Search form

لوقا 21

21‏-نجی باب

دول آیالینگ صاداقاسی

مَرقُس 12‏:41‏-44

1عیسی قاباغینی قالدیریپ گُزَنده، بایلارینگ عیباداتخانانینگ خازیناسینا اُز صاداقالارینی آتیپ دورانینی گُردی.‏ 2اُل بیر قاریپ دول آیالینگ هِم خازینا ایکی کیچی سِکّه آتانینی گُردی.‏ 3عیسی:‏ ‏«‏سیزه دُغروسینی آیدیارین، بو قاریپ دول آیال هِمّه‌لِردِن کَن آتدی.‏ 4بو آداملارینگ هِمّه‌سی خازینا اُزلِریندِن آرتانی آتدیلار، بو آیال بُلسا قاریپلیغینا گُزلِمِدِن، بار-یُغونی، اِلیندَکی هِمّه بار پولونی آتدی»‏ دییدی.‏

عیسی مسیحینگ اُورولیپ گِلمِگینینگ عالاماتلاری

مَتّیٰ 24‏:1‏-21، 29‏-35؛ مَرقُس 13‏:1‏-19، 24‏-31

5شَگیرتلِردِن کَبیری عیباداتخانانینگ عجاییپ داشلار هِم خودایا باغیش اِدیلِن صاداقالار بیلِن بِزِلِندیگی بارادا سُز آچدیلار.‏ شُندا عیسی:‏ 6‏«‏شِیله بیر گونلِر گِلِر، شُندا بو یِرده داش اوستونده داش قالماز، گُریَن زاتلارینگیزدان هیچ زات قالمان، هِمّه‌سی دارغار»‏ دییدی.‏ 7اُندان:‏ ‏«‏اُستاد!‏ بو زاتلار هاچان بُلار؟ بولارینگ بُلجاق ماحالیندا نَهیلی عالامات گُرونِر؟»‏ دیییپ سُرادیلار.‏ 8اُل:‏ ‏«‏خاباردار بُلونگ، هیچ کیم سیزی آلدایماسین!‏ اِنچِمه‌لِر ‏”‏شُل قاراشیانینگیز — مِندیرین!‏“‏ و ‏”‏واقت قُلایلادی!‏“‏ دیییپ، مِنینگ آدیم بیلِن گِلِرلِر.‏ اُلارینگ ایزینا دوشمَنگ.‏ 9اوروشلار هِم قالماغالّار بارادا خابار اِشیدِنینگیزده قُرقمانگ.‏ بو زاتلار اُوونچَک بُلمالیدیر، اِمّا هِنیز دونیَه‌نینگ آخیری دَلدیر»‏ دیییپ جُغاپ بِردی.‏

10سُنگرا عیسی اُلارا شِیله دییدی:‏ ‏«‏میلِّت-میلِّته و پاتیشاهلیق-پاتیشاهلیغا قارشی چیقار.‏ 11آیری-آیری یِرلِرده گویچلی یِر تیترِمِلِر، آچلیق هِم یُغوشیان مِریضچیلیکلِر، قُرقونچ واقالار، آسماندان اولی عالاماتلار بُلار.‏

12‏«‏اِمّا بو واقالارینگ هِمّه‌سیندِن اُوال، سیزی ایزارلاپ، آزار بِرِرلِر.‏ سیزی اَکیدیپ، کِنیسه‌لِره بِریپ و زیندانلارا زینگارلار.‏ مِن سِبَپلی سیزی پاتیشاهلارینگ، حُکومدارلارینگ حوضورینا اِلتِرلِر.‏ 13بو بُلسا شاهاتلیق اِتمِک اوچین سیزه بیر فورصات بُلار.‏ 14اِمّا سیز اُزونگیزی نَهیلی قُراجاقدیغینگیزی اُووندِن قایغی اِتمِزلیگی یورِگینگیزه دووونگ.‏ 15مونونگ اوچین مِن سیزه سُز هِم عاقیلدارلیق بِرِرین.‏ سیزه قارشی چیقیانلارینگ هیچ بیری مونگا نه قارشی دوروپ بیلِر، نه-ده بیر زات آیدیپ بیلِر.‏ 16سیزه اِنه-آتانگیز، دُغانلارینگیز، قارینداشلارینگیز، دُستلارینگیز هِم خایینلیق اِدِرلِر، کَبیرینگیزی اُلدورِرلِر.‏ 17مِنینگ آدیم سِبَپلی هِمّه‌لِر سیزی ییگرِنِر.‏ 18اِمّا ساچینگیزینگ بیر قیلی هِم کِمِلمِز.‏ 19جیداپ دورونگ، شُندا جانینگیزی نِجات بِرِرسینگیز.‏

20‏«‏قُشونلارینگ اورشلیمی قاباندیغینی گُرِن واقتینگیز، اُنونگ وِیران اِدیلجِک واقتینینگ قُلایلاندیغینی بیلینگ.‏ 21شُندا یهودیه‌دَکیلِر داغلارا قاچسین، شَهرینگ ایچیندَکیلِر چیقسین، تُوِرِگیندَکیلِر شَهره گیرمِسین.‏ 22سِبَبی شُل گونلِر هِمّه یازیلانلارینگ بِرجای بُلماغی اوچین جِزا گونلِریدیر.‏ 23اُل گونلِرده گُورِلی آیالّارینگ و چاغا اِمدیریَنلِرینگ وای گونونه!‏ سِبَبی یوردا اولی بِلا-قاضالار اینِر، بو خالق غاضابا دوچار بُلار.‏ 24اُلار قیلیچدان گِچیریلِر، اِسیر آلنیپ، هِمّه میلِّتلِرینگ آراسینا تَبعید اِدیلِر.‏ بیگانه میلِّتلِر اُزلِرینینگ زامانی دُلیانچا، اورشلیمی یِر بیلِن یِکسان اِدِرلِر.‏

25‏«‏گونده، آیدا و ییلدیزلاردا عالاماتلار گُرونِر.‏ یِر یوزونده میلِّتلِر دِریا هِم مُوجلِرینگ جُشوپ و سِسلِنِن سِبَپلی راحاتسیز بُلوپ، باشاغایلیغا دوشِرلِر.‏ 26آداملار قُرقودان، دونیَه‌نینگ باشینا گِلیَن بِلالارا قاراشماقدان یانگا هوشلارینی ییتیرِر، سِبَبی آسمانینگ قودراتلاری تیترِشِر.‏ 27شُندا اُلار اینسان اُغلونینگ بولوتدا قودرات هِم اولی بِییکلیک بیلِن گِلیَنینی گُرِرلِر.‏ 28بو زاتلار یِرینه یِتیپ باشلاندا، باشینگیزی قالدیریپ، یُقاری باقینگ، سِبَبی نِجات تاپماغینگیز قُلایلاپ گِلیَندیر.‏»‏

29عیسی اُلارا بیر میثال آیتدی:‏ ‏«‏اینجیره و هِمّه باغلارا باقینگ.‏ 30اُلارینگ یاپراقلاندیغینی گُروپ، تُمسونگ قُلایلاندیغینی اُز-اُزونگیزدِن بیلیَرسینگیز.‏ 31شُنونگ یالی هِم، بو واقالارینگ بُلانینی گُرِنینگیزده، خودایینگ پاتیشاهلیغینینگ قُلایلاندیغینی بیلینگ.‏ 32سیزه دُغروسینی آیدیارین، بو زاتلارینگ هِمّه‌سی بُلیانچا، بو نِسل دونیَه‌دِن اُتمِز.‏ 33آسمان هِم یِر اُتِر، یُنه مِنینگ سُزلِریم آصلا اُتمِز.‏

34‏«‏خاباردار بُلونگ!‏ عایشی-عِشرِت، سِرخُشلیق، یاشایشینگ قایغیلاری یورِگینگیزه یِرلِشمِسین.‏ یُغسام، اُل گون دوزاق کیمین بیردِن اوستونگیزدِن اینِر.‏ 35چونکی اُل گون تامام یِر یوزونده یاشایانلارینگ هِر بیرینینگ اوستوندِن اینِر.‏ 36بو بُلجاق واقالارینگ باریندان قاچیپ نِجات تاپار یالی و اینسان اُغلونینگ حوضوریندا دوروپ بیلِر یالی، هِمیشه اُیا بُلوپ، خودایا دُغا اِدینگ.‏»‏

37عیسی گوندیزلِرینه عیباداتخانانینگ حایاطیندا خالقا اُورِدِردی، گیجه‌لِرینه بُلسا شَهردِن داشاری چیقیپ، زِیتون داغیندا گِچیرِردی.‏ 38اِرتیر ایردِن هِمّه خالق اُنونگ گورّونگلِرینی دینگلِمِک اوچین عیباداتخانا گِلِردی.‏

مُقادِّس کیتاب

© 2016,Turkmen Truth. All rights reserved



More Info | Version Index