Search form

Myeelwe 3

Milimo yaba-Levi akubalwa kwabo

1Ngaaya mazyalani aaba-Musa a-Aroni mubuzuba obo Jehova naakaambila Musa mucilundu ca-Sinai. 2-Ngaaya mazina aabana ba-Aroni: mutaanzi ngu-Nadabu, kwatobela Abihu, Eleazara a-Itamara. 3-Mbaakabede mazina aabana ba-Aroni, bapaizi bananike ibakapedwe milimo yabupaizi. 4-Pele Nadabu a-Abihu bakafwa kubusyu bwa-Jehova ciindi eco nibakapaizya mulilo umbi kubusyu bwa-Jehova munkanda ya-Sinai, nkabela teebakajisi bana pe, Lino Eleazara a-Itamara bakali kucita milimo yabupaizi kubusyu bwa-Aroni wisaabo,

5Lino Jehova wakaambila Musa kuti, 6-Leta musyobo wa-Levi, ubaimikizye kubusyu bwa-Aroni mupaizi, kuti bamubelekele milimo. 7-Bamumanine milimo, walo ambungano yoonse, kunembo lyatente lyambunganino, babe balanda bacikombelo. 8Mbembabo beelede kubamba zibelesyo zyoonse zyatente lyambunganino amilimo yabana ba-Israyeli amilimo miyumu yamucikombelo. 9-Pa ba-Levi mumaanza aa-Aroni amumaanza aabana bakwe. Balapedwa limwi mumaanza aakwe kunze lyabana baIsrayeli. 10-Alimwi bika Aroni abana bakwe kuti bacite milimo yabupaizi; na kwasika muntu umbi uleelede kujayigwa.

11Nkabela Jehova wakaambila Musa kuti, 12-Bona! Ndagwisya ba-Levi akati kabana ba-Israyeli, babe mucibaka cabana bataanzi bajalula mulyango wazyalilo akati kabana ba-Israyeli. Ba-Levi balaba bangu. 13-Nkaambo bana bataanzi boonse mbebangu. Mubuzuba obo nindakauma bana bataanzi boonse banyika ya-Egepita ndakalisalazizya bana bataanzi boonse bamuIsrayeli; nibaba bantu nibaba banyama. Mbebangu. Ndime Jehova.

14-Alimwi Jehova wakaambila Musa munkanda ya-Sinai kuti, 15-Bala bana ba-Levi, muziinga zyabo amunzubo zyabo; bana baalumi boonse bali amwezi omwe wakuzyalwa abaindilila abaalumi bapati, boonse babalwe. 16Elyo Musa wakababala, mbubonya mbuli Jehova mbwaakaamba, mbubonya mbwaakalaililwa. 17-Ngaaya mazina aabana ba-Levi: Gerisoni a-Kohati a-Merari. 18-Amazina aabana ba-Gerisoni muziinga zyabo ngaaya: Libni a-Simei. 19Abana ba-Kohati muziinga zyabo mbaaba: Amramu, a-Izara, Hebroni a-Uzieli, 20Abana ba-Merari muziinga zyabo mbaaba: Mali a-Musi. Nzeezyo ziinga zyaba-Levi anzubo zyabo.

21Gerisoni nguwakazyala ciinga caba-Libni aciinga caba-Simei. Nzenzizyo ziinga zyaba-Gerisoni. 22Nkabela mweelwe wabo, nkokuti bana baalumi ibakali amwezi wakuzyalwa abapati boonse baindilila, wakali zyuulu zili musanu azibili amyanda yosanwe. 23-Ziinga zyaba-Gerisoni ziyake zilao zyabo kusule lyacikombelo kumbo. 24Asilutwe waluzubo lwabaGerisoni abe Eliyasafe mwana wa-Layeli. 25-Amilimo yabana ba-Gerisoni mutente lyambunganino njeeyi: cikombelo, atente azivumbilizyo zyalyo, acisitilizyo camulyango watente lyambunganino, 26-amasani aalengelela aalubuwa acisitilizyo camulyango walubuwa luzyunguluka cikombelo acipaililo, antambo zyalo—milimo yoonse yazeezyo njiyabo.

27-Kohati nguwakazyala ciinga caba-Amrami, aciinga caba-Izara, aciinga caba-Hebroni, aciinga caba-Uzieli. Nzenzizyo ziinga zyaba-Kohati. 28Nkabela mweelwe wabo, nkokuti bana baalumi boonse bali amwezi wakuzyalwa abapati baindilila, wakali zyuulu zili musanu azitatu amyanda iili musanu aumwi; boonse bakali kucita milimo yacikombelo. 29-Ziinga zyabana ba-Kohati bayake zilao zyabo kumbali lyacikombelo kulubazu lwakumusanza. 30Silutwe waluzubo lwaziinga zyaba-Kohati abe Elizafana mwana wa-Uzieli. 31-Amilimo yabo njeeyi: ibbokesi lya-Leza, antafule, aciimikilo camalampi, azipaililo, azibelesyo zyacikombelo zibelesegwa mumilimo yabupaizi, acisitilizyo-milimo yoonse yazeezyo njiyabo. 32-Nkabela Eleazara mwana wa-Aroni mupaizi abe mupati wabasilutwe baba-Levi, alange abo bacita milimo yacikombelo.

33-Merari nguwakazyala ciinga caba-Mali aciinga caba-Musi. Nzenzizyo ziinga zyaba-Merari. 34-Nkabela mweelwe wabo, nkokuti bana baalumi bali amwezi wakuzyalwa abapati baindilila, wakali zyuulu zili musanu acimwi amyanda yobile. 35Silutwe waluzubo lwaziinga zyaba-Merari abe Zuriyeli mwana wa-Abihaili. Bayake zilao zyabo kumbali lyacikombelo kulubazu lwakunyika. 36-Nkabela milimo yabana ba-Merari njeeyi: minsende yacikombelo, aminkulu yaco, amisumpululu yaco, azikazikilo zyaco, azibelesyo zyaco zyoonse, amilimo yaco yoonse, 37azyalo zyaanzikilo zizyunguluka lubuwa, azikazikilo zyazyo amanembe aazyo antambo zyazyo,

38-Abaabo bayaka zilao zyabo kunembo lyacikombelo kulubazu lwakujwe, kunembo lyatente lyambunganino kubuzwezuba, babe Musa a-Aroni abana bakwe bacita milimo yacikombelo, bacitile bana ba-Israyeli milimo, Muntu umbi uusika afwaafwi uleelede kujayigwa. 39-Lino ba-Levi boonse ibakabalwa, mbebakabala ba-Musa a-Aroni kukulailila kwa-Jehova, muziinga zyabo, bana baalumi boonse ibakali amwezi wakuzyalwa abapati baindilila, bakali zyuulu zili makumi obile azibili.

40Lino Jehova wakaambila Musa kuti, Bala boonse bana baalumi bataanzi akati kabana ba-Israyeli, bana boonse bali amwezi wakuzyalwa abaindilila, akulemba mweelwe wamazina aabo. 41-Lino uleelede kundibwezela ba-­Levi ndime Jehova mucibaka cabana bataanzi boonse babana ba-Israyeli aŋombe zyaba-Levi mucibaka cabana bataanzi baŋombe zyabana ba-Israyeli. 42Mpawo Musa wakabala bana bataanzi boonse akati kabana ba-Israyeli mbubonya mbuli Jehova mbwaakamulailila. 43Nkabela mweelwe wabana baalumi bataanzi, boonse ibakabalwa, nkokuti bana bali amwezi wakuzyalwa abaindilila, wakali zyuulu zili makumi obile azibili amyanda yobile amakumi aali musanu aabili abatatu.

44Elyo Jehova wakaambila Musa kuti, 45-Bweza ba-Levi mucibaka cabana bataanzi akati kaba-Israyeli, aŋombe zyaba-Levi mucibaka caŋombe zyabo, Lino ba-Levi babe bangu. 46-Akukunununa abo bantu bali myanda yobile amakumi aali musanu aabili abatatu, nkokuti mweelwe wabana bataanzi baba-Israyeli uuindilila mweelwe waba-Levi, 47-uleelede kutambula cipanzi casanu casyekeli kumuntu umwi aumwi, (nkokuti isyekeli lyacikombelo, isyekeli lili amagera aali makumi obile), 48nkabela ayo mali aakununuzya bantu baindilila apegwe Aroni abana bakwe. 49-Lino Musa wakatambula mali aalununuko lwabaabo ibakaindilila abo ibakanununwa aba-Levi; 50-wakatambula mali kumaanza aabana bataanzi baba-Israyeli, masyekeli aali cuulu amyanda yotatwe amakumi aali musanu alimwi amusanu, mbubonya mbuli masyekeli aacikombelo. 51Nkabela Musa wakapa ayo mali aalununuko kuli-Aroni abana bakwe, mbubonya mbuli ijwi lya-Jehova, Jehova ndyaakalailila Musa.