Search form

Levitiko 7

Amwi makani aazipaizyo

1-Ngooyu mulao wacipaizyo candubo. Ncintu cisalalisya loko. 2-Cipaizyo candubo cijayigwe nkukonya oko nkobajayila cipaizyo cakutenta, abulowa bwakwe busansailwe acipaililo cakuzyunguluka. 3-Mafuta aaco oonse atentwe, amucila, alufuko, 4ansa zyobile amafuta aazyo aabambene acikungu, alulyaŋanga lwamuni; zyoonse zigwisigwe antoomwe ansa. 5-Mupaizi azitente acipaililo. Ncipaizyo candubo citentelwa Jehova, 6-Baalumi boonse akati kabapaizi bacilye. Ciligwe mubusena busalalisya. Ncintu cisalalisya loko. 7-Cipaizyo candubo cilikozyene acipaizyo cazibi; zyoonse zilijisi mulao omwe. Mupaizi uumanya milandu ancico, cilaba cakwe. 8Alimwi mupaizi uutuula cipaizyo camuntu cakutenta, itobo lyacipaizyo ncatuuzya cilaba camupaizi. 9-Acipaizyo cabusu ciyokelwa muciyokelo, acoonse cikangwa mucikangilo nanka acibulo, ncamupaizi uucipaizya, acibweze. 10Zipaizyo zyoonse zyabusu, neziba zivwelene amafuta neziba ziyumu, zilaba zyabana ba-Aroni. Boonse kabeelene.

11-Alimwi ngooyu mulao wazipaizyo zyakutontozya ziletelwa Jehova. 12-Na muntu wapaizya cilumbyo, antoomwe acilumbyo apaizye azinkwa zitakwe bumena zikandidwe amafuta, azibunge zitakwe bumena zinanikidwe mafuta, azibunge zyabusu bunante buvwelene amafuta. 13-Alimwi antoomwe azipaizyo zyakutontozya zyakulumbya apaizye zinkwa zila abumena. 14-Kucipaizyo cakwe agwisye cinkwa comwe, cibe cilumbyo ca-Jehova; eco cilaba camupaizi uusansaila bulowa bwazipaizyo zyakutontozya. 15-Anyama yacipaizyo cakutontozya cakulumbya cileelede kuligwa mubuzuba obo mbubonya bwakupaizya; takweelede kusyaala mane cifumo pe. 16-Pele na cipaizyo cakwe ncacikonkezyo na cipaizyo camoyo, ilaligwa mubuzuba bwakupaizya, alimwi iisyaala inooligwa mubuzuba butobela bwabili, 17pele na kwasyaala nyama mubuzuba bwatatu, ileelede kutentwa mumulilo. 18-Na kwaligwa nyama yacipaizyo cakwe cakutontozya mubuzuba obo bwatatu, oyo uupaizya takoonootambulika nekuba kweelezegwa bululami. Cilaba cisesemyo, ayooyo uucilya uyooba amulandu.

19Nyama iiguma cintu neciba comwe cisofweede tiiligwi, ileelede kutemwa mumulilo, Boonse bantu basalala balakonzya kulya nyama, 20-pele kufumbwa muntu uulya nyama yazipaizyo zyakutontozya zya-Jehova naacili abusofwaazi, oyo muntu uleelede kutandwa muciinga cakwe, 21-Alimwi na muntu waguma cintu cimwi acimwi cisofweede, mbuli busofwaazi bwamuntu na busofwaazi bwamunyama uusofweede na cisesemyo cisofweede, nkabela amana kuguma walya nyama yazipaizyo zyakutontozya zya-Jehova, oyo muntu uleelede kutandwa k uciinga cakwe,

22Lino Jehova wakaambila Musa kuti, 23-Ambila bana ba-Israyeli kuti, Mutalyi mafuta pe, naaba mafuta aaŋombe naaba aambelele naaba aampongo. 24Mafuta aamunyama uulifwida nanka uulumwa alakonzya kubelesegwa milimo imwi, pele kuligwa takoonooligwa pe. 25Nkaambo kufumbwa muntu uulya mafuta aaŋombe bantu nzebatentela Jehova, oyo muntu uleelede kutandwa kuciinga cakwe. 26-Abwalo bulowa, tamweelede kubulya abuniini mumakalilo aanu oonse, nebuba bulowa bwamunyama nebuba bulowa bwamuyuni. 27Kufumbwa muntu uulya bulowa, oyo muntu uleelede kutandwa kuciinga cakwe.

28Alimwi Jehova wakaambila Musa kuti, 29-Ambila bana ba-Israyeli kuti, Kufumbwa uupaizizya Jehova cipaizyo cakutontozya, aletele Jehova cipaizyo cakwe, Agwisye mucipaizyo cakutontozya 30-cakutentela Jehova akucileta amaanza aakwe mwini. Alete mafuta akatiti, kuti katiti kavukuzigwe kunembo lya-Jehova, cibe cipaizyo cakuvukauzya. 31-Lino mupaizi atente mafuta acipaililo, pele katiti kalaba ka-Aroni abana bakwe. 32-Alimwi mweendo wacikungu walulyo muleelede kuugwisya muzipaizyo zyakutontozya, mupe mupaizr. 33Kufumbwa muntu wabana ba-Aroni uupaizya bulowa bwazipaizyo zyakutontozya amafuta aazyo, mweendo wacikungu walulyo ncaabilo cakwe. 34-Nkaambo katiti kavukuzigwa amweendo wacikungu walulyo cipaizigwa, zyoonse ndazigwisya muzipaizyo zyakutontozya nzebaleta bana ba-Israyeli, ndazipa Aroni mupaizi abana bakwe. Ngumulao walyoonse akati kabana ba-Israyeli. 35Ncecaabilo ca-Aroni acaabilo cabana bakwe akati kazipaizyo zitentelwa Jehova; neebakapegwa mubuzuba bwakubikwa mumilimo yabupaizi bwa-Jehova. 36-Jehova wakalailila kuti bapegwe ncico kubana ba-Israyeli mubuzuba obo naakabananika mafuta. Ngumulao walyoonse mumazyalani aabo oonse.

37-Ngooyo mulao wacipaizyo cakutenta, acipaizyo cabusu acipaizyo cazibi, acipaizyo candubyo, acakusalazya, azipaizyo zyakutontozya. 38Njemilao Jehova njaakalailila Musa mucilundu ca-Sinai, mubuzuba obo naakalailila bana ba-Israyeli kuti baletele Jehova zipaizyo zyabo, munkanda ya-Sinai.