Search form

Myeelwe 21

Ba-Israyeli mbubakazunda ba-Kanana ku-Horima

1-Lino mu-Kanana, mwami wa-Aradi, iwakakede ku-Negebi, naakamvwa kuti ba-Israyeli baleza munzila yabasikutwela, wakalwisya ba-Israyeli akujata bamwi babo. 2-Mpawo ba-Israyeli bakakonka cikonke kuli-Jehova, bati, Na ncobeni ulaaba bantu aba mumaanza esu, tulanyonyweda limwi minzi yabo. 3Nkabela Jehova wakaswiilila ijwi lyabaIsrayeli, waaba ba-Kanana mumaanza aabo. Lino bakanyonyoona boonse aminzi yabo. Aboobo kuntu oko kwakaulikwa izina lya-Horima.

Inzoka yamukuba

4-Lino kuzwa kucilundu ca-Hori bakanyamuka, batola inzila yaku-Lwizi Lusalala, bazyunguluka cisi ca-Edomu. Nkabela myoyo yabantu yakacimwa munzila. 5-Lino bantu bakakazyanya a-Leza a-Musa, bati, Nkaambonzi mwakatupozya kuzwa ku-Egepita kuti tufwe munkanda? Taakwe zilyo. Taakwe maanzi. Atupepelefwa otu myoyo yesu yatucimwa. 6-Mpawo Jehova wakatuma inzoka zikali akati kabantu, nkabela zyakaluma bantu, elyo bantu banji ba-Israyeli bakafwa. 7-Lino bantu bakeza kuli-Musa, bati, Twabisya, nkaambo twanyontauka Jehova ayebo. Utukombele kuliJehova atugwisizye inzoka, Mpawo Musa wakakombela bantu. 8Lino Jehova wakaambila Musa kuti, Kolicitila inzoka akwiianzika akasamu mbuli ndembela; lino kufumbwa muntu uulumidwe aibona buyo ulapona. 9-Elyo Musa wakapanga inzoka yamukuba, waianzika akasamu mbuli ndembela, nkabela kufumbwa muntu iwakalumwa inzoka, alanga buyo kunzoka yamukuba, wakapona.

Ba-Israyeli mbubakali kulonga-langa mane bakasika ku-Pisiga

10Lino bana ba-Israyeli bakanyamuka, baakuyaka zilao zyabo ku-Oboti. 11Kuzwa ku-Oboti bakaakuyaka ku-Iyebarimu munkanda iilangene acisi ca-Moabu kulubazu lwakubuzwezuba. 12Kuzwa oko bakaakuyaka mukuti lya-Zeredi. 13-Kuzwa oko bakalongela mutala lya-Arinoni uuli munkanda uubambene aba-Amori, nkaambo Arinoni ngumugaano waba-Moabu, nkokuti mugaano akatikati kaba-Moabu aba-Amori. 14Nkaambo kako kulaambwa mubbuku lyankondo zya-Jehova kuti,

Vahebi mu-Sufa,

Amakuti aa-Arinoni,

15Ankunamwa zyamakuti

Zilangene adinga lyaku-Ari,

Ziyeeme amugaano wa-Moabu,

16-Lino kuzwa oko bakaya ku-Beeri, ncencico cikala Jehova ncaakaambila Musa kuti, Bunganya bantu, ndibape maanzi. 17-Mpawo ba-israyeli bakaimba olu lwiimbo lwakuti,

Tuntumuka, Ocikala. Amuciimbile,

18-Cikala ncebakasya basilutwe,

Neebakafumba bapati babantu,

Ankoli zyamampelampela amisako yabo,

Lino kuzwa kunkanda bakaya ku-Matana, 19akuzwa ku-Matana bakaya ku-Nahaliyeli, akuzwa ku-Nahaliyeli bakaya ku-Bamoti, 20-akuzwa kuBamoti bakaya kukuti lyakucisi ca-Moabu, libambene amutwe wa-Pisiga, uulangene agundu.

Ba-Israyeli mbubakazunda Sihoni mwami waba-Amori a-Ogi mwami wa-Basana

21-Lino ba-Israyeli bakatuma batumwa kuli-Sihoni mwami waba-Amori, bati, 22-Atwiinde akati kanyika yako; tatukooleya kunjila mumyuunda na mumyuunda yamasaansa, tatukoonywa maanzi aamuzikala, tuliinda buyo kumugwagwa wamwami, mane tuzwe munyika yako. 23-Pele Sihoni takwakazumizya ba-Israyeli kwiinda akati kacisi cakwe pe. Sihoni wakabunganya bantu bakwe boonse, weza kuzoocinga ba-Israyeli munkanda. Asike ku-Jahazi, wakalwana aba-Israyeli. 24-Nkabela ba-Israyeli bakamuzunda amulomo wapanga, aboobo bakatola nyika yakwe kuzwa ku-Arinoni kusikila ku-Jaboki kumugaano wabana ba-Amoni, nkaambo Jazeri ngomugaano wabana ba-Amoni. 25Lino ba-Israyeli bakatola minzi eyi yoonse, nkabela ba-Israyeli bakakala muminzi yoonse yaba-Amori, mu-Hesiboni amutunzuunzi twawo toonse. 26Nkaambo Hesiboni kauli munzi wa-Sihoni mwami waba-Amori; nkaambo kalwanide amwami mutaanzi waba-Moabu akumunyanzya nyika yakwe yoonse kusikila ku-Arinoni. 27Nciceeco basitusimpi neebaambila kuti,

Amuboole ku-Hesiboni, uyakwe.

Munzi wa-Sihoni ubuke.

28-Nkaambo mu-Hesiboni mwazwa mulilo,

Mumunzi wa-Sihoni mwazwa mabangabanga.

Watenta Ari waku-Moabu

Abasilutwe bakuzilundu zya-Arinoni.

29-Mawe kulindinywe, noba-Moabu!

Mwanyonyooka nywebo nobantu ba-Kemosi!

Waaba bana bakwe balombe kuti bacije

Abana bakwe basimbi kuti batolwe mubizike,

Kumwami mu-Amori, Sihoni.

30-Lunyungu lwako lwakanyonyooka kuzwa ku-Hesiboni kusikila ku-Diboni,

Twabasaala mane mulilo wakasika ku-Medeba.

31Aboobo ba-Israyeli bakakala munyika yaba-Amori. 32-Lino Musa wakatuma bantu kuyootwela Jazeri. Nkabela bakatola tunzuunzi twawo akutanda ba-Amori ibakali mulintuto. 33-Mpawo bakapiluka, batola inzila yaku-Basana, nkabela Ogi mwami wa-Basana wakeza kuzoobalwanya abantu bakwe boonse ku-Edrei. 34-Lino Jehova wakaambila Musa kuti, Utamuyoowi pe, nkaambo ndamwaaba mumaanza aako abantu bakwe boonse, anyika yakwe. Uyoomucitila mbubonya mbowakacitila Sihoni mwami wabaAmori iwakakede ku-Hesiboni. 35-Lino bakamujayilila abana bakwe abantu bakwe boonse mane teebakamusiila naba omwe, Elyo bakavuba nyika yakwe.