Search form

Myeelwe 9

Ba-Israyeli mbubakalya Pasika munkanda

1-Lino Jehova wakaambila Musa munkanda ya-Sinai mumwaka wabili wakuzwa munyika ya-Egepita, mumwezi mutaanzi, wati, 2-Bana ba-Israyeli balye ipobwe lya-Pasika kuciindi calyo ceelede. 3Mubuzuba bwakumi aane bwamwezi uno, kuciindi cagoko, amulye ipobwe kuciindi calyo ceelede, mbubonya mbuli milao yalyo yoonse ambeta zyalyo zyoonse. 4Mpoonya awo Musa wakaambila bana ba-Israyeli kuti balye Pasika. 5-Nkabela bakalya Pasika mumwezi mutaanzi, mubuzuba bwakumi aane bwamumwezi, ciindi cagoko, oko kunkanda ya-Sinai; mbubonya mbuli Jehova mbwaakalailila Musa mbubonya obo ba-Israyeli mbubakacita.

6-Pele kakuli bamwi bantu ibakasofweede nkaambo kakuguma mutunta, aboobo bakakacilwa kulya Pasika mubuzuba obo, Aba bantu bakaswena kuli ba-Musa a-Aroni mubuzuba obo mbubonya, 7-bati, Tulisofweede nkaambo kakuguma mutunta; sa ncibotu kuti tukasigwe kuletela Jehova cituuzyo akati kabana ba-Israyeli kuciindi ceelede? 8-Nkabela Musa wakavuwa kuti, Amulindile, kuti mvwe na Jehova ulalailila buti aandinywe.

9Lino Jehova wakaambila Musa kuti, 10Ambila bana ba-Israyeli kuti, Kufumbwa muntu akati kanu na akati kabana banu uusofweede nkaambo kamutunta, nanka uuli mulweendo, alye ipobwe lya-Pasika lya-Jehova. 11-Alye ipobwe mumwezi wabili, mubuzuba bwakumi aane bwamumwezi, kuciindi cagoko. Balilye azinkwa zitakwe bumena azisyu zilula. 12-Batasyaazyi imbutikwa mane kusikila cifumo pe, alimwi mutatyoli cifuwa neciba comwe. Babambe Pasika mbubonya mbuli milao yalyo yoonse. 13-Muntu uutasofweede uutali mulweendo, na wacelwa kulya ipobwe lya-Pasika, oyo muntu ulatandwa muciinga cakwe. Mbuli mbwaakacelwa kuleta cituuzyo ca-Jehova kuciindi ceelede, oyo muntu ulapegwa mulandu. 14-Nkabela na kuli mweenzu uukalakala akati kanu uuyanda kulya ipobwe lya-Pasika lyaJehova, alye mbubonya mbuli milao yalyo ambeta zyalyo, Kulaba mulao omwe buyo kubantu boor se, nebaba bazyalwa micusi nebaba bazwakule.

Ijoba lyakuvumbilila cikombelo

15-Lino mubuzuba obo cikombelo necakayakwa, ijoba lyakavumbilila cikombelo, itente lyambunganino, nkabela kuciindi cagoko lyakali mbuli mulilo atala lyacikombelo mane kubucedo. 16-Mbucakabede lyoonse. Ijoba lyakali kucivumbilila isikati, acintu cibaanga mulilo masiku. 17-Nkabela kufumbwa ciindi ijoba nelyakaumbuluka kuzwa atala lyatente, bana ba-Israyeli bakalonga, alimwi ijoba mpolyakaboolela kukala, mpoonya awo ba-Israyeli mpobakayaka zilao zyabo. 18-Kumulomo wa-Jehova bana ba-Israyeli bakali kweenda, akumulomo wa-Jehova bakali kulyokezya. Mazuba oonse ijoba nelyakacikede acikombelo, bakacilikede abalo. 19Na ijoba lyakasyaala atala lyacikombelo mazuba manji, bana ba-Israyeli bakabamba imbeta zya-Jehova, kabateendi nee. 20-Alimwi cimwi ciindi ijoba lyakalikede atala lyacikombelo mazuba mace buyo; lino kumulomo waJehova bakalikede mumalabba, alimwi kumulomo wa-Jehova bakeenda. 21-Cimwi ciindi ijoba lyakakala kuzwa kumabbililo kusikila kubucedo, lino ijoba nelyakaumbuluka cifumofumo bakeenda, Alimwi na lyakasyaala buzuba boonse, isikati amasiku, kufumbwa ciindi nelyakaumbuluka bakatalika kweenda. 22-Kufumbwa ciindi, naaba mazuba obile nuuba mwezi naaba mazuba manji loko, ijoba nelyakakede atala lyacikombelo, bana ba-Israyeli bakalikede mumalabba aabo, kabateendi pe, Nelyakaumbuluka buyo bakeenda. 23-Kumulomo wa-Jehova bakayaka zilao zyabo, akumulomo wa-Jehova bakeenda. Bakabamba imbeta zya-Jehova, mbubonya mbuli Jehova mbwaakalailila kumulomo wa-Musa.