Search form

مَرقُس 7

7‏-نجی باب

آدامی نَمه نِجیس اِدیَر؟

مَتّیٰ 15‏:1‏-20

1اورشلیمدِن گِلِن فَریسی‌لِر بیلِن بیرنَچه دین عُلَمالار عیسانینگ داشینا اویشدولِر.‏ 2اُلار عیسانینگ شَگیرتلِریندِن کَبیرینینگ اِلینی یوومان ناهار ایییپ، یهودیلِرینگ سونِّتینی پُزاندیغینی گُردولِر.‏ 3فَریسی‌لِر بیلِن هِمّه یهودیلِر آتا-بابالاریندان قالان سونِّته گُرَه اِلِّرینی قاوی یوومان ناهار اییمِیَردیلِر.‏ 4بازاردان گِلِنلِرینده-ده، یووونمان هیچ زات اییمِیَردیلِر.‏ شِیله-ده کَسه، قاپ-چاناق، میس قازانلاری تَمیزلِمِک یالی سونِّتلِری هِم ساقلایاردیلار.‏ 5شُنونگ اوچین فَریسی‌لِر بیلِن دین عُلَمالار عیسادان:‏ ‏«‏نَمه اوچین سِنینگ شَگیرتلِرینگ آتا-بابالاریمیزدان قالان سونِّته ایزینا دوشمَن، نِجیس اِلِّری بیلِن ناهار ایییَرلِر؟»‏ دیییپ سُرادیلار.‏

6- عیسی اُلارا:‏ ‏«‏اِشعیا پیغامبار، سیز ایکییوزلیلِر حاقدا دُغری نبوّتلیق اِدیپدیر!‏ اُندا شِیله یازیلان:‏

‏”‏بو خالق مِنی دیلینده حُرماتلایار،

اِمّا یورِکلِری مِندِن اوزاقدیر.‏

7بیدِرِک یِره مانگا عیبادات اِدیَرلِر،

تاغلیمات دیییپ اُورِدیَنلِری اینسان دِستورلاریدیر.‏“‏

8سیز اینسان سونِّتلِرینینگ ایزینا دوشوپ، خودایینگ حُکوملِرینی تِرک اِدیَرسینگیز»‏ دییدی.‏

9عیسی یِنه اُلارا شِیله دییدی:‏ ‏«‏اُز سونِّتلِرینگیزی بِرجای اِتمِک اوچین، سیز خودایینگ حُکوملِرینی قاوی اُوِرمِکینگ یُلینی تاپیپ آلیپسینگیز!‏ 10- موسی:‏ ‏”‏اِنه-آتانگا حُرمات قُی“‏، و ‏”‏آتاسینا یا-دا اِنه‌سینه قارغان آدام اُلومه حُکوم اِدیلسین“‏ دیییپ آیدیپدی.‏ 11اِمّا سیز کیمدیر بیری اِنه-آتاسینا:‏ ‏”‏مِن سیزه کُمِک اِدیپ بیلجِک دَل.‏ سیزه بِرمِگی نییِت اِدِن زاتلاریم قربانلیقدیر.‏“‏ قربانلیق یَعنی ‏”‏خودایا صاداقا“‏.‏ 12اُلار خودایا صاداقادیر دیییپ آیداندا، اُنگا اُز اِنه-آتاسینا کُمِک بِرمِگی قاداغان اِدیَرسینگیز.‏ 13شِیدیپ، سیز نِسلدِن-نِسله قالدیریان سونِّتلِرینگیزینگ بیلِن خودایینگ سُزونی پُزیارسینگیز.‏ شونگا مِنگزِش کَن زاتلاری اِدیَرسینگیز.‏»‏

14عیسی جِماغاتی یِنه یانینا چاغیریپ، اُلارا:‏ ‏«‏هِمَّنگیز مِنی دینگلَنگ هِم دوشونینگ.‏ 15آدامینگ ایچینه گیریَن هیچ بیر زات اُنی نِجیس اِدیپ بیلمِز.‏ آدامی نِجیس اِدیَن زاتلار اُنونگ اُز ایچیندِن چیقیاندیر.‏ ‏[‏ 16اِشیتمَگه قولاغی بار آدام اِشیتسین!‏»‏ دییدی.‏]‏

17عیسی جِماغاتینگ یانیندان آیریلیپ، اُیه گیرِنده، شَگیرتلِری اُندان بو میثالینگ مَعنیسینی سُرادیلار.‏ 18عیسی اُلارا:‏ ‏«‏اُندا، سیز هِم دوشونمِیَرسینگیزمی؟ آدامینگ ایچینه گیرِن هیچ بیر زادینگ اُنی نِجیس اِتمِیَندیگینی بیلمِیَرسینگیزمی؟ 19بولار آدامینگ یورِگینه دَل-ده، قارنینا گیریَر، اُل یِردِن-ده داشاری چیقیار»‏ دیییپ جُغاپ بِردی.‏ شِیله دییمِک بیلِن، عیسی هِمّه اییمیتلِرینگ پَکدیگینی اِعلان اِتدی.‏ 20اُل یِنه:‏ ‏«‏آدامی نِجیس اِدیَن اُنونگ اُز ایچیندِن چیقیان زاتلاردیر.‏ 21‏-22چونکی ایچدِن و آدامینگ یورِگیندِن تِلِکه فیکرلِر، آخلاقسیزلیق، اُغورلیق، قانخُرلوق، زیناکَرلیک، آچگُزلوک، یامانلیق، حیله، پاسیقلیق، باخیلیق، تُهمِت، تِکِپبیرلیک و آحماقلیق چیقیار.‏ 23بو یامان زاتلارینگ هِمّه‌سی ایچدِن چیقیپ، آدامی نِجیس اِدیَر»‏ دییدی.‏

فینیقیه‌لی آیالینگ ایمانی

مَتّیٰ 15‏:21‏-28

24عیسی اُل یِردِن چیقیپ، صور و صیدون اِطرافلارینا گیتدی.‏ اُل بیر اُیه باردی و هیچ کیمینگ بو بارادا بیلمِگینی ایسلِمِیَردی، یُنه مونی گوزگین ساقلاپ بیلمِدی.‏ 25کیچیجیک قیزینی آرخو-جین اِیِلَن بیر آیال عیسی حاقدَکی خابارلاری اِشیدِن واقتینا گِلیپ، اُنونگ آیاغینا ییقیلدی.‏ 26اُل آیالینگ آصلی سوریه‌نینگ فینیقیه اولکه‌سیندِن بُلوپ، اُل یهودی دَلدی.‏ اُل قیزیندان جینی کُووپ چیقارماغینی ایسلَپ، عیسی یالباردی.‏ 27عیسی اُنگا:‏ ‏«‏قُی، اَوَّل فِرزِنتلِر دُیسون.‏ فِرزِنتلِرینگ چُرِگینی آلیپ، ایتلِره زینگماق دُغری دَلدیر»‏ دییدی.‏ 28آیال هِم:‏ ‏«‏هاووا، یا آقام!‏ یُنه ایتلِر هِم فِرزِنتلِرینگ ساچاق باشیندا دُکِن چُرِک اُونوقلاریندان ایییَندیر»‏ دییدی.‏ 29عیسی اُنگا:‏ ‏«‏بو سُزونگ اوچین، بار، گیدیبِر، جین سِنینگ قیزینگدان چیقدی»‏ دییدی.‏ 30آیال اُیونه باراندا، قیزینینگ جیندان آزاد بُلوپ، دوشِگینده یاتانینی گُردی.‏

کِر آدام شِفا تاپیار

31اُنسُنگ عیسی صور و صیدون اِطرافلاریندان قایدیپ، دِکاپولیس تُوِرِکلِرینینگ اوستو بیلِن جلیله دِریاسینا گِلدی.‏ 32عیسانینگ یانینا کِر هِم پِلتِک بیر آدامی گِتیریپ، اُنونگ باشینا اِلینی قُیماغینی ایسلَپ، اُنگا یالباردیلار.‏ 33عیسی اُل آدامی جِماغاتینگ ایچیندِن بیر چِته چیقاریپ، بارماقلارینی اُنونگ قولاقلارینا سُقدی، تویکوریپ، اُنونگ دیلینَه اِلینی دِگیردی.‏ 34اُنسُنگ آسمانا باقیپ، اوزاقدان دِمینی آلدی-دا:‏ ‏«‏اِفّاتا!‏»‏ یَعنی ‏«‏آچیل»‏ دییدی.‏ 35یانگقی آدامینگ قولاقلاری شو واقتدا آچیلیپ، دیلی دُغُر کِپلِمَگه باشلادی.‏ 36عیسی مونی گُرِنلِره بو بارادا هیچ کیمه آیتمازلیغی تابشیردی.‏ اِمّا اُل نَچه کَن تابشیرسا، اُلار بو خاباری شُنچا-دا کَن یایراتدیلار.‏ 37خالق خاص قاتی حایران قالیشیپ:‏ ‏«‏اُل هِمّه زادی باشاریپ گِلیَر، حتّیٰ کِرلِرینگ قولاغینی، لالّارینگ دیلینی آچیار»‏ دیییشیَردی.‏

مُقادِّس کیتاب

© 2016,Turkmen Truth. All rights reserved



More Info | Version Index