Search form

GENESA int

Buku yo rhanga ya Bibele yi vuriwa “Genesa”, hileswaku “Masungulo”, hikuva yi vulavula hi ta ku tumbuluxiwa ka swilo hinkwaswo, ni ta vanhu vo sungula, ni ta masungulo ya rixaka ra Vaisraele.

Xiyenge xo sungula xa buku (1-11) xi ni timhaka leti landzelaka: Ta ku tumbuluka ka tilo ni misava; ta ku hambana ka munhu ni Muvumbi wa yena, swi nga leswi vangeke vudyoho, maxangu ni rifu; ta Nowa ni ndhambi ya mati; ta xihondzo xa Babele ni ku hangalaka ka vanhu ematikweni.

Xiyenge xa vumbirhi xa Genesa (12-50), xi hlamusela matimu ya vatata wa Vaisraele, a nga Abrahama muhlawuriwa wa HOSI la tshembisiweke tiko ni vatukulu; na Isaka n'wana wa yena; na Yakobo ntukulu wa yena; ni vana va Yakobo va 12, varhangeri va tinyimba ta Israele. Eka timhaka ta vana va Yakobo, buku ya Genesa yi heta hi ku hi byela ta Yosefa, ku tsongahatiwa ka yena ni ku tlakusiwa ka yena, ni hilaha a nga vitana tata wa yena ni vamakwavo hakona, a va nyika vutshamo etikweni ra Egipta.

Vatsari va buku ya Genesa va komba vapfumeri vumbhoni lebyinene ehenhla ka makungu ni matirhele ya Xikwembu lexi hanyaka, muendli ni muhlayisi wa hinkwaswo, muavanyisi ni muponisi wa vanhu hinkwavo.

Tinhloko-mhaka Kavanyisa

Masungulo ya hinkwaswo (1 – 11)

Xikwembu xi tumbuluxa tilo ni misava 1 – 2

Vanhu va hambana ni Muvumbi, va tivangela rifu 3 – 4

Vatukulu va Adamu ku ya fika eka Nowa 4 – 5

Ta Nowa ni ndhambi ya mati 6 – 9

Vanhu va andza. Ta xihondzo xa Babele 10 – 11

Vatata wa Vaisraele (12 – 36)

Xikwembu xi vitana Abrahama, xi n'wi katekisa — Abrahama a ringiwa 12 – 18; 20

Ta Sodoma na Gomora 19

Ta ku velekiwa ka Isaka ni ku fa ka Sara 21 – 23

Ta Isaka na Rhaveka, ni ku fa ka Abrahama 24 – 26

Ta Yakobo, ku baleka ni ku vuya ka yena 27 – 35

Vatukulu va Esawu 36

Ta Yosefa ni vamakwavo (37 – 50)

Yosefa a tsongahatiwa a tlhela a tlakusiwa 37 – 41

Ta ku ringiwa ka vamakwavo va Yosefa 42 – 45

Va ka Yakobo va ya aka etikweni ra Egipta 46 – 50

BIBELE Mahungu Lamanene

© 1989 Bible Society of South Africa. Used by permission. All rights reserved.

More Info | Version Index