Search form

مَرقُس 2

2‏-نجی باب

عیسی فِلِجی شِفا بِریَر

مَتّیٰ 9‏:1‏-8؛ لوقا 5‏:17‏-26

1عیسی بیرنَچه گوندِن سُنگ کَفَرناحوما قایدیپ گِلِنده، اُنونگ اُیدِدیگی باراداقی خابار یایرادی.‏ 2شُندا اُل یِره شِیله بیر کَن آدام اویشدی، حتّیٰ قاپینینگ آغزیندا دورماغا-دا یِر یُقدی.‏ عیسی اُلارا خودایینگ خوش خابارینی واغیظ اِدیَردی.‏ 3شُل واقت دُرت آدام بُلوپ اُنونگ یانینا بیر فِلِجی گُتِریپ گِتیردیلِر.‏ 4آداملاردان یانگا تیغین-تیغین دُلودیغی اوچین، اُلار عیسانینگ یانینا یاقینلاشیپ بیلمِدیلِر.‏ شُنونگ اوچین اُلار عیسانینگ بُلیان جایینینگ بامینی سُکوپ، فِلِجی دوشِگی بیلِن دِشیکدِن آشاق سالّادیلار.‏ 5عیسی اُلارینگ ایمانینی گُروپ، فِلِجه:‏ ‏«‏اُغلوم، سِنینگ گونَه‌لِرینگ باغیشلاندی»‏ دییدی.‏ 6اُل یِرده اُتوران دین عُلَمالارینگ کَبیری ایچیندِن:‏ 7‏«‏بو آدام نَمه اوچین بِیله کِپلِیَر؟ اُل خودایا دیل یِتیریَر!‏ گونَه‌لِری یِکه خودایدان باشغا کیم گِچیپ بیلِر؟»‏ دیییپ فیکرلِندیلِر.‏ 8عیسی دِرِّو اُلارینگ نَمه فیکر اِدیَندیگینی روحوندا دوشونوپ:‏ ‏«‏نَمه اوچین یورِگینگیزَه بِیله فیکرلِر گِتیریَرسینگیز؟ 9فِلِجه هایسینی آیتماق آنگسات:‏ ‏”‏گونَه‌لِرینگ باغیشلاندی“‏ دییمِکمی یا-دا ‏”‏تور، دوشِگینگی آل-دا، یُری“‏ دییمِک؟ 10اِمّا سیز اینسان اُغلونینگ یِر یوزونده گونَه‌لِری باغیشلاماغا-دا ایختییارینینگ باردیغینی بیلیپ قُیونگ»‏ دییدی.‏ سُنگرا اُل فِلِجه:‏ 11‏«‏سانگا دیییَرین، تور، دوشِگینگی آل-دا، اُیونگه گیت»‏ دییدی.‏ 12اُل هِم یِریندِن توردی-دا، دِرِّو دوشِگینی آلیپ، هِمّه‌لِرینگ گُزونینگ اُوونده چیقیپ گیتدی.‏ هِمّه‌لِر حایران قالدیلار.‏ اُلار:‏ ‏«‏بیز بِیله زادی آصلا گُرمَندیک»‏ دییشیپ، خودایی اُودیلِر.‏

عیسی لاوینی چاغیریار

مَتّیٰ 9‏:9‏-13؛ لوقا 5‏:27‏-32

13عیسی یِنه دِریانینگ کِنارینا گیتدی.‏ هِمّه حالاییق اُنونگ یانینا گِلدی، اُل هِم اُلارا اُورِتمَگه باشلادی.‏ 14عیسی شُل یِردِن گِچیپ باریارقا، مالییات آلیپ اُتوران حَلفینینگ اُغلی لاوینی گُروپ، اُنگا:‏ ‏«‏مِنینگ ایزیما دوش!‏»‏ دییدی.‏ اُل هِم توروپ، اُنونگ ایزینا دوشدی.‏

15اُل یِرده بیرنَچَه مالییات آلیانچیلار و گونَه‌کَرلِر-ده باردی.‏ بیر گون عیسی لاوینینگ اُیونده ساچاق باشیندا اُتیرقا، اُلار هِم گِلیپ، اُنونگ شَگیرتلِری بیلِن بیرلیکده عیسی بیلِن اُتوردیلار.‏ اُنونگ ایزینا دوشِنلِرینگ سانی قاتی کَندی.‏ 16فَریسی‌لِر+ و دین عُلَمالار عیسانینگ گونَه‌کَرلِر هِم مالییات آلیانچیلار بیلِن ناهار ایییپ اُتورانینی گُرِنلِرینده، اُنونگ شَگیرتلِریندِن:‏ ‏«‏نَمه اوچین اُل مالییات آلیانچیلار و گونَه‌کَرلِر بیلِن ناهار ایییَر؟»‏ دیییپ سُرادیلار.‏ 17عیسی مونی اِشیدِنده، اُلارا:‏ ‏«‏طِبیب ساغ آداملارا دَل-ده، مِریضلِره گِرِکدیر.‏ مِن دُغری آداملاری دَل-ده، گونَه‌کَرلِری توبا چاغیرماغا گِلدیم»‏ دییدی.‏

آرازا توتمالیمی؟

مَتّیٰ 9‏:14‏-17؛ لوقا 5‏:33‏-39

18یحیانینگ شَگیرتلِری و فَریسی‌لِر آرازا توتیاردیلار.‏ کَبیر آداملار گِلیپ، عیسادان:‏ ‏«‏نَمه اوچین یحیانینگ و فَریسی‌لِرینگ شَگیرتلِری آرازا توتیارلار-دا، سِنینگ شَگیرتلِرینگ بُلسا آرازا توتانُق؟»‏ دیییپ سُرادیلار.‏ 19عیسی اُلارا:‏ ‏«‏داماد یانلارینداقا، اُندا-دا طُویونگ میهمانلاری آرازا توتیارلارمی نَمه؟ یُق، داماد آرالارینداقا، اُلار آرازا توتوپ بیلمِزلِر آخیرین.‏ 20اِمّا داماد اُلاردان آلینجاق گونلِری گِلِر، اینه، شُندا اُلار آرازا توتارلار.‏

21‏«‏هیچ کیم کُنه لِباسا تَزه پارچادان یاما سالماز.‏ یُغسا تَزه یاما کُنه لِباسدان قُپوپ، ییرتیق یِری خاص بیدِرِک بُلوپ گُرنِر.‏ 22هیچ کیم تَزه شِرابی کُنه مِشیکلِره قویماز.‏ یُغسا شِراپ مِشیکلِری بُوسوپ، دُکولِر، مِشیکلِر-ده ضایالانار.‏ تَزه شِراپ تَزه مِشیکلِره قویولیاندیر»‏ دیییپ جُغاپ بِردی.‏

سَبَّت گونی بارادا سُراق

مَتّیٰ 12‏:1‏-8؛ لوقا 6‏:1‏-5

23بیر سَبَّت گونی عیسی بوغدایلیغینگ آراسیندان گِچیپ باریاردی.‏ اُنونگ شَگیرتلِری یُلدا باریارقالار، بوغدای باشلارینی یُلماغا باشلادیلار.‏ 24فَریسی‌لِر عیسی:‏ ‏«‏سِرِت، نَمه اوچین اُلار سَبَّت گونی قاداغان اِدیلِن زادی اِدیَرلِر؟»‏ دییدیلِر.‏ 25- عیسی اُلارا:‏ ‏«‏داوود بیلِن یانینداقیلار آچ هِم مَحتَج قالانلاریندا، داوودینگ نَمه اِدِندیگینی آصلا اُقیمادینگیزمی؟ 26اُل باش کاهینی آبیاتارینگ زاماندا خودایینگ اُیونه گیریپ، کاهینلاردان باشغالارا قاداغان اِدیلِن هُدورلِنِن چُرِکلِرینی اییدی و یانینداقیلارا هِم بِردی»‏ دیییپ جُغاپ بِردی.‏ 27سُنگرا عیسی اُلارا:‏ ‏«‏آدام سَبَّت گونی اوچین دَل-ده، سَبَّت گونی آدام اوچین یارادیلدی.‏ 28شُنونگ اوچین اینسان اُغلی حتّیٰ سَبَّت گونونینگ-ده حُکومداریدیر»‏ دییدی.‏

مُقادِّس کیتاب

© 2016,Turkmen Truth. All rights reserved



More Info | Version Index