Search form

مَتّیٰ 3

3‏-نجی باب

یحیی تَعمید بِریَنچینینگ واغظی

مَرقُس 1‏:1‏-8؛ لوقا 3‏:1‏-18؛ یوحنا 1‏:19‏-28

1شُل گونلِرده یحیی تَعمید بِریَنچی گُرونوپ، یهودیه بیابانیندا واغیظ اِتمَگه باشلادی.‏ 2اُل:‏ ‏«‏توبا اِدینگ، سِبَبی آسمانینگ پاتیشاهلیغی قُلایلادی»‏ دیییَردی.‏ 3- اینه، اِشعیا پیغامبارینگ اُل دیییپ:‏

‏«‏بیاباندا قیغیریانینگ سِسی:‏

‏”‏خودایینگ یُلونی تاییارلانگ!‏

اُنونگ یُلّارینی دُغرولانگ!‏“‏ دیییَر»‏

دیییپ آیدان شُل آدامی یحیادیر.‏

4یحیانینگ دویه یونگوندِن لِباسلاری، بیلینده قاییشدان قوشاغی باردی.‏ اُنونگ اییمیتی چِکیرتگه بیلِن بیابانینگ بالیدی.‏ 5سُنگرا اورشلیمینگ، هِمّه یهودیه‌نینگ و اُردُن اِطرافینینگ هِمّه خالقی اُنونگ یانینا گِلدیلِر.‏ 6اُلار گونَه‌لِرینی بُیون آلیاردیلار، یحیی هِم اُلاری اُردُن آرناسیندا تَعمید بِریپ چیقاریاردی.‏

7یحیی فَریسی‌لِرینگ و صادّوقی‌لِرینگ اِنچِمه‌سینینگ تَعمید بِریلمِک اوچین اُز یانینا گِلیَندیکلِرینی گُرِنده، اُلارا شِیله دییدی:‏ ‏«‏اِی، ییلانینگ نِسلی!‏ گِلجِک غاضابدان قاچماغی سیزه کیم بیلدیردی؟ 8موندان بِیلَک اِدِن توبانگیزا میناسیپ میوه بِرینگ.‏ 9اُز یانینگیزدان:‏ ‏”‏بیزینگ آتامیز ابراهیمدیر“‏ دیییپ فیکر اِتمَنگ.‏ مِن سیزه شونی آیدایین:‏ خودای ابراهیم اوچین شو داشلاردان هِم فِرزِنت یارادیپ بیلیَندیر!‏ 10و شو زامان پالتا باغلارینگ دویبونده یاتیر:‏ قاوی میوه بِرمِیَن هِر بیر باغ چاپیلیپ، اُدا آتیلار.‏ 11توبا اِدِندیگینگیزینگ نیشانی حُکمونده مِن سیزی سووا تَعمید بِریَرین، اِمّا مِندِن سُنگرا گِلجِک مِندِن-ده خاص گویچلیدیر.‏ مِن اُنونگ کُووشلِرینی گُتِرمَگه-ده میناسیپ دَلدیرین.‏ اُل سیزی مُقادِّس روحا هِم-ده اُدا تَعمید بِرِر.‏ 12اُنونگ خارمان آراسّالایان چارشاخی اِلیندِدیر.‏ اُل خارمان یِرینی سوپوریپ، بوغدایینی آمّارا ییغنار.‏ سامانی بُلسا سُنمِز اُتدا یاقار.‏»‏

عیسی تَعمیدلِندیریلیَر

مَرقُس 1‏:9‏-11؛ لوقا 3‏:21‏-22

13سُنگرا عیسی یحیی طارافیندان تَعمید بِردیریلمِک اوچین جلیله‌دِن اُردُنا، یحیانینگ یانینا گِلدی.‏ 14اِمّا یحیی اُنی ساقلاپ:‏ ‏«‏سِن مِنی تَعمید بِرمِلی، سِنینگ اُزونگ مِنینگ یانیما گِلیَرسینگمی؟»‏ دییدی.‏ 15عیسی اُنگا:‏ ‏«‏دِگمه، حَضیر شِیله بُلسون، سِبَبی بیزه خودایینگ ایسلِگینی بِرجای اِتمِک گِلیشیَندیر»‏ دیییپ جُغاپ بِردی.‏ 16عیسی تَعمید بِریلیپ، سودان چیقان واقتیندا آسمان آچیلدی.‏ عیسی خودایینگ روحونی کِپدِره مِنگزِش اُز اوستونه اینیپ گِلیَنینی گُردی.‏ 17شُندا آسماندان گِلِن بیر سِس:‏ ‏«‏بو مِنینگ عزیز اُغلومدیر.‏ مِن اُندان کَن راضیدیرین»‏ دییدی.‏

مُقادِّس کیتاب

© 2016,Turkmen Truth. All rights reserved



More Info | Version Index