Search form

Myeelwe 13

Basikutwela mbubakatumma kubona nyika ya-Kanana

1Lino Jehova wakaambila Musa kuti, 2-Tuma bantu kuyootwela nyika ya-Kanana njindapa bana ba-Israyeli. Tuma muntu omwe omwe kumusyobo umwi aumwi. Boonse babe bazuluzi. 3Mpoonya awo Musa wakabatuma kuzwa kunkanda ya-Parana, mbubonya mbwaakalailila Jehova, Bantu boonse bakali bazuluzi akati kabana ba-Israyeli. 4Ngaaya mazina aabo: kumusyobo wa-Rubeni, Samua mwana wa-Zakuri; 5kumusyobo wa-Simeoni, Safati mwana wa-Hori; 6-kumusyobo wa-Juda, Kalebe mwana wa-Jefune, 7kumusyobo wa-Isakara, Igali mwana wa-Josefa; 8kumusyobo wa-Efraimu, Hosea mwana wa-Nuni; 9kumusyobo waBenjamini, Paliti mwana wa-Rafu; 10kumusyobo wa-Zebuloni, Gadiyeli mwana wa-Sodi; 11kumusyobo wa-Josefa, nkokuti musyobo wa-Manase, Gadi mwana wa-Susi; 12kumusyobo wa-Dani, Amiyeli mwana wa-Gemali; 13kumusyobo wa-Aseri, Seturi mwana wa-Mikayeli; 14kumusyobo wa-Nafitali, Nabi mwana wa-Vopisi; 15kumusyobo wa-Gadi, Geyueli mwana wa-Maki. 16-Ngengao mazina aabantu mbaakatuma Musa kuyootwela nyika. Nkabela Hosea mwana wa-Nuni, Musa wakamuulika izina lya-Joshua.

17-Lino Musa wakabatuma kuyootwela nyika ya-Kanana, nkabela wakabaambila kuti, Kamuya kucisi caku-Negebi akuzilundulundu, 18mukabone nyika mbwiibede, abantu bakede mulinjiyo, na mbayumu na mbabombe, na mbace na mbanji; 19mubone nyika njibakede pa nimbotu na nimbi, aminzi njibakede na malabba buyo na ili amabaya, 20-anyika mbiibede, na njambolezi na njankanda, alimwi na muli misamu mulinjiyo na pe. Amu-yume, mukalete imwi micelo yamunyika, Lino ciindi eco cakali ciindi camasaansa naatalika kubizwa.

21Mpawo bakainka kuyootwela nyika yoonse kuzwa kunkanda ya-Zini kusikila ku-Rehobi uubambene amanjililo aa-Hamati. 22-Bakaya kuNegebi akusika ku-Hebroni. Nkabela Ahimani a Sesai a-Talimai, bana ba-Anaki, mpobakakede. (Hebroni wakayakwa myaka iili musanu aibili kuutana kuyakwa Zoani waku-Egepita.) 23Basike buyo kukalonga kaEsikoli, bakatyola nkukonya oko mutabi iwakali acikungo camasaansa, bacitemba bobile, alimwi bakacela-cela mapomegranite ankuyu. 24Lino kuntu oko kwakaulikwa izina lya-Esikoli, nkokuti cikungo, nkaambo kacikungo ncibakatyola bana ba-Israyeli oko.

25Amane mazuba aali makumi one, bakaboola kuzwa kukutwela nyika. 26Lino bakasika kuli-Musa a-Aroni ambungano yoonse yaba-Israyeli kuKedesi mu nkanda ya-Parana, nkabela bakabaletela impuwo, balo ambungano yoonse yabantu, akuba tondezya micelo yanyika. 27-Nkabela bakabalwiida, bati, Twakaakusika kunyika nkumwakatutuma. Ncobeni ilakunka malili abuci; njeeyi micelo yayo. 28-Pele bantu bakede munyika mbayumu, aminzi iili ama baya, alimwi mipati, Nkabela twakabona bana ba-Anaki nkuko. 29-Ba-Amaleki mbebakakede munyika ya-Negebi; ba-Hiti abaJebusi aba-Amori mbebakede kuzilundulundu; aba-Kanana balikede kumbali alwizi akunkomwe zya-Jordano.

30-Mpawo Kalebi wakatontozya myoyo yabantu kubusyu bwa-Musa, wati, Ne! Atweende, tukaivube, nkaambo ncobeni tulakonzya kwiizunda. 31Pele bantu mbaakeenda abo bakati, Tatukonzyi kuyoolwisya bantu abo, pe, nkaambo mbayumu kwiinda ndiswe. 32-Aboobo bakaletela bana baIsrayeli impuwo imbi yanyika eyo njibakaakutwela, Bakati, Nyika eyo njitwakaakutwela ninyika iikonzya kulya bantu bayo, abantu boonse mbetwakabona nkuko majompojompo. 33-Alimwi nkukonya oko twakabona babbabbani, nkabela swebo mumeso esu amumeso aabo twakalitenga.