Search form

Tutui Makasososak 6

Hatahori dae-bafok manggaraun

1Lelek naa, hatahori dae-bafok tamba namanoꞌu ena. Boe ma ara leo ratanggenggela sudi rai bee, ndule basa dae-bafok ia ena. Ara oo bonggi rala ana inak kara boe. 2Manetualain ana toun nara+ mete-rita hatahori dae-bafok ana feꞌon nara, neulau ndoos sara. Boe ma ara reu sao rala ana feꞌok see fo ara hii sara. 3Boe ma MANETUALAIN nae, “Au mangguk ka ena ua hatahori dae-bafok leleo-lalaꞌo takandaan nara ia. Au Dula-daleng mana baꞌe masodak neu sara raa, ta nau fee sara rasoda seku neu ena bali.+ Ara muste mate. Dadi neu ko ara rasoda losa kada teuk 120.”

4Tembo-lelek naa, ma tembo-lele bakadeak kara mana tungga naa, hambu hatahori parangguk kara nai dae-bafok ena.+ Neu lelek fo Manetualain ana toun nara sao rala hatahori dae-bafok ana inan nara, boe ma ara bonggi rala hatahori ta hohoꞌak kara, ndia, malangga musur, fo neni nelelak kara nai tutui lele uluk.

5Lelek naa, MANETUALAIN mete-nita hatahori dae-bafok nai dae-bafok manggaraun nara sudi selik kana ena. Dalen nara duꞌa kada manggarauk taa-taa. 6De MANETUALAIN fale dalen adu nala sara ena fo leo nai dae-bafok ia. Naa, tao nala Ndia dalen hedis sudi selik kana. 7Huu naa de Ana kokolak nae, “No dalak naa, neu ko Au akalulutu hatahori dae-bafok, fo Au adu ala sara rai dae-bafok ia. Au oo akalulutu basa mbuik kara ma banda laen nara lalaꞌen boe. Huu Au fale daleng adu ala sara ena.” 8Tehuu kada Noh mesa kana, ndia tao namahoko MANETUALAIN dalen.

Noh tutuin

9-10Noh tutuin talo ia: ana toun nara telu, ndia Sem, Yafet ma Ham. Noh naa, leo-laꞌo tungga ndoon, ta tao mangggarauk, ma ana leo-laꞌo deka-deka no Manetualain. Lelek naa, kada mesa kana ndia neulauk.

11-12Tehuu Manetualain mete-nita basa hatahori laen manggarau ndoos sara. Nai bee a mesan, hatahorir leleo-lalaꞌon nara ta neulauk sudi selik kana ena. Manetualain mete-nita hatahori dae-bafok nai dae-bafok naa, kada manggarauk kara. 13Boe ma Ana nafada Noh nae, “Nai bee a mesan, Au mete-ita kada hatahori dae-bafok manggaraun. Dadi Au aketu basa ena ae, Au ae akalulutu basa dae-bafok ia no oe-isin lalaꞌen. 14De talo ia, Noh! Hatematak ia o tao mala ofa moꞌok esa numa ai teas mai. Nai ofak naa dalen, o tao kamar. Basa naa, balu ofak naa pake ter. 15O tao ofak naa narun meter 133; loan meter 22; ma deman meter 13. 16Ofak naa, taon kareredok. Tehuu reredok naa, naomba nai rarain meter seserik esa numa rindi lain mai. O baꞌe ofak naa dadi tadak telu. Boe ma tao lelesu esa nai ofak naa boboan.

17Masaneda matalolole! Neu ko Au akonda faa moꞌok fo ana nakamate basa hata fo horis marai dae-bafok ia, losa ta ela hata esa boe na. 18Tehuu Au nau ndara fangga hehelu-bartaak ua o. Neu ko o maso muni ofak naa dale muu, sama-sama mua o saom, o anam mara, ma o feto-feum mara.

19-20Numa basa bandar lalaꞌen mai, o muste haꞌi pasan esa-esak, fo muni sara reni ofak naa dale reu, mita fo ara rasoda sama-sama ro o. Sira: banda nekeboik, mbuik kara, ma banda mana manodo-manamak kara, mita fo basa sara rasoda. 21O muste muni basa nanaꞌak mata-matak kara reni ofak dale reu soa-neu ei, ma basa bandar raa.”

22Basa boe ma Noh tao tungga basa Manetualain parendan lalaꞌen.

Manetualain Dede'a-kokolan: Hehelu-bartaa Beuk no Tutui Makasososak

© Wycliffe Bible Translators, Inc. with  (UBB) Unit Bahasa dan Budaya

More Info | Version Index