Search form

مَتّیٰ 22

22‏-نجی باب

گِلینینگ طُویی میثالی

لوقا 14‏:15‏-24

1عیسی اُلارا یِنه-ده میثالّار بیلِن گورّونگ بِردی:‏ 2‏«‏آسمانینگ پاتیشاهلیغی اُز اُغلی اوچین گِلین طُویینی توتان پاتیشاه مِنگزِیَندیر.‏ 3اُل طُویا چاغیریلانلارا دِرِّو خابار اِتمِک اوچین خیدماتکَرلِرینی ایبِریَر، اِمّا چاغیریلانلار گِلمِک ایسلِمِیَرلِر.‏ 4پاتیشاه یِنه باشغا خیدماتکَرلِری ایبِریپ، اُلارا:‏ ‏”‏چاغیریلانلارا آیدینگ، اینه، مِن طُوی ساچاغینی تاییارلاپ قُیدوم.‏ سیغیرلاریم، سِمیز مالّاریم سُیولدی، هِمّه زات تاییار، طُویا گِلسینلِر“‏ دیییَر.‏ 5اِمّا اُلار اَهمییِت هِم بِرمِیَرلِر، بیری اُز اِکین مِیدانینا گیدیَر، یِنه بیری اُز سُوداسینینگ اوغروندا گِزیَر.‏ 6باشغالاری بُلسا اُنونگ خیدماتکَرلِرینی توتوپ آزار بِریَرلِر، اُلاری اُلدوریَرلِر.‏ 7شِیله‌لیکده، پاتیشاه غاضاب دُنونی گِییَر.‏ اُل قُشون یُلّاپ، یانگقی قانخُرلاری دِربی-داغین اِدیَر، شَهرلِرینی اُتلایار.‏

8‏«‏سُنگرا پاتیشاه خیدماتکَرلِرینه:‏ ‏”‏طُوی ساچاغی تاییار، اِمّا چاغیریلانلار مونگا میناسیپ دَلمیش.‏ 9یُلّارا بارینگ-دا، کیمی تاپسانگیز، طُویا چاغیرینگ“‏ دیییَر.‏ 10خیدماتکَرلِر یُلّارا چیقیپ، یامان دییمَن، یاغشی دییمَن، تاپانلارینینگ بارینی اویشوریَرلِر، طُوی جایی میهمانلاردان دُلیار.‏

11‏«‏پاتیشاه میهمانلاری گُرمَگه گیرِنده، اُنونگ طُوی گِییمینی گِیمِدیک بیر آداما گُزی دوشیَر.‏ 12اُنگا:‏ ‏”‏اِی، دُست، سِن طُوی گِییمینی گِیمَن، بو یِره نَدیپ گیریپ بیلدینگ؟“‏ دیییپ سُرایار.‏ شُندا اُل آدامینگ دیلی توتولیار.‏ 13سُنگرا پاتیشاه خیدماتکَرلِرینه:‏ ‏”‏اِل-آیاغینی دانگینگ-دا، اُنی داشاری، قارانگقیلیغا قُینگ، اُل یِرده آغلاما و دیش قیجیرداما بُلار“‏ دیییَر.‏ 14چونکی چاغیریلانلار کَن، اِمّا سایلانان‌لار آزدیر.‏»‏

ایمپِراطُرینگقی — ایمپِراطُرا

مَرقُس 12‏:13‏-17؛ لوقا 20‏:20‏-26

15سُنگرا فَریسی‌لِر گیدیپ، اُنی کِپده توتماق بارادا ماصلاحات اِتدیلِر.‏ 16هیرودیسینگ طارافدارلارینینگ بیرنَچه‌سینی اُنونگ یانینا ایبِردیلِر.‏ اُلار عیسادان:‏ ‏«‏اُستاد!‏ بیز سِنینگ دُغرودیغینگی، خودایینگ یُلونی حاقیقات بیلِن اُورِدیَندیگینگی، هیچ کیمه طارافدارلیق اِتمِیَندیگینگی بیلیَریس، سِبَبی سِن آداملارینگ دِرِجه‌سینه باقمایارسینگ.‏ 17هانی، بیزه آیت، سِنینگ فیکرینگچه، ایمپِراطُرا مالییات بِرمِک دُغرومی یا-دا دُغری دَل؟»‏ دیییپ سُرادیلار.‏ 18عیسی اُلارینگ نییِتلِرینینگ یاماندیغینی بیلیپ:‏ ‏«‏مِنی نَمه اوچین ایمتِحان اِدیَرسینگیز، اِی، ایکییوزلیلِر؟ 19مانگا مالییات پولونی گُرکِزینگ»‏ دییدی.‏ اُلار عیسی بیر سِکّه گِتیردیلِر.‏ 20عیسی اُلاردان:‏ ‏«‏بو سِکّه‌دَکی شِکیل بیلِن یازغی کیمینگکی؟»‏ دیییپ سُرادی.‏ 21اُلار:‏ ‏«‏ایمپِراطُرینگقی»‏ دیییپ جُغاپ بِردیلِر.‏ شُندا عیسی اُلارا:‏ ‏«‏اُندا ایمپِراطُرینگقینی — ایمپِراطُرا، خودایینگقینی خودایا بِرینگ»‏ دییدی.‏ 22اُلار مونی اِشیدِنلِرینده، حایران قالدیلار.‏ شِیدیپ، اُلار عیسادان آیریلیپ، اُل یِردِن گیتدیلِر.‏

دیرِلیش بارادا سُراق

مَرقُس 12‏:18‏-27؛ لوقا 20‏:27‏-40

23اُلومدِن سُنگ دیرِلیشینگ یُقدوغینی آیدیان صادّوقی‌لِر عیسانینگ یانینا گِلیپ، اُنگا شِیله سُراق بِردیلِر:‏ 24- ‏«‏اُستاد!‏ موسی بیزه شِیله آیدیپدیر:‏ ‏”‏اِگِر ایکی دُغانینگ بیری اُلسه، ایزیندا آیالی دول قالیپ، اُلارینگ اُغلانلاری هِم یُق بُلسا، بِیلِکی دُغانی اُنونگ آیالینا اُیلِنیپ، اُلِن دُغانینینگ نِسلینی دُوام اِتدیرسین.‏“‏ 25بیزینگ آرامیزدا یِدی دُغان باردی.‏ بیرینجیسی اُیلِندی-ده اُلدی.‏ نِسلی بُلمانسُنگ، آیالینی دُغانینا بِردیلِر.‏ 26ایکینجیسی، اوچونجیسی، تا یِدینجیسینه چِنلی هِمّه‌سینده شُل بیر یاغدای قایتالاندی.‏ 27اُلارینگ هِمّه‌سیندِن سُنگ اُل آیال هِم اُلدی.‏ 28ایندی قیامات گونی اُلار اُلومدِن دیرِلِنلِرینده، بو آیال اُل یِدی دُغانینگ هایسیسینینگ آیالی بُلار؟ چونکی اُلارینگ هِمّه‌سی-ده اُنی بیلِن اُیلِنیپدی.‏»‏

29عیسی اُلارا شِیله جُغاپ بِردی:‏ ‏«‏سیز نه مُقادِّس یازغیلاری، نه-ده خودایینگ قودراتینی بیلیَرسینگیز، شُنونگ اوچین یالنگیشیارسینگیز.‏ 30اینسانلار اُلومدِن دیرِلِنده، نه اُیلِنِرلِر، نه-ده نیکاح اِدِرلِر، اُلار آسمانداقی پِریشده‌لِر یالی بُلارلار.‏ 31اُلولِرینگ دیرِلیشی باباتدا بُلسا، سیز خودایینگ اُزونگیزه:‏ 32- ‏”‏مِن ابراهیمینگ، اسحاقینگ و یعقوبینگ خوداییدیرین“‏ دییِنینی اُقیمادینگیزمی؟ اُل اُلولِرینگ دَل-ده، دیریلِرینگ خوداییدیر.‏»‏ 33جِماغات مونی اِشیدیپ، اُنونگ تاغلیماتینا حایران قالدیلار.‏

اولی حُکوم

مَرقُس 12‏:28‏-34؛ لوقا 10‏:25‏-28

34فَریسی‌لِر عیسانینگ صادّوقی‌لِره اِدِندیگینی اِشیدِنلِرینده، بیر یِره ییغنانیشدیلار.‏ 35اُلاردان بیر دین عالیم عیسانی ایمتِحان اِتمِک اوچین:‏ 36‏«‏اُستاد، تُورات‌دا اینگ اولی حُکوم نَمه؟»‏ دیییپ سُرادی.‏ 37- عیسی اُنگا شِیله جُغاپ بِردی:‏ ‏«‏بیرینجیسی:‏ ‏”‏تانگری خودایینگیزی هِمّه یورِگینگیز، هِمّه جان-تِنینگیز و بار دوشونجَنگیز بیلِن سُیونگ.‏“‏ 38شو بیرینجی و اینگ اولی حُکومدیر.‏ 39- ایکینجیسی-ده:‏ ‏”‏هِمسایانگی اُزونگی سُیشونگ یالی سُی!‏“‏ 40هِمّه تُورات بیلِن پیغامبارلارینگ یازغیلاری شو ایکی حُکومَه باغلیدیر.‏»‏

مسیح کیمینگ اُغلی؟

مَرقُس 12‏:35‏-37؛ لوقا 20‏:41‏-44

41فَریسی‌لِر اویشوپ دورقالار، عیسی اُلاردان:‏ 42‏«‏مسیح بارادا نَمه فیکر اِدیَرسینگیز؟ اُل کیمینگ اُغلی؟»‏ دیییپ سُرادی.‏ اُلار هِم عیسی:‏ ‏«‏اُل داوودینگ اُغلی»‏ دیییپ جُغاپ بِردیلِر.‏ 43عیسی اُلارا شِیله دییدی:‏ ‏«‏اُندا نَمه اوچین داوودینگ اُزی مُقادِّس روحدان ایلهام آلیپ، مسیحه تانگری دییَر؟ اُل شِیله دیییپدیر:‏

44- ‏”‏خودای مِنینگ تانگریما شِیله آیتدی:‏

دوشمانلارینگی آیاق آشاغینا سالیانچام، مِنینگ ساغیمدا اُتور.‏“‏

45اِگِر داوود مسیحه تانگری دییَن بُلسا، اُل نَهیلی داوودینگ اُغلی بُلیار؟»‏ 46هیچ کیم عیسی جُغاب بِریپ، بیر سُز هِم آیدیپ بیلمِدی.‏ شُل گوندِن بِیلَک هیچ کیم اُندان یِکِجه زات سُراماغا-دا یورِک اِتمِدی.‏

مُقادِّس کیتاب

© 2016,Turkmen Truth. All rights reserved



More Info | Version Index