Search form

مَتّیٰ 2

2‏-نجی باب

مونِجّیملِرینگ گُروشمِلِری

1عیسی هیرودیس پاتیشاهنینگ زاماندا، یهودیه‌نینگ بِیت‌لِحِم شَهرینده دُغدی.‏ شُندا مونِجّیملِر گوندُغاردان اورشلیمه گِلیپ:‏ 2‏«‏یهودیلِرینگ پاتیشاهسی بُلوپ دُغان چاغا نیرِده؟ بیز اُنونگ ییلدیزینی دُغاندا گُردوک و اُنگا سِجده اِتمَگه گِلدیک»‏ دییدیلِر.‏ 3هیرودیس پاتیشاه مونی اِشیدِنده، اُنونگ اُزی-ده، هِمّه اورشلیم خالقی-دا باشاغایلیغا دوشدی.‏ 4اُل هِمّه یُلباشچی کاهینلاری و دین عُلَمالاری ییغناپ، اُلاردان مسیح نیرِده دُغمالی دیییپ سُرادی.‏ 5اُلار شِیله جُغاپ بِردیلِر:‏ ‏«‏اُل یهودیه‌دَکی بِیت‌لِحِم شَهرینده دُغمالی، سِبَبی پیغامبار شِیله یازیپدیر:‏

6- ‏”‏اِمّا سِن، اِی، یهودا یوردونداقی بِیت‌لِحِم!‏

یهودا حُکومدارلارینگ ایچینده آصلا اینگ کیچیسی دَلسینگ.‏

چونکی سِندِن بیر حُکومدار چیقار،

خالقیم اسرائیل‌ینگ چُپانیدیر اُل.‏“‏»‏

7سُنگرا هیرودیس مونِجّیملِری گوزگین چاغیریپ، اُلاردان ییلدیزینگ هاچان گُرنِندیگی بارادا جیکمه-جیک سُرادی.‏ 8اُل:‏ ‏«‏بارینگ، چاغا باراداقی خابارینگ آنگیرسینا یِتینگ.‏ اُنی تاپان واقتینگیزا، مانگا دِرِّو خابار بِرینگ.‏ مِن هِم باریپ، اُنگا سِجده اِتجِک»‏ دیییپ، اُلاری بِیت‌لِحِمه ایبِردی.‏ 9اُلار پاتیشاهنی دینگلَپ، یُلا دوشدولِر.‏ اینه، اُلارینگ گُرِن دُغلوش ییلدیزی اُولِرینه دوشوپ، چاغانینگ دُغان یِرینینگ اوستونه گِلیپ دوردی.‏ 10ییلدیزی گُرِنلِرینده، اُلارینگ شاتلیقلارینینگ اِندازاسی یُقدی.‏ 11اُیه گیریپ، چاغا بیلِن اِنه‌سی مریمی گُردولِر.‏ اُلار دیزا چُکوپ، اُنگا سِجده اِتدیلِر-ده، صاندیقلارینی آچیپ، قیزیل، عاطیر و مُر سُوغات بِردیلِر.‏ 12هیرودیسینگ یانینا قایدیپ بارمازلیق حاقدا دیش گُرِن اوچین خابارلی بُلانسُنگ، مونِجّیملِر اُز یورتلارینا باشغا یُل بیلِن قایتدیلار.‏

یوسف ماشغالاسی بیلِن مصره قاچیار

13مونِجّیملِر گیدِندِن سُنگ، خودایینگ بیر پِریشده‌سی یوسفینگ دیشینه گیریپ:‏ ‏«‏تور!‏ چاغا بیلِن اِنه‌سینی آل-دا، مصره قاچ.‏ اُزوم خابار بِریَنچَم، شُل یِرده قال، سِبَبی هیرودیس چاغانی اُلدورمِک اوچین اُنی گُزلِمَگَه چیقماقچی بُلیار»‏ دییدی.‏ 14شِیله‌لیکده، یوسف توردی-دا، چاغا بیلِن اُنونگ اِنه‌سینی آلیپ، شُل گیجه مصرَه طاراف یُلا دوشدی.‏ 15- اُل تا هیرودیس اُلیَنچَه، شُل یِرده قالدی.‏ شونلوقدا، خودایینگ:‏ ‏«‏مِن اُغلومی مصردِن چاغیردیم»‏ دیییپ، پیغامبار سِبَبی آیدان سُزی بِرجای بُلدی.‏

16مونِجّیملِرینگ آلدانینی بیلیپ، هیرودیس قاهار-غاضابا میندی.‏ اُل مونِجّیملِردِن سُراپ دوشونِن واقتینا گُرَه، بِیت‌لِحِم بیلِن اُنونگ داش-تُوِرِگیندَکی اُبالاردا دُغان ایکی یاشیندَکی و ایکی یاشا یِتمِدیک اِرکِک چاغالارینگ هِمّه‌سینی اُلدورتدی.‏ 17شِیدیپ، اِرمیا پیغامبارینگ شو آیدانلاری بِرجای بُلدی:‏

18- ‏«‏رامه‌دِن بیر سِس اِشیدیلدی،

آغیر و آجی پِریات سِسلِری،

راحیل چاغالاری اوچین آغلایار،

تِسِلّی بِریلمِگینی ایسلِمِیَر،

سِبَبی اُلار ایندی یُق.‏»‏

یوسف ماشغالاسی بیلِن ناصِرا قایدیپ گِلیَر

19هیرودیس اُلِندِن سُنگ، خودایینگ بیر پِریشده‌سی مصرده یوسفینگ دیشینه گیریپ:‏ 20‏«‏تور، چاغا بیلِن اُنونگ اِنه‌سینی آل-دا، اسرائیلا دُلان، سِبَبی چاغانینگ جانینینگ قاصتینا چیقانلار اُلدی»‏ دییدی.‏ 21سُنگرا یوسف چاغا بیلِن اِنه‌سینی آلیپ، اسرائیلا قایتدی.‏ 22یُنه آرکِلایوسینگ اُز آتاسی هیرودیسینگ یِرینه یهودیه‌نینگ پاتیشاهسی بُلانینی اِشیدیپ، اُل یِره بارماغا قُرقدی.‏ دیش گُرِن اوچین خابارلی بُلانسُنگ، اُل جلیله وِلایاتینا طاراف یُلا دوشدی.‏ 23اُل یِره باریپ، ناصِره دییِن شَهرده مِسگِن توتدی.‏ شِیدیپ، ‏«‏اُنگا ناصِره‌لی دییلِر»‏ دیییپ، پیغامبارلار سِبَبی آیدیلان سُزلِر بِرجای بُلدی.‏

مُقادِّس کیتاب

© 2016,Turkmen Truth. All rights reserved



More Info | Version Index