Search form

Levitiko 25

Mwaka wa-Sabata amwaka wakulizya myeembo

1-Lino Jehova wakaambila Musa mucilundu ca-Sinai kuti, 2-Ambila bana ba-Israyeli kuti, Mwasika buyo kunyika njenti mupe, nyika ileelede kuba a-Sabata lya-Jehova. 3Myaka iili musanu aumwi ubyale munuunda wako; myaka iili musanu aumwi uzibe muunda wako wamisaansa akutebula micelo yako. 4Pele munwaka wamusanu aibili inyika ipegwe Sabata lyakulyokezya, Sabata lya-Jehova, Utabyali mumuunda wako nekuba kuziba misaansa yako. 5-Utatebuli cintu cilimenena mumuunda wako nekuba kucela micelo iilimenena kumisaansa yako. Nyika ipegwe mwaka wa-Sabata wakulyokezya. 6Oyo mwaka wa-Sabata lyanyika ulakuletela zilyo, yebo amulanda wako mwaalumi amulanda wako musimbi asimilimo wako abeenzu mbokede abo; 7azyalo iŋombe zyako abanyama bali munyika yako, zintu zilimenena zilaba zilyo zyabo.

8Lino ubale insondo zili musanu azibili zyamyaka, nkokuti myaka iili musanu aibili ziindululwe ziindi zili musanu azibili, ciindi cansondo ezyo zyamyaka cilasika kumyaka iili makumi one amusanu aine. 9-Lino mubuzuba bwakumi bwamumwezi wamusanu aibili kulizigwe mweembo canguzu; mubuzuba bwakumanya milandu mweembo ulile koonse koonse munyika. 10-Nkabela mwaka wamakumi osanwe, muleelede kuusalazya akuswiilizya bantu boonse bakede munyika makani aakwaangunuka, Myeembo ilile, kuti mubweede umwi aumwi kulukono lwakwe akuluzubo lwakwe. 11Oyo mwaka wamakumi osanwe umubede mwaka wakulizya myeembo; mulinguwo tamweelede kubyala nekuba kutebula zilimenena nekuba kucela micelo yakumisaansa yako iitazibidwe. 12Nkaambo ngumwaka wakulizya myeembo; ulamusalalila; mulalya neuumupa mumyuunda.

13-Mumwaka oyo wakulizya myeembo mulapiluka umwi aumwi kulukono lwakwe. 14-Na waulisya nanka kuula kumweenzinyoko, mutabbidani. 15Mbuli mweelwe wamyaka kuzwa kumwaka wakulizya myeembo mbubonya obo mboelede kuula kumweenzinyoko; ambuli mweelwe wamyaka yakulima zilyo, mbubonya obo mbweelede kukuulisizya. 16Na myaka yavula, amukomezye muulo; na myaka yaceya, amucesye muulo; nkaambo ngumweelwe wazyakulya ngwakuulisizya. 17-Mutabbidani pe; amuyoowe Leza wanu; nkaambo ndime Jehova Leza wanu.

18-Amuswiilile milao yangu, amubambe imbeta zyangu akuzicita, kuti mukale caluumuno munyika. 19Lino nyika ilamupa zyakulya, kuti mulye cakukuta akukala caluumuno. 20-Pele na mwaamba kuti, Ino tuyoolyanzi mumwaka wamusanu aibili, na tatukonzyi kubyala nikuba kutebula zyakulya? 21-Amubone! Njoomupa coolwe cangu mumwaka wamusanu aumwi, kuti umuletele ceyo camyaka yotatwe. 22-Mumwaka wamusanu aitatu mulabyala, pele munoocilya zilyo zyakale; munoocilya zilyo zyakale mane kusikila mwaka wamusanu aine, mane mukatebule. 23-Nyika tiielede kuulilwa limwi pe, nkaambo nyika njiyangu; nkaambo muli beenzu buyo kulindime, muli basikutuntulika. 24Lino nyika yoonse njimuvubide muleelede kuzumina kuti nyika inununwe.

25-Na munyoko wacetaala, aboobo ulaulisya lubono lumwi, sikamukowanyina aboole kuzoonunwida munyina ncaaulisya. 26Pele na muntu wabula sikumununwida, elyo kaba kaindi wavuba akujana cakununuzya, 27abale myaka kuzwa kuciindi eco naakaulisya, ape muntu iwakaula mali aaindilila, elyo aboole mulukono lwakwe. 28Pele na wakacilwa kujana cakununuzya, ncaakaulisya cinookede mumaanza aasikucuula mane kusikila kumwaka wakulizya myeembo; elyo mumwaka wakulizya myeembo ciyooangunuka, kuti aboole mulukono lwakwe.

29Na muntu waulisya iŋanda yakukala mumunzi uuli alubaya, ulakonzya kwiinununa kufumbwa ciindi mumwaka uutobela buzuba bwakuulisya; mwaka woonse ulijisi inguzu zyakwiinununa. 30Pele iŋanda yamumunzi uuli alubaya, na yabula kunununwa mukati kamwaka, ilaba yakwe, nkabela iwakaiula abana bakwe bayooikona mumazyalani aabo oonse; taikooyoopiluka mumwaka wakulizya myeembo pe. 31Pele maanda aamuminzi iitajisi imbaya ala am bwa antoomwe amyuunda yanyika eyo; alakonzya kunununwa, alimwi alapiluka mumwaka wakulizya myeembo. 32-Nekubaboobo minzi yaba-Levi, maanda aamuminzi njebavubide, ba-Levi balazumininwa kwaanununa ciindi coonse. 33Na mu-Levi wabula kunununa iŋanda iyakaulisigwa mumunzi walukono lwabo iyooangunuka mumwaka wakulizya myeembo; nkaambo maanda aamuminzi yaba-Levi ndolukono lwabo akati kabana ba-Israyeli. 34-Pele myuunda iiengelede minzi yabo tiiulisigwi pe, nkaambo ndolukono lwabo lwalyoonse.

35-Na munyoko wacetaala, alimwi wabula inguzu zyakuligwasya, uleelede kumulela. Akale kulinduwe mbuli mweenzu na mbuli simutuntuli. 36-Utatambuli impindu kumaanza aakwe yakumukolotya. Yoowa Leza wako, kuti munyoko akale kulinduwe. 37-Utamukolotyi mali aako kukujana impindu nekuba kumwaabila zilyo kuti uyungizizigwe. 38Ndime Jehova Leza wanu iwakamupozya mucisi ca-Egepita kuti mupe nyika ya-Kanana akuba Leza wanu.

39-Alimwi munyoko ngokede awe, na wacetaala akulyuulisya kulinduwe, toelede kumubelesya milimo yabuzike pe. 40Abeleke kulinduwe mbuli mulanda uuvola mali nanka sikukalakala, Akubelekele milimo mane kusikila kumwaka wakulizya myeembo. 41Lino akusie, walo abana bakwe, kuti apiluke k uciinga cakwe akulukono lwabamawisi. 42-Nkaambo mbalanda bangu mbendakapozya munyika ya-Egepita, Tabeelede kuulisigwa mbuli bazike pe. 43-Utamweendelezyi calunya. Yoowa Leza wako. 44Bazike bako baalumi abanakazi, ulakonzya kuula bazike baalumi abanakazi akati kabamasi bakweengelede. 45Abalo beenzu bakalakala akati kanu, mulakonzya kuula kulimbabo abana babo mbomuli abo, ibakazyalwa munyika yanu, kuti mubavube. 46Alimwi bayooba lukono lwabana banu balya mazina aanu, babavube lyoonse, Balaba bazike banu. Pele bana bakwanu, bana ba-Israyeli, tamweelede kweendelezya umwi aumwi mweenzinyina calunya pe.

47Lino na mweenzu na simutuntuli ngokede awe wavuba, amunyoko ngwakede awe wacetaala akulyuulisya kumweenzu oyo na kulisimutuntuli oyo ngokede awe, na kulisikamukowanyina mweenzu, 48amana kulyuulisya, ulakonzya kunununwa, Umwi wababunyina ulakonzya kumunununa. 49Naba simizyaabo naba mwana wasimizyaabo amununune; na sikamukowanyina umwi amununune; nanka wavuba, alinunune mwini. 50Abale, antoomwe asikumuula, mweelwe wamyaka kuzwa kukuulwa kwakwe kusikila kumwaka wakulizya myeembo; lino mali aamuulo wakwe abe mbubonya mbuli mweelwe wamyaka; mazuba ngaakakede asimalelo wakwe abe mbuli mazuba aasimilimo uuvola mali. 51Na myaka icili minji, mali aakununuzya agwisigwe mumuulo wakwe mbubonya. 52Na kwasyaala myaka mice buyo kusikila kumwaka wakulizya myeembo, abale myaka eyo akuliya mali aakulinunuzya mbubonya obo. 53Abe mbubonya mbuli similimo uuvola mali mwaka umwi aumwi; teelede kumweendelezya calunya mumeso aako. 54Nkabela na tanununwi mbuli muziyanza ezi, aangunuke mumwaka wakulizya myeembo, walo abana bakwe boonse. 55Nkaambo bana ba-Israyeli mbalanda bangu, balanda mbendakapozya munyika ya-Egepita, Ndime Jehova Leza wanu.