Search form

Room int

O kiun vëh eꞌ o kiun pe Pöl neꞌ to kiun ke ra napan va po vaman varih to teꞌ voh ne Room. E Pöl to kiun o puk vëh eꞌ he teꞌ non Körin. Pareꞌ vahik, ko heꞌ e köövo ne to pokaꞌ voh ne e Fibiꞌ. Keꞌ teꞌ o kiun pamëh manuh pa vöön apuh va Room manih pa muhin va Italiꞌ. Manuh Room to teꞌ voh non a teꞌ sunön apuh pa napan va Room, a ëhnaneah e Sisaꞌ. A vöön apuh pamëh to apuh oah non a ma meh vöön va pa muhin va Italiꞌ.

E Pöl to iu vavaasis non raoe pan, ea a napan kurus to nok voh ee pa taate hat pa matan e Sosoenën. Ivëhkëk, ea to hikta antoen no a tavus vavih pa ma kiu koman pea me a ma taateꞌ vih pea. E Sosoenën se nok a ra ka tavus vavih ko ihan anoe këh en pea pa ma taateꞌ hat pea, pa ö na se keh vaman varoe kuru e Ieesuꞌ Kristo.

E Pöl to iu nö voh non Room pa vakikis a napan va po vaman to teꞌ ne nën manih pa kiu peꞌ pa vatvus a soe. A napan va po vaman poë varih, a ma paeh va pee, ro Jiuꞌ, ka ma meh voh ro Grik. Manih po kiun vëh neꞌ to vavaato suk non a ma vavih peꞌ me o vaꞌaus neꞌ to kon.

A ma kiun varih to tataki va ne manih pan.

A ma potan avih me a ma kokoman va po kiun vëh. 1:1-17

Ea kurus a napan no a ma taateꞌ pea to hat, ivëh ka se taum o kamis manih pe Sosoenën. 1:18-32; 2:1-29; 3:1-20

Ea to hikta onöt no a taum koe in a kiu va pa ö ne Sosoenën to kon hah a ra manih pa pënton a ma soe vapenpen. Ea se taum koe varoe pa ö ne ea se vaman e Ieesuꞌ Kristo. 3:21-31; 4:1-25

Manih pa vatös pea me Kristo ea se taum o toꞌtoꞌ voon me o toꞌtoꞌ tamoaan. 5:1-21; 6:1-23; 7:1-25; 8:1-39

A napan va Israel ivarih to koe voh ee pe Sosoenën, ivëhkëk, amot neꞌ se nok raoe kee hah ee manuh po kum peꞌ. 9:1-33; 10:1-21; 11:1-36

A ma taateꞌ totoopin, ne ea a napan va po vaman se suksuk no. 12:1-21; 13:1-14; 14:1-23; 15:1-13

O iu pe Pöl, me a soe ataaton peꞌ, me a soe vakikis peꞌ. 15:14-33; 16:1-27