Search form

Matayu 15

Tutuuŋ to Maaron iliiv tutuuŋ to Yuda timbuzŋa

[Mk 7:1-13]

1Saawe tana, zeran tutuuŋa siriv tomania zeran ŋgara siriv to tutuuŋ tipul Yerusalem, ve tila tivot to Yesu, ve tighasoni tighe: 2“Muuŋ ve ilam aazne, iit Yuda tabesbees pa Maaron itaghon tutuuŋ tau timbuunŋa titaghoni. Puughu mindai ta mbiwa tsio timalaaŋ pa tutuuŋ tawe? Ughita. Yes timin nimazi mako, ve rekia mon tigham aniiŋ gha tighan.” Lu 11:38

3Yesu iyol aliŋazi ighe: “Ve yam paam, puughu mindai ta apariaaŋ katin tutuuŋ to timbumimŋa, ve amamalaaŋ pa tutuuŋ to Maaron? 4Aghita. Maaron ighur tutuuŋ tauvene:

‘Matam loŋloŋai pa tamam gha tinam, ve utandagh pazi.’

Ve ‘isaav ighe tamtamon eta isik saveeŋ saghati pa taama ma tiina, i aat imaat.’Igham 20:12; 21:17

5-6“Eemon yam asavsaav tauvene: ‘Ighe tamtamon eta le gabua to iuul taama ma tiina pani, eemon igham pazi mako, ve isaav pazi ighe: ‘O, gabua tane, yau irau nagham payam mako. Pa ene nawaat Maaron pani wa.’ Ighe tamtamon eta igham tauvene, ve murei itoor ŋgar tooni ve ighe igham gabua tana pa taama ma tiina imin pakuruuŋ zi, na yam aŋgalsekini aghe i igham tauvene sov. Tauvene tutuuŋ tau timbumimŋa tigham payam ve aazne ataghoni, ene igham gham atatan Maaron saveeŋ tooni izi imin kaut sorok. 7Yam zeran to karom. Apapamir taumim pa ghuruuŋ ila tsiam! Muuŋ, propet Isaia ivotia Maaron aliiŋa ziiri ee tau iduduuŋ kat pa ŋgar tau yam aghamghamu na. Isaav tauvene:

8‘Zeran tane tipapait ghau sorok pa avozi uuli mon.

Eemon lolozi, ene igheen malau kat payau.

9Saveeŋ ve tutuuŋ katini tau tipaduduuŋ tamtamon pani, ene itaghon ŋgar tsiau mako. Itaghon ŋgar to tamtamon mon.

Tauta suŋuuŋ ve besooŋ toozi tau monmon tighamgham payau ne, imin kaut sorok, ve le anooŋa mako.’ ”Is 29:13; Kol 2:20+; Tit 1:14

Gabua tau igham tamtamon tisaghat ila Maaron maata

[Mk 7:14-23]

10Yesu isavsaav tomani zi le isov, ra ipoi eval tiina tilam, ve isaav pazi ighe: “Alooŋ saveeŋ tane, ve agham ŋgar pani poi. 11Gabua tau iloŋ ila tamtamon avozi ve izila apozi, eta irau igham zi tisaghat ila Maaron maata ne mako. Ŋgar sasaghati tau igheen ila tamtamon lolozi ve tisavia ivot pa avozi, tauta igham zi tisaghat ila Maaron maata.” Mt 12:34; 1Tim 4:4

12Yesu isavia saveeŋ tane le isov, ra mbiwa tooni tila tipaes pani tighe: “Yo uwatagh, ma mako? Zeran tutuuŋa tilooŋ saveeŋ tsio tana le irau lolozi mako.”

13-14Eemon Yesu iyol aliŋazi ighe: “Matamim ila pazi sov. Gabua naol isov tau Tamaŋ tau ileep sambam ivazogh zi mako, ene pale tikuruv zi tomania wariazi, ve tisik zi tilalez. Zeran tawe, yes timin tamtamon matazi kumkuuma tau tighe titotoi eez pa zetazŋa siriv tau matazi kumkuuma paam. Eemon isaav ighe ŋeer eta tau maata kumkuuma na, igherev iitete ite tau maata kumkuuma paam ve itotoi eez pani, ene pale yesuru ve titap tizila puura.” Mt 23:16,24; Lu 6:39; Ro 2:19

15Petrus ilooŋ saveeŋ tane, ve ighason Yesu ighe: “Irau upaghazoŋai saveeŋ palelaaŋ tsio tane puughu payei?”

16Yesu iyol aliiŋa ighe: “Wai, yam paam lemim ŋgar mako? 17Aghilaal soone? Gabua naol isov tau iloŋ ila tamtamon avozi, ene izila pa apozi mon, ve malau mako timbeghazi gha ilale. 18Eemon saveeŋ tau tisavia ivot ila avozi, ene itotoi ŋgar saghati tau igheen ila lolozi. Ŋgar toozi tawe, ta igham zi tisaghat ila Maaron maata.

19Pasaa, ŋgar sasaghati tau igheen ila tamtamon lolozi, tauta ipapaburigin zi gha tigham ŋgar sasaghati naol imin: tirav tamtamon timaat, tivaghamunia vaiŋ, tighur boog, tium, tipariaaŋ saveeŋ karom, ve tisik saveeŋ saghati pa zetazŋa ve Maaron paam. Gnp 8:21; Mt 12:34

20Ŋgar sasaghati tauvene, ta igham tamtamon tisaghat ila Maaron maata. Tauta isaav ighe tamtamon eta imin niima mako, ve igham aniiŋ gha ighan, ene irau ighamu isaghat ila Maaron maata mako.”

Kanaan tinazi ee ighur ila to Yesu ariaaŋ

[Mk 7:24-30]

21Yesu ipaburigin laghooŋ tooni muul, ipul nugh tawe, ve ilaagh ila ivot taan sirivu tau nugh tintiina ru, Tiro ve Sidon, tigheen ila. 22Malau mako ve Kanaan tinazi ee to nugh tawe iŋarui Yesu ila, ve itaŋ raraini toman aliiŋa tiina ighe: “Tiina, yo David Naatu. Lolom raa, isaghatin ghau ve uul ghau! Pa avuvu saghati izeev natugliva le isaghat kat.”

23Eemon Yesu iyol aliiŋa rigta mako. Ineneeŋ mon. Livaa tawe inoknok ghasoniiŋni. Tauvene mbiwa tooni tila tisaav pani tighe: “Livaa tau ipoipoi ve itataghon ghiit ne, uziire ila!”

24Yesu iyol aliŋazi ighe: “Tamaŋ Maaron imbaaŋ ghau nalam pa tamtamon tooni to Israel mon. Pasaa, yes timin sipsip tau tighau pa ŋginiiŋ toozi, ve tila tisagsag pa su loolo.” Mt 10:6

25I isavsaav, ve livaa tana iŋaruini ila igharau, iput aaghe izi Yesu naagho, ve isaav pani muul ighe: “Tiina, uul ghau lak!”

26Yesu isaav pani tauvene: “Isaav ighe tasan aniiŋ to yes geegeu, ve tasiki rekia mon ila ŋgavuun tighani, ene iduduuŋ mako.” +

27Livaa tana iyol aliiŋa ighe: “Tiina, aliŋam poia. Eemon ŋgavuun paam tisasaŋan. Isaav ighe ŋgavuun tauŋa tighanghan, ve aniiŋ ŋgirŋgiira titaptap izi taan, ene imin ŋgavuun lezi to tighan.”

28Yesu ilooŋ saveeŋ tana, ve isaav pani muul ighe: “Aa livaa, ghuruuŋ ila tsio tiina kat! Tauvene gabua tau yo lolom pani, ene aat ivot payo.” Saawe duduuŋ tana, avuvu saghati ighau pa livaa tana natliva ve tiini poia. Mt 8:10,13

Yesu igharaat moroghooŋa katini

29Yesu ipul nugh tawe, ve ila ivot yaa naliu Galilaia muul. Ra ilaagh itaghon nari gha izala pa loloz ee, ve mboole izi ta sewe. Mk 7:31

30Malau mako ve eval tiina kat tiyau moroghooŋa toozi katini gha tila tooni. Siriv narape, siriv matazi ikumkuum, siriv avozi ivool, ve moroghooŋa siriv paam. Zetazŋa tighur zi tizi Yesu aaghe puughu, ve i igharaat zi tisov tinizi poia. Is 35:5-6

31Eval tiina tighita gabua ŋgereeta tawe le tirur pani. Pasaa, tighita yes tau avozi ivool na, tisavsaav. Ve yes narapeŋa tinizi poia muul ve tilaghlaagh. Ve yes tau matazi ikumkuum na, matazi poia ve tighita nugh. Tauvene tipakur Maaron to Israel pa tapiri ve poia tooni. Mk 7:37

Yesu ipan tamtamon ndiŋndiŋ ndiŋndiŋ paaŋ (4000)

[Mk 8:1-10]

32Yesu tomania eval tiina tana tilepleep, ve ipoi mbiwa tooni tilam, ve isaav pazi ighe: “Yau lolog isaghatin eval tiina tane. Pasaa, itiŋa takaria lepoogh gha mboŋ imin tol wa. Ve lezi aniiŋ eta to tighan mako. Yau lolog pa naziir zi tila toman pitool zi mako. Pale tapirizi isov, ve matazi ililiit izi eez livuugha.” Mt 14:14

33Mbiwa tooni tisaav pani tighe: “Wai, ene taleep nugh ŋginaaŋa. Pale tagham aniiŋ sindei tau irau eval tiina tane?”

34Tauvene Yesu ighason zi ighe: “Mberet tsiam piiz ighengheen?”

Yes tiyol ghasoniiŋ tooni tighe: “Liim ve ru. Ve iigh geegeu siriv paam.”

35Ra Yesu isaav pa eval tiina mbolezi izi taan, 36ve igham mberet liim ve ru tomania iigh siriv tawe, ve ipait Maaron pani. Isuŋ le isov ra iteeva, ve ighuru ila to mbiwa tooni, ve anazi tighamu tila, ve tireii pa eval tiina. 37Yes tisov tighan le apozi isuŋ. Ve avozi muuri tau izi na, mbiwa tooni tigooga, ve tinonogh zi tila nakaral tintiina liim ve ru le tivoniir. 38Eval tiina tau tighan aniiŋ tana, zitamoot mon irau ndiŋndiŋ ndiŋndiŋ paaŋ (4000) ma vene. Ve zilivaa tomania natuzŋa, tinin zi mako.

39Tighan le isov, ve Yesu ighur zi timuul tila pa nugh toz toz. Ra yesŋa mbiwa tooni tipul loloz, ve tizila muul nari gha tizaa waaŋ toozi, ve tiraav tila tivool pa taan sirivu to Magadan.

Maaron Saveeŋ Tooni Patabuyaaŋ

© 2011, Wycliffe Bible Translators, Inc. All rights reserved. More Info | Version Index