Search form

مَتّیٰ 18

18‏-نجی باب

اینگ بِییک کیم؟

مَرقُس 9‏:33‏-37، 42‏-48؛ لوقا 9‏:46‏-48؛ 17‏:1‏-2

1شُل واقت شَگیرتلِر عیسانینگ یانینا گِلیپ:‏ ‏«‏آسمانینگ پاتیشاهلیغیندا اینگ بِییک کیم؟»‏ دیییپ سُرادیلار.‏ 2عیسی-دا بیر چاغانی چاغیریپ، اُنی اُلارینگ اُرتاسیندا قُیدی-دا، شِیله دییدی:‏ 3‏«‏سیزه دُغروسینی آیدیارین:‏ اِگِر سیز یُلونگیزدان دُنوپ، چاغالار یالی بُلماسانگیز، آسمانینگ پاتیشاهلیغینا آصلا گیریپ بیلمِرسینگیز.‏ 4کیم شو چاغا یالی فُروتَن بُلسا، آسمانینگ پاتیشاهلیغیندا اینگ بِییک شُلدور.‏ 5هِر کیم شونونگ یالی بیر چاغانی مِنینگ آدیمدان قابول اِتسه، مِنی قابول اِتدیگیدیر.‏ 6اِمّا هِر کیم مانگا اینانیان بو کیچی چاغالارینگ بیرینینگ گونَه اِتمِگینه سِبَپ بُلسا، اُنونگ اوچین بُینوندان اولی دِگیرمِن داشی آسیپ، دِریانینگ دویبونه زینگیلماغی خاص قاوی بُلار.‏ 7اینسانلارینگ گونَه اِتمِگینه سِبَپ بُلیان زاتلار اوچین بو دونیَه‌نینگ حالینا، وای!‏ بِیله زاتلار گِلمِلیدیر، اِمّا بولارینگ گِلمِگینه سِبَپ بُلیان آدامینگ گونونه، وای!‏ 8اِلینگ یا آیاغینگ سِنینگ گونَه اِتمِگینگه سِبَپ بُلسا، اُنی چاپیپ اُقلا.‏ سِنینگ ایکی اِلّی، ایکی آیاقلی اِبِدی اُدا زینگیلانینگدان، بیر اِلّی، بیر آیاقلی یاشایشا یِتمِگینگ قُوودیر.‏ 9گُزونگ سِنینگ گونَه اِتمِگینگه سِبَپ بُلسا، اُنی سُغروپ زینگ.‏ سانگا یِکه گُزلی بُلوپ یاشایشا گیرمِک، ایکی گُزلی بُلوپ دُوزاخ اُدونا زینگیلانینگدان قُوودیر.‏

ییتِن قُیون میثالی

لوقا 15‏:3‏-7

10‏«‏بو کیچیلِرینگ بیرینی اَسگِرمِزلیک اِتمِکدِن داش دورونگ!‏ مِن سیزه شونی آیدیارین:‏ اُلارینگ آسمانداقی پِریشده‌لِری آسمانداقی آتامینگ یوزونی هِمیشه گُریَرلِر.‏ ‏[‏ 11اینسان اُغلی ییتِنلِری نِجات بِرمَگه گِلِندیر.‏]‏

12‏«‏سیز نَهیلی فیکر اِدیَرسینگیز؟ بیر آدامینگ یوز قُینی بُلوپ، اُلارینگ بیری ییتسه، اُل تُغسان دُقوزینی داغلاردا قُیوپ، ییتِنینگ ایزینا گُزِمَگَه چیقمازمی؟ 13اُنی تاپیپ بیلَیسه — سیزه دُغروسینی آیدیارین — اُل مونونگ اوچین ییتمِدیک تُغسان دُقوزیسینا بِگِنِندِن هِم خاص کَن بِگِنِر.‏ 14شِیله‌لیکده، بو کیچیلِرینگ بیریدَه هِلَک بُلماغی آسمانداقی آتانگیزینگ ایسلِگی دَلدیر.‏

دُغانینگ گونَه اِتسه

15‏«‏اِگِر دُغانینگ گونَه اِتسه، بار-دا، اَوَّل ایکی بُلوپ گورلِشیپ، عاییبینی اُنگا آیت.‏ سِنینگ سُزونگه قولاق آسّا، بو دُغانینگی قازاندیغینگدیر.‏ 16- اِگِر سُزونگه قولاق آسماسا، بیر-ایکی آدامی یانینگا آلیپ بار، آیدیلان هِر بیر سُز ایکی یا اوچ شاهادینگ گووَه‌سی بیلِن تاصدیقلانسین.‏ 17اُلارا-دا قولاق آسماق ایسلِمِسه، اُندا کِلیسا آیت.‏ اُنگا-دا قولاق آسماق ایسلِمِسه، قُی، اُل سِنینگ اوچین بیر بیگانه یا-دا مالییات آلیانچی یالی بُلسون.‏

18‏«‏سیزه دُغروسینی آیدیارین:‏ یِر یوزونده باغلانزادینگ آسماندا-دا باغلانار.‏ یِر یوزونده آچانزادینگ آسماندا-دا آچیلار.‏ 19یِنه سیزه شونی آیدیارین:‏ اِگِر آرانگیزدان ایکی آدام ایسلِندیک زادی دیلِمِک اوچین بیر فیکره گِلسه، آسمانداقی آتام دیلِگلِری بیتیرِر.‏ 20مِنینگ آدیم بیلِن ایکی یا-دا اوچ آدام اویشسه، مِن هِم اُلارینگ آراسیندا بُلارین.‏»‏

رِحمسیز خیدماتکَر

21سُنگرا پِطرُس عیسانینگ یانینا گِلیپ، اُندان:‏ ‏«‏آقام، دُغانیم مانگا قارشی گونَه ایش اِتسه، مِن اُنی نَچه گِزِک باغیشلایین؟ یِدی گِزِکمی؟»‏ دیییپ سُرادی.‏ 22عیسی اُنگا:‏ ‏«‏مِن سانگا یِدی گِزِک دَل، یِتمیش گِزِک یِدی دیییَرین»‏ دیییپ جُغاپ بِردی.‏

23‏«‏شُنونگ اوچین هِم آسمانینگ پاتیشاهلیغی اُز خیدماتکَرلِری بیلِن حاساپلاشماق ایسلَن بیر پاتیشاه مِنگزِیَر.‏ 24اُل حاساپلاشماغا باشلاندا، اُنونگ یانینا اُن مونگ قیزیل پول بِرگیسی بُلان بیر خیدماتکَرینی گِتیریَرلِر.‏ 25اُل بِرگیسینی بِریپ بیلمَنسُنگ، پاتیشاه اُنگا، اُزونی، آیالینی، فِرزِنتلِرینی و هِمّه مالّارینی ساتیپ، بِرگیسینی بِرمِگی دِستور بِریَر.‏ 26اُل یِره یوزین دوشوپ، پاتیشاه:‏ ‏”‏صابیر اِت!‏ بارینی بِرِیین“‏ دیییپ یالباریار.‏ 27پاتیشاه اُنگا یورِگی آوییار، اُنونگ بِرگیسینی گِچیپ، اُنی بُشادیپ گُیبِریَر.‏

28‏«‏یانگقی خیدماتکَر چیقیپ گیدیَر.‏ اُل اُزونه یوز دینار بِرگیسی بُلان بیر هِمکَرینَه ساتاشیار.‏ اُنی توتوپ:‏ ‏”‏بِرگینگی بِر“‏ دیییپ، اُنونگ بُقورداغیندان یاپیشیار.‏ 29هِمکَری اُنونگ آیاغینا ییقیلیپ:‏ ‏”‏صابیر اِت، بِرگیمی بِرِرین“‏ دیییپ، اُنگا یالباریار.‏ 30اِمّا اُل اِتمِیَر، قایتام، بِرگیسینی بِریَنچَه، اُنی زیندانا سالدیریار.‏

31‏«‏باشغا هِمکَرلِری بو واقانی گُروپ، قاتی قینانیارلار.‏ اُلار گیدیپ، بُلان هِمّه زادی پاتیشاها دِرِّو خابار بِریَرلِر.‏ 32پاتیشاه خیدماتکَری چاغیریپ:‏ ‏”‏اِی، یامان قول!‏ مانگا یالبارانینگ اوچین، مِن سِنینگ بِرگینگ بارینی گِچدیم.‏ 33مِنینگ سانگا رِحم اِدیشیم یالی، سِن هِم هِمکَرینگه رِحم اِتمِلی دَلمیدینگ؟“‏ دیییَر.‏ 34پاتیشاه غاضابا مینیپ، بِرگیسینی بِریَنچَه، اُنی زیندانا اِذیِت آزار بِریَنلِرینگ اِلینه تابشیریار.‏

35‏«‏اِگِر سیزینگ-ده هِر بیرینگیز اُز دُغانینینگ گونَه‌لِرینی یورِکدِن باغیشلاماسانگیز، آسمانداقی آتام-دا سیزه شِیله اِدِر.‏»‏

مُقادِّس کیتاب

© 2016,Turkmen Truth. All rights reserved



More Info | Version Index