Search form

مَتّیٰ 25

25‏-نجی باب

اُن قیز میثالی

1‏«‏شُل واقت آسمانینگ پاتیشاهلیغی اُن قیزینگ چیراغلارینی آلیپ، دامادی قارشیلاماغا چیقیشلاری باراداقی واقا مِنگزِیَندیر.‏ 2اُلارینگ بَشیسی عاقیلّی، بَشیسی عاقیلسیز میشدیق.‏ 3عاقیلسیزلار چیراغلارینی آلیارلار، اِمّا یاغ آلمایارلار.‏ 4عاقیلّیلار بُلسا چیراغلاری بیلِن بیرلیکده قاپلاردا یاغ هِم آلیارلار.‏ 5داماد گیجَه قالاندا، هِمّه‌سینی اوقی باسیار و اُلار اوقلایارلار.‏ 6یاری گیجه:‏ ‏”‏اینه، داماد گِلیَر، قارشیلاماغا چیقینگ!‏“‏ دییِن قاتی سِس اِشیدیلیَر.‏ 7شُندا یانگقی قیزلارینگ هِمّه‌سی اُیانیپ، چیراغلارینینگ یاغینی بِجِرمَگَه باشلایارلار.‏ 8عاقیلسیزلار عاقیلّیلارا:‏ ‏”‏چیراغلاریمیز سُنوپ باریار، بیزه یاغینگیزدان بیرآز بِرَیینگ“‏ دیییَرلِر.‏ 9اِمّا عاقیلّیلار:‏ ‏”‏یُق!‏ بیزه-ده، سیزه-ده یِتمِز آخیرین.‏ قُووسی، گیدینگ-ده، ساتیانچیلاردان اُزونگیزه یاغ ساتین آلینگ“‏ دیییَرلِر.‏ 10اُلار یاغ ساتین آلماغا گیدِن واقتی داماد گِلیَر.‏ تاییار دوران قیزلار اُنونگ بیلِن بیله طُوی جایی گیرِنلِریندِن، قاپی یاپیلیار.‏ 11بیر سالیمدان بِیلِکی قیزلار هِم گِلیپ:‏ ‏”‏آقا، آقا!‏ قاپینی آچ، بیز گِلدیک“‏ دیییَرلِر.‏ 12اِمّا داماد:‏ ‏”‏سیزه دُغروسینی آیدیارین، مِن سیزی آصلا تانییامُق“‏ دیییپ جُغاپ بِریَر.‏

13‏«‏شُنونگ اوچین هِم اُیا بُلونگ، سِبَبی سیز اینسان اُغلونینگ گِلجِک شو گونونی و ساغادینی بیلمِیَرسینگیز.‏»‏

اوچ خیدماتکَر حاقینداقی میثال

لوقا 19‏:11‏-27

14‏«‏آسمانینگ پاتیشاهلیغی شونونگ یالیدیر:‏ بیر آدام اوزاق یُلا گیتمِکچی بُلوپ، خیدماتکَرلِرینی یانینا چاغیریپ، مال-مولکونی اُلارا تابشیریار.‏ 15بو آدام اُلارینگ هِر بیریسینینگ باشارجاغینا لاییق:‏ بیرینه — بَش حالتا، بِیلِکیسینه — ایکی، باشغا بیرینه بیر حالتا قیزیل-کوموش بِریپ، یُلا دوشیَر.‏ 16بَش حالتا آلان گیدیپ، بو پول بیلِن سُودا اِتمَگه گیریشیپ، یِنه بَش حالتا قازاندیریار.‏ 17ایکی حالتا آلان-دا شُنونگ یالی اِدیپ، یِنه ایکی حالتا قازاندیریار.‏ 18بیر حالتا آلان بُلسا گیدیپ، چوقور قازیار-دا، آقانگ بِرِن پولونی گُموپ گوزگِیَر.‏

19‏«‏کَن واقتدان سُنگ بو خیدماتکَرلِرینگ آقاسی گِلیپ، اُلاردان حِساب سُرایار.‏ 20بَش حالتا آلان خیدماتکَر گِلیپ، اُوالقی پولونگ اوستونه یِنه بَش حالتا گِتیریَر.‏ اُل:‏ ‏”‏آقا!‏ سِن مانگا بَش حالتا قیزیل-کوموش بِریپدینگ، اینه، مِن اُندان یِنه بَش حالتا قازاندیم“‏ دیییَر.‏ 21آقاسی اُنگا:‏ ‏”‏بِرِکِلّا، یاغشی هِم صادیق خیدماتکَر!‏ سِن کیچیجیک ایشده صادیق بُلانینگ اوچین، ایندی بِییک ایشلِرده هِم سانگا اینانارین.‏ گِل، آقانگ شاتلیغینا اُرتاق بُل!‏“‏ دیییَر.‏

22‏«‏ایکی حالتا آلان هِم گِلیپ:‏ ‏”‏آقا!‏ سِن مانگا ایکی حالتا قیزیل-کوموش بِریپدینگ، اینه، مِن اُندان یِنه ایکی حالتا قازاندیم“‏ دیییَر.‏ 23آقاسی اُنگا:‏ ‏”‏بِرِکِلّا، یاغشی و صادیق خیدماتکَر!‏ سِن کیچیجیک ایشده صادیقلیغینگی گُرکِزدینگ، ایندی مِن سِنی بِییک ایشلِرینگ باشینا قُیارین.‏ گِل، آقانگ شاتلیغینا اُرتاق بُل!‏“‏ دیییَر.‏

24‏«‏بیر حالتا آلان هِم گِلیپ:‏ ‏”‏آقا، مِن سِنینگ قاتی رِحمسیز آدامدیغینگی بیلیَردیم.‏ سِن اِکمِدیک یِرینگدِن اُریارسینگ، سِپمِدیک یِرینگدِن ییغیارسینگ.‏ 25شُنونگ اوچین مِن قُرقدوم، گیدیپ، بِرِن قیزیل-کوموش حالتانگی یِره گُموپ گوزگِدیم، اینه، مالینگه آل!‏“‏ دیییَر.‏ 26آقاسی اُنگا شِیله دیییَر:‏ ‏”‏اِی، یامان هِم یالتا خیدماتکَر!‏ سِن مِنینگ اِکمِدیک یِریمدِن اُریاندیغیمی، سِپمِدیک یِریمدِن ییغیاندیغیمی بیلیَرمیدینگ؟ 27اُندا پولومی پول ایشلِتیَنلِره بِرمِلی دَلمی، مِن هِم گِلیپ، اُنی پِیداسی بیلِن آلاردیم.‏ 28ایندی اُنگا بِرِن بیر حالتامی آلینگ-دا، اُن حالتالا بِرینگ.‏ 29کیمده بار بُلسا، اُنگا بِریلِر، اُنداقی بُل بُلار، اِمّا کیمده یُق بُلسا، اُنونگ اِلیندَکی هِم آلنار.‏ 30پِیداسیز خیدماتکَری داشاری، قارانگقیلیغا قُینگ، اُل یِرده آغلاما و دیش قیجیرداما بُلار.‏“‏

قیامات گونی

31‏«‏اینسان اُغلی اُز بِییکلیگینده شایلانیپ، هِمّه پِریشده‌لِر بیلِن گِلِر-ده، بِییک تاختیندا اُتورار.‏ 32هِمّه میلِّتلِر اُنونگ حوضوریندا ییغنانارلار، چُپانینگ قُیونلاری گِچیلِردِن سایلایشی یالی، اُل هِم اُلاری بیری-بیریندِن سایلار.‏ 33قُیونلاری ساغیندا، گِچیلِری هِم سُلوندا قُیار.‏ 34سُنگرا پاتیشاه ساغینداقیلارا شِیله دییِر:‏ ‏”‏اِی، آتامینگ بِرِکِت آلانلاری!‏ گِلینگ-ده، دونیَه یارادیلاندان بَری سیزینگ اوچین تاییارلانان پاتیشاهلیغی میراث آلینگ.‏ 35سِبَبی مِن آچدیم — اییمَگه زات بِردینگیز، سوساپدیم — سو ایچیردینگیز، بیگانه‌دیم — میهمان آلدینگیز، 36یالانگاچدیم — گِییم گِیدیردینگیز، مِریضدیم — سُراماغا گِلدینگیز، زینداندیم — گُرمَگه گِلدینگیز.‏“‏

37‏«‏شُندا دُغری آداملار اُنگا جُغاپ بِریپ دییِرلِر:‏ ‏”‏اِی خودای، بیز سِنی هاچان آچ گُروپ، ناهارلادیق؟ هاچان سوسانینگی گُروپ، سو ایچیردیک؟ 38هاچان سِنی بیگانه گُروپ، میهمان آلدیق یا یالانگاچ گُروپ، گِییم گیدِردیک؟ 39هاچان سِنی مِریض یا-دا زینداندا گُروپ، یانینگا گِلدیک؟“‏ 40پاتیشاه اُلارا:‏ ‏”‏سیزه دُغروسینی آیدیارین، مِنینگ بو اینگ کیچی حاساپلانیان دُغانلاریمدان بیرینه اِدِنینگیزی مانگا اِدِنسینگیز“‏ دیییپ جُغاپ بِردی.‏

41‏«‏سُنگرا سُلونداقیلارا شِیله دییِر:‏ ‏”‏اِی، لَعنِتلیلِر، مِنینگ یانیمدان آیریلینگ، شِیطان بیلِن اُنونگ پِریشده‌لِرینه تاییارلانان اِبِدی اُدا گیدینگ!‏ 42سِبَبی مِن آچدیم — اییمَگه زات بِرمِدینگیز، سوساپدیم — سو ایچیرمِدینگیز، 43بیگانه‌دیم — میهمان آلمادینگیز، یالانگاچدیم — گِییم گِیدیرمِدینگیز، مِریضدیم و زینداندیم — یانیما گِلمِدینگیز.‏“‏

44‏«‏شُندا اُلار:‏ ‏”‏اِی خودای، بیز سِنی هاچان آچ، سوساپ، بیگانه، یالانگاچ، مِریض یا-دا زینداندا گُروپ-ده، سانگا خیدمات اِتمِدیک؟“‏ دیییپ سُرارلار.‏ 45شُندا اُلارا:‏ ‏”‏سیزه دُغروسینی آیدیارین، مونی بو اینگ کیچی حاساپلانیانلاردان بیرینه اِتمِدیگینگیزی، مانگا-دا اِدِن دَلسینگیز“‏ دیییپ جُغاپ بِردی.‏ 46بولار اِبِدی جِزا، دُغری آداملار بُلسا اِبِدی یاشایشا یِتِرلِر.‏»‏

مُقادِّس کیتاب

© 2016,Turkmen Truth. All rights reserved



More Info | Version Index