehova wakaambila Musa kuti, 17-Ambila Aroni kuti, Kufumbwa muntu akati kalunyungu lwako mumazyalani aabo uujisi kampenda teelede kuswena afwaafwi kuzootuula zilyo zya-Leza wakwe. 18-Kufumbwa muntu uujisi kampenda atatuuli: naba moofu naba mulema naba mubambasumpemo naba uulampya cizo cimwi, 19naba muntu mulema cituta na ijanza, 20-naba mulemamusana nekaba kandondoyo naba sicimbolyo naba sicibulu naba sibwele naba muzibe; 21kutabi muntu naba omwe akati kabana ba-Aroni uujisi kampenda uuswena kufwaafwi kuzootuula zipaizyo zitentelwa Jehova. Mbwajisi kampenda atasweni kuzootuula zilyo zya-Leza wakwe pe. 22-Zilyo zya-Leza wakwe, neziba zintu zisalala neziba zintu zisalalisya loko, azilye zyoonse, 23pele teelede kunjila mukati kacisitilizyo nanka kuswena kufwaafwi kucipaililo, nkaambo ulijisi kampenda; kuti atasofwaazyi cikombelo cangu, nkaambo ndime Jehova uubasalazya. 24Aboobo Musa wakaambila Aroni abana bakwe abana boonse ba-Israyeli.