Search form

Lukas 2

Maria bonggi nala Lamatuak Yesus

(Mateos 1:18-25)

1-2Laꞌe esa, neu Kirenius dadi neu nggubenor numa Siria, boe ma mane ina-huuk, nade Agustus fee kalua parenda esa nae, “Basa hatahorir marai man-parenda Roma koasan, muste fali nggoro-tadun nara reu, fo tungga sensus!” Naa, ndia makasososan fo man-parenda Roma reke rau-inggun nara. 3De basa hatahorir fali nggoro-tadun nara reu fo tungga sensus.

4-5Faik naa, Yusuf leo numa nggoro Nasaret nai profensi Galilea. Ana fufudi ana feꞌok esa ena, nade Maria, fo taꞌin kaisik. Yusuf naa, mane Dauk tititi-nonosin, de ana muste fali neni Dauk kotan Betlehem neu nai profensi Yudea, fo tungga sensus.

Huu naa de dua sara laꞌo reni kota Betlehem reu. 6Neu ara ruma naa, Maria fain fo sangga nae bonggi losa ena. 7Tehuu numa naa ara ta hambu kama sesebak nai uma leo taak ena. Huu naa de ara dudi reni lalae esa dale reu. De ana bonggi Ana makasososan, Ana tou anak. Boe ma ara ralusen renik tema nelusek, fo rasusunggun neu haꞌo dale.

Manetualain nafada mana lolor

8Leꞌodaen naa, hambu mana lolo hida beꞌe ranea sira bibihie-bibilombon numa mook nai kota deak.

9Medak neu ma, ara mete-rita Manetualain atan numa nusa tetuk do inggu temak mai. Boe ma Lamatuak saꞌan nasaꞌa ndule basa sara, de ramataꞌu ralan seli. 10Tehuu ata naa nafada nae,

“Ei boso mamataꞌu dei! Nenene matalolole, ee! Au mai fo nau afada ei hara lii malole esa. Basa mana namanene hara liik ia, neu ko ramahoko.

11Hara lii malole ia liin talo ia:

Faik ia inak esa bonggi nala Karistus ena nai Betlehem, nai mane Dauk kotan.

Karistus naa, Hatahori fo Manetualain helu-bartaa memak kana numa lele uluk mai.

Manetualain nadenun mai fo Ana tao nasoi-nasoda hatahori numa sala-singgon nara mai!

Ndia ia, neu ko hatahorir roken rae, ‘Lamatuak’, te Ana ndia naena haak parenda basa-basan!

12Dei fo ei malelan no dalak talo ia: ei matonggo mia Kana mbimbila anak esa neni nelusek no tema nelusek. Ana sunggu nai haꞌo bandar dale.”

13Ata naa kokolak basa boe ma, medak neu ma Manetualain atan noꞌun seli numa nusa tetuk do inggu temak mai fo rakabubua roon. Boe ma ara koa-kio Manetualain ma soda rae,

14“Ai makadedemak Manetualain naden!

Ndia mana toꞌu parenda nai lalai fo demak mateꞌen.

Manetualain nau fee mole-dame soa-neu hatahorir marai dae-inak,

fo mana tao ramahoko Ndia dalen!”

15Basa boe ma Manetualain atan nara fali reni nusa tetuk do inggu temak reu. Boe ma mana lolor raa kokolak rae, “Wee! Mai ita teni Betlehem teu, fo teu mete-tita Kakanak naa dei! Te Lamatuak haitua harak naa neu ita ena.”

16Boe ma ara laꞌo lai-lai hiek reni Betlehem reu. De ratonggo ro Maria ma Yusuf. Ma ara oo mete-rita Kana mbimbila anak naa, sunggu nai haꞌo dale boe.

17Neu ara mete-rita Kakanak naa, boe ma ara tui rae, “Bebeik kara ia, Manetualain atan nara ruma nusa tetuk do inggu temak mai rafada laꞌe-neu Kakanak ia neu ai ena!” Boe ma ara tui no lutuk losa basan.

18Basa hatahorir heran bali-bali, ramanene mana lolor raa tutuin. 19Tehuu Maria mbedan neu dalen, basa mandadik kara raa. Ana duduꞌa no neneek fo nae sangga bubuluk sosoa-ndandaan hata. 20Basa de mana lolor fali reni sira bibihie-bibilombon nara reu. Boe ma ara rakadedemak Manetualain naden. Ara roke makasi neun, huu hata fo ramanenek ma mete-ritak naa, sama tetar no hata fo Manetualain atan nafadak naa ena.

Kana mbimbila anak naa, ara foin nade Yesus

21Bonggi basa fai falu, boe ma ara sunat Kana mbimbila anak naa tungga baꞌi Musa hohoro-lalanen. Ina-aman foin, nade ‘Yesus’. Nadek naa, ndia nadek fo ata numa nusa tetuk do inggu temak mai nafada sara ena, neu inan bei ta nairun.+

Yusuf no Maria roo Kana mbimbila anak Yesus neni Uma Huhule-haradoi Ina-huuk neu

22Hambu hohoro-lalanek esa numa baꞌi Musa mai nae, ina mana bonggi basak fai haa hulu ena muste neu tao tungga dala-hadak nelao aok nai Uma Huhule-haradoi Ina-huuk. No dalak naa, ara bisa maso uma huhule-haradoik leo biasa. Huu naa de Yusuf no Maria reni Yerusalem reu fo tao tungga dala-hadak naa. De ara roo sira Ana mbimbila anan naa neni Uma Huhule-haradoi Ina-huuk dale neu, fo loo liman dadi neu Lamatuak enan.+ 23Ara tungga Lamatuak hohoro-lalanen fo rae, “Inak esa-esak fo mana bonggi ana makasososak, mete ma tou anak, na, ana muste loo lima kakanak naa dadi neu Lamatuak enan.”+ 24Tungga Lamatuak hohoro-lalanen, mete ma loo lima kakanak neu Lamatuak, na, ina-aman muste fee mbui teu pasan esa do mbui lunda sina tenak dua. Huu naa de Yusuf no Maria oo tao tungga hohoro-lalanek naa boe.+

Baꞌi Simeon nae, Kana mbimbila anak Yesus naa, ndia Karistus fo Manetualain helu-bartaak ena

25-26Faik naa, hambu baꞌi esa, nade Simeon, leo numa kota Yerusalem. Hatahori ia, dalen ndoos ma dalen hii nalan seli neu Manetualain. Manetualain Dula-dale Malalaon nafadan ena nae, ana mete-nita Karistus dei fo ana mate. Karistus naa, ndia neu ko tao masoi-masodak neu hatahori Israꞌel asa.

27Faik naa, Manetualain Dula-dalen nuni no Simeon neni Uma Huhule-haradoi Ina-huuk neu. Naa, nandaa no Yesus ina-aman roon neni naa neu, fo loo liman dadi neu Lamatuak enan. 28Baꞌi Simeon mete-nita Kakanak naa, de ana koꞌo nalan, boe ma ana koa-kio Manetualain nae,

29“Koa-kio Manetualain!

Manetualain tao tungga Ndia hehelu-bartaan neu au ena.

Dadi hatematak ia Manetualain bisa nakamboꞌik au,

mita fo au bisa mate no mole-damek,

30huu au mete-ita Hatahori fo Manetualain nadenun mai ena,

fo tao nasoi-nasoda ai numa ai sala-singgon nara mai!

31Manetualain nae pake Kakanak ia

fo tao nasoi-nasoda basa hatahori nusa-nusak kara.

32Neu ko Ana sama leo saꞌak,

fo neni hada-horomatak soa-neu Manetualain hatahorin Israꞌel asa.

Ana oo sama leo manggaledok boe,

fo natudu Manetualain eno-dalan

soa-neu basa hatahori nusa-nusak laen nara.”+

33Yusuf no Maria ramanene rala naa, boe ma ara heran bali-bali neu hata fo baꞌi Simeon kokolak laꞌe-neu sira Anan. 34Basa naa Simeon fee babaꞌe-babatik neu sara. Boe ma nafada Maria nae, “Yesus inan, ee! Neu ko hatahori noꞌuk ka rai Israꞌel timba-ndundu heni ina Anan ia. Tehuu sira tatao-nonoꞌin neun naa, neu ko natuda falik kasa. Ina Anan ia oo tao nala hatahori noꞌuk ka dalen mbena sau-sau boe. 35No dalak naa, neu ko Manetualain buka nakambela hatahorir dalen. Tehuu Maria, neu ko o hambu susa-sona moꞌok, nok bali mbau dombe tafak neu o tende boam.”

Beꞌa Hanaa noke makasi neu Manetualain, nahuu Yesus

36-37Numa Uma Huhule-haradoi Ina-huuk oo hambu ina lasik esa boe, nade Hanaa. Teun nara falu hulu haa. Aman, nade Fanuel, numa leo Aser mai. Ana nauma-loo teuk hitu, boe ma saon mate laꞌo elan. Beꞌa Hanaa ia, Manetualain mana toꞌu dedeꞌan. Ue-tataon soa hule-haradoi ma puasa nai Uma Huhule-haradoi Ina-huuk, fo nakaluku-nakatele neu Manetualain hatu-leledon.

38Neu Simeon kola-kola no Yusuf ma Maria, ina lasik naa mai deka-deka. De ana namanene sara, boe ma ana koa-kio Manetualain. De ana kokolak laꞌe-neu Yesus soa-neu basa hatahori mana rahani Manek fo Manetualain helu-bartaa ena nae, nau nadenun mai fo nakamboꞌik hatahori Israꞌel asa.

Kakanak naa no ina-aman fali reni nggorok Nasaret reu

39Neu Yusuf no Maria tao tungga basa baꞌi Musa hohoro-lalanen lalaꞌen numa kota Yerusalem ena, boe ma ara fali reni profensi Galilea reu, nai sira nggoron Nasaret.+ 40Yesus oo namoꞌo mamais a boe, Ana tamba nakadere, tamba nalela ma Ana bubuluk dalak noꞌuk ka. Manetualain oo natudu dale susuen neun boe.

Tou anak Yesus numa Uma Huhule-haradoi Ina-huuk

41Tungga teuk, Yusuf no Maria reni kota Yerusalem reu, fo raꞌa feta Paska numa naa.+ 42Laꞌe esa, neu Yesus teun nara salahunu dua, ara oo laꞌok sama-sama reni Yerusalem reu fo tungga feta naa leo biasa boe. 43-44Fai Paska nateꞌe, boe ma Yusuf no Maria laꞌok fali reni Nasaret reu rambalololok ro hatahori noꞌuk ka, fo fali reni Galilea reu. Tehuu ara ta bubuluk laꞌo ela Yesus numa Yerusalem. Ara duꞌa rae, fama te Yesus nambalololok no nonoon nara. Tehuu losa bobok, ara ta mete-rita sana. Boe ma ara mulai sangga reu-mai, ndule basa bobonggin nara ma nonoon nara. 45Huu ara ta ratonggo roon, de ara lenggu fali reni Yerusalem reu, fo rae sanggan nai naa.

46Losa naa, ara sanggan losa faik telu dalen, dei de ratonggo roon numa Uma Huhule-haradoi Ina-huuk dale. Ana nanggatuuk nakaseseluk dedeꞌak no meser anggama Yahudir. 47Basa hatahori mana mamanenek kara heran bali-bali, nahuu Ana bubuluk tebe-tebe Manetualain Susuran isin ma Ana bisa naselu nala sira netatanen nara no neulauk. 48Ina-aman mete-rita talo naa, boe ma ara heran. De inan nae, “Yesus! Tao hata de O tao mala ai sota talo ia? O amam ma au pangganaa doak ma maputa-piok miu-mai sangga O!”

49Tehuu Yesus naselu nae, “Tao hata de mama no papa sota ma susa sangga Au? Bubuluk ena, hetu? Au aena ues nai Au Amang Uman.” 50Tehuu ara ta bubuluk no tetuk hata fo Ana kokolak naa.

51Boe ma basa sara fali reni Nasaret reu. Yesus tao tungga Ndia inan no aman parendan. Boe ma inan mbeda basa mandadik kara raa neu dalen. 52Leo naak ena Yesus oo namoꞌo mamais losa Ana dadi taꞌe ana, tamba nalela leo-laꞌo neulauk boe. Manetualain ma hatahorir oo sue-lai neun boe.+

Manetualain Dede'a-kokolan: Hehelu-bartaa Beuk no Tutui Makasososak

© Wycliffe Bible Translators, Inc. with  (UBB) Unit Bahasa dan Budaya

More Info | Version Index