Search form

Levitiko 22

Milao aimwi yabapaizi

1Lino Jehova wakaambila Musa kuti, 2-Ambila Aroni abana bakwe kuti balipambule azintu zisalala zyabana ba-Israyeli nzibandisalazizya, kuti batasofwaazyi izina lyangu lisalalisya, Ndime Jehova. 3-Kobaambila kuti, Kufumbwa muntu walunyungu lwanu mumazyalani aanu oonse uuswena kufwaafwi kuzintu zisalala zyabana ba-Israyeli nzibasalazizya Jehova, nacisofweede, oyo muntu ulatandwa kubusyu bwangu. Ndime Jehova. 4-Kufumbwa muntu akati kabana ba-Aroni uuli acinsenda na lusenso teelede kulya zintu zisalalisya mane akasalale. Alimwi kufumbwa uuampa cintu cisofweede nkaambo kamufu nanka mwaalumi uusofweede bwaalumi bwakwe, 5-na muntu uuampa ciyavula ansi cikonzya kusofwaazya nanka muntu uukonzya kumusofwaazya abusofwi buli buti abuti— 6-muntu uuampa cintu cili boobo ulasofwaala mane kusikila kumabbililo aazuba, alimwi teelede kulya zintu zisalalisya cita sansi asambe amubili. 7-Lino izuba lyabbila buyo ulasalala; musule lyaboobo ulakonzya kulya zintu zisalalisya, nkaambo nzezilyo zyakwe. 8-Munyama uulifwida nanka uulumwa, teelede kulya nyama yakwe pe, kuti atalisofwaazyi. Ndime Jehova. 9-Babambe lubeta lwangu, kuti batajani kaambo, batafwi ciindi cakulisofwaazya. Ndime Jehova uubasalazya.

10-Bazwakule tabeelede kulya zintu zisalalisya. Mweenzu uuswaya kumupaizi, nanka similimo uuvola mali, boonse tabeelede kulya zintu zisalalisya. 11Pele na mupaizi waula muntu amali aakwe, oyo muntu alye. Abaabo ibazyalwa muŋanda yakwe, abo balalya cilyo cakwe. 12Na mwana musimbi wamupaizi wakwatwa kumuzwakule, teelede kulya zilyo zyacipaizyo cazintu zisalalisya. 13-Pele na oyo mwana musimbi wamupaizi wafwidwa mulumi na kulekwa, nkabela taakwe bana, alimwi waboola kuŋanda yawisi mbubonya mbuli mumazuba aabwanike bwakwe, alye zilyo, zyawisi. Pele kutabi muzwakule uuzilya pe. 14-Na muntu walya cintu cisalalisya mukutaziba, uleelede kuyungizya cipanzi casanu akuboozezya mupaizi eco cintu cisalalisya. 15Batasofwaazyi zintu zisalalisya zyabana ba-Israyeli nzebaletela Jehova, 16kuti batajani mulandu ciindi cakulya zintu zisalalisya, nkaambo ndime Jehova uubasalazya.

Milao aimwi yazipaizyo

17Lino Jehova wakaambila Musa kuti, 18-Ambila Aroni abana bakwe abana boonse ba-Israyeli kuti, Kufumbwa muntu waluzubo lwa-Israyeli, na wabeenzu bakalakala mucisi ca-Israyeli, uuleta cipaizyo cakwe, neciba cipaizyo cakukonkezya neciba cakupa buyo, zyoonse nzebaletela Jehova kukumutentela, 19na muyanda kutambulika, cibe mucende uutakwe kampenda akati kaŋombe nanka imbelele nanka impongo. 20-Cintu cijisi kampenda, mutacipaizyi pe, nkaambo tacitambuliki. 21-Amuntu uutuulila Jehova cipaizyo cakutontozya, neciba cakukonkezya neciba cakupa buyo, munyama ngwaleta, niiba iŋombe niiba imbelele, uleelede kululama kuti atambulike; atabi akampenda nekaba komwe. 22Moofu na uutyokede na mulema na uuli azilonda na sicibulu na sibwele, abo boonse toelede kubapaizizya Jehova nekuba kubatentela Jehova acipaililo. 23-Musune na kabelele uulampya cizo cimwi na uucesya cizo cimwi ulakonzya kuba cipaizyo cakupa buyo, pele tatambuliki mbuli cipaizyo cacikonsyo. 24Munyama uuli amacende aapwayikide na aapasukide na aalebukide nanka uuzibidwe tamweelede kumutuulila Jehova na kumupaizya mucisi canu. 25-Abanyama bali boobo baulidwe kumweenzu, abalo tamweelede kubaleta mbuli zilyo zyaLeza wanu, Babija, balijisi kampenda, aboobo tabatambuliki.

26Lino Jehova wakaambila Musa kuti, 27-Iŋombe na imbelele na impongo niizyalwa, ileelede kukala kulibanyina mazuba aali musanu aabili; lino kuzwa kubuzuba bwamusanu aatatu ilatambulika mbuli cipaizyo cakutentela Jehova. 28-Iŋombe na imbelele impwizi, mutaijayi abana bayo boonse mubuzuba bomwe. 29-Alimwi na mwapaizizya Jehova cipaizyo cakulumba, amupaizye kabotu kuti mutambulike. 30Ciligwe mubuzuba bomwe; citasyaali mane kubucedo pe, Ndime Jehova.

31-Amubambe milao yangu akwiicita, Ndime Jehova. 32-Mutasofwaazyi izina lyangu lisalalisya. Ndemekwe akati kabana ba-Israyeli, Ndime Jehova uumusalazya, 33-iwakamupozya munyika ya-Egepita, kuti mbe Leza wanu, Ndime Jehova.