Search form

Myeelwe 10

Myeembo yansiliva

1Lino Jehova wakaambila Musa kuti, 2-Kolicitila myeembo yobile yansiliva yacifulamubisi, ibe yakwiitya bantu ciindi cakweenda aciindi cakulyokezya. 3-Na yalila yoonse yobile, imbungano yoonse yabantu ileelede kuyoboloka kulinduwe kumulyango watente lyambunganino. 4-Pele na walila omwe buyo, kulayoboloka basilutwe balike, basimutwe banzubo zya-Israyeli. 5-Na walilisya mweembo, inkamu zyabantu ziyakide zilao kulubazu lwakujwe zilanyamuka. 6Lino kuciindi cakulilisya lwabili, inkamu zyabantu ziyakide zilao kulubazu lwakumusanza zilanyamuka. Kulilisya kwamweembo ncecitondezyo cakweenda. 7-Pele kuciindi cakubunganya bantu, amulizye mweembo, pele kulilisya utalilisyi pe. 8-Bapaizi, bana ba-Aroni, mbobeelede kulizya myeembo. Ngumulao walyoonse mumazyalani aanu conse. 9-Alimwi ciindi cakuya kunkondo kuyoolwisya basinkondonyoko bamupenzya munyika yanu, myeembo ileelede kulilisya, lino munooyeeyegwa kubusyu bwa-Jehova Leza wanu, aboobo munoofutulwa kumaanza aabasinkondonyoko. 10-Alimwi kuziindi zyanu zyakusekelela, amumapobwe aabikidwe, amuziindi zyamwezi mupya, amulizye myeembo kuzipaizyo zyanu zyakutenta akuzipaizyo zyanu zyakutontozya, ibe ciibalusyo kubusyu bwa-Leza wanu. Ndime Jehova Leza wanu.

Ba-Israyeli mbubakalonga kuzwa ku-Sinai

11-Lino mumwaka wabili, mumwezi wabili, mubuzuba bwamakumi obile bwamumwezi, ijoba lyakaumbuluka atala lyacikombelo cacizuminano. 12-Lino bana ba-Israyeli bakatalika kulonga kuzwa kunkanda ya-Sinai, nkabela ijoba lyakaakwiima kunkanda ya-Parana. 13-Bakatola lweendo lwabo mbubonya mbuli Jehova mbwaakalailila kumulomo wa-Musa. 14Bantu bandembela yalabba lyabana ba-Juda mbobakataanguna kweenda, munkamu zyabo, nkabela silutwe wankamu yabo wakali Nasoni mwana wa-Aminadabu. 15Asilutwe wamusyobo wabana ba-Isakara kali Netaneeli mwana wa-Zuwara. 16Asilutwe wamusyobo wabana ba-Zebuloni wakali Eliabu mwana wa-Heloni.

17-Lino cikombelo nicakamwayigwa, bakanyamuka bana ba-Gerisoni abana ba-Merari, basikuyumuna cikombelo. 18Musule lyabo bakanyamuka bantu bandembela yalabba lya-Rubeni, munkamu zyabo, nkabela silutwe wankamu yabo wakali Elizuri mwana wa-Sedeuri. 19Asilutwe wamusyobo wabana ba-Simeoni wakali Selumiyeli mwana wa-Zurisadai. 20Asilutwe wamusyobo wabana ba-Gadi kali Eliyasafe mwana wa-Deyueli.

21Lino bakanyamuka ba-Kohati, basikuyumuna zintu zisalala; nkabela beenzinyina bakayaka itente kabatanasika bamwi. 22Lino musule lyabaabo bantu bandembela yalabba lyabana ba-Efraimu bakanyamuka, munkamu zyabo, nkabela silutwe wankamu yabo kali Elisama mwana wa-Amihudi. 23Asilutwe wamusyobo wabana ba-Manase kali Gamaliyeli mwana waPedazuri. 24Asilutwe wamusyobo wabana ba-Benjamini kali Abidana mwana wa-Gideoni.

25-Musule lyabaaba bakeenda bantu bandembela yalabba lyabana ba-Dani, munkamu zyabo; mbembabo bakasyaalila kweenda akati kamalabba oonse; nkabela silutwe wankamu yabo wakali Ahiezeri mwana wa-Amisadai. 26Asilutwe wamusyobo wabana ba-Aseri kali Pagiyeli mwana wa-Okirani. 27Asilutwe wamusyobo wabana ba-Nafitali kali Ahira mwana wa-Enani. 28-Mbuboobo inkamu zyabana ba-Israyeli mbuzyakali kweenda muciindi cakulonga.

29-Lino Musa wakaambila Hobabu mwana wa-Reueli mu-Midyani, simakwaakwe Musa, wati, Tuli mulweendo lwakuya kucisi Jehova ncaakaamba kuti, Njoomupa ncico. Atweende ayebo, lino tulakucitila kabotu, nkaambo Jehova waamba makani mabotu aaba-Israyeli. 30Pele wakuvuwa kuti, Nsikooinka pe, ndaya kunyika yangu akulibasikamukowama. 31-Wakati, Utatupambuki, nkaambo ulizi kuti tuyooyaka zilao zyesu munkanda, uyootubeda meso esu. 32Na wainka aswebo, kufumbwa cintu cibotu Jehova ncatucitila, tulakucitila mbubonya ayebo.

33-Mpoonya awo bakalonga kuzwa kucilundu ca-Jehova, bakeenda mazuba otatwe. Ibbokesi lyacizuminano ca-Jehova lyakabazulwida mazuba otatwe kuyoobayandawida cilyokezezyo. 34-Alyalo ijoba lya-Jehova lyakali amutwe wabo ciindi casikati mukweendeenda kwabo koonse.

35-Lino kufumbwa ciindi ibbokesi lya-Leza nilyakanyampuka, Musa wakati, Buka, O Jehova, kuti basinkondonyoko bamwaike, abaabo bakusula bacije kubusyu bwako. 36-Akuciindi cakulyokezya kwalyo, wakati, Boola, O Jehova, kumakumi aazyuulu zyazyuulu zyaba-Israyeli.