Search form

Markus 7

Hatahori dae-bafok hohoro-lalanen boso nggati heni Manetualain parendan

(Mateos 15:1-9)

1Hambu hatahori Farisi bubuak esa ro meser anggama hida ruma Yerusalem mai fo ratonggo ro Yesus. 2-5Hatahori Farisir raa toꞌu rahere sira Yahudir dala-hadan. Ndia leo, mete ma hatahori rae raꞌa-rinu, na, muste safe liman tungga sira dala-hadan hihiin. Leo naak oo mete ma fali numa pasar mai boe, ara muste radiu oe dei. Losa-losak sira bua-baꞌun manai dapur, ndia leo urek, pinggak, nggalaas ma cerek, muste safe basa sara tungga sira dala-hadan hihiin, dei fo bole raꞌa-rinu pake sara.

Mete ma hambu hatahori Yahudi laen fo ta tao tungga dala-hadak naa, na, hatahori Farisir ramanasa.

Neu ara mete-rita Yesus ana nunin nara raꞌa ta safe liman tungga dala-hadak hihiin, de ara ramanasa. Boe ma ara mai fo fee salak neu Yesus rae, “Tao hata de O ana nunim mara raꞌa, tehuu ta safe limak dei? Naa, ara laban ita dala-hadan numa bei-baꞌir mai!”

6-7Tehuu Yesus naselu nae, “Eir ia, memak hatahori mana kokolak laen, tao laen. Numa lele uluk mai baꞌi Yesaya surak Manetualain hara hehelun ena nae,

‘Hatahorir ia koa-kio Au,

no kada bafan nara, tehuu ta no dalen nara.

Ara tao talo naa oo, naa kada hie-hie a mesan boe.

Ara ta tao matak Au hihii-nanaun,

tehuu ara tungga kada hatahori dae-bafok hihii-nanaun.’+

Ei oo sama leo naak boe. 8-9Ei laꞌo ela Manetualain hihii-nanaun ena, fo tungga kada hatahori dae-bafok dala-hadan. Memak tungga naa, na, ei malelan seli!

10Lele uluk baꞌi Musa nafada Manetualain parendan ena nae, ‘Fee hada-horomatak neu ei ina-amam.’ Ma tamba bali nae, ‘Mete ma hatahori esa oꞌole-aꞌali inan do aman, na, muste hukun mates neun.’+ 11-12Manetualain fee nenorik talo naa, tehuu ei fee nenorik laen bali. Ei mae, ‘Mete ma hatahori helu-bartaa nae fee ndia bua-baꞌun esa neu Manetualain, na, ta bole pake buas naa fo tulu-fali ina-aman, leo mae ara doidoso ralan seli, huu ana helu-bartaa ena, nae neu ko ana feen neu Manetualain.’ 13Huu naa de bebeik kara ia Au kokolak ena ae, ei nggari heni Manetualain hihii-nanaun ena, de ei nggatin no hohoro-lalane beuk. Hambu hohoro-lalanek noꞌuk ka, ei nggati sara ena talo naa.”

Dedeꞌa manggarauk fo mana kalua numa hatahori dalen mai

(Mateos 15:10-20)

14Basa boe ma Yesus nanggou nala hatahori laen numa naa, de nae, “Pasa ndiꞌi doom mara dei, fo ei malela. 15Hata fo maso neni poꞌok dale neu, naa ta tao nanggenggeo hatahori. Tehuu hata fo kalua, naa ndia tao nanggenggeon. 16[See ndia kandiꞌi dook, na, nenene matalolole, ee!]”+

17Basa boe ma Yesus no ana nunin nara laꞌo ela hatahorir raa, de maso reni uma esa dale reu. Boe ma ana nunin nara ratane lololek naa sosoa-ndandaan. 18-19Yesus naselu nae, “Ei oo ta malela boe, do? Talo ia: hata fo hatahori naꞌan, na, naa malole. Tehuu hata fo ana kalua, naa ndia ta malole. Hata fo ita taꞌan, maso neni poꞌok dale neu, basa naa kalua henin bali. (Lamatuak Yesus lololen naa sosoan nae, hatahori sudi raꞌa hata a mesan, ta kena-kaꞌi.)

20Tehuu hata fo kalua numa hatahori dalen mai, naa ndia tao nanggenggeon losa Manetualain nunuten, de ta nau nakabua noon. 21Huu dedeꞌa manggarauk noꞌuk ka kalua numa hatahori dalen mai! Sama leo: duduꞌa manggarauk, laꞌok sala no hatahori fo ta ndia sao toun do ndia sao inan, nemenaꞌo, nekenisa hatahori, 22bare-naꞌo, hohongge-lelena, tatao manggarauk, pepeko-leleko, tungga kada ao-mbaak hihiin, dale mana mbirik, kokolak tao naboboo hatahori naden, koa ao, ta malela hadak, ma langga batuk.

23Dadi basa manggarau leo naak kara raa kalua numa hatahori dalen mai. Naa ndia tao nanggenggeon. Losa Manetualain oo nunuten boe.”

Lamatuak Yesus tulu-fali inak esa fo ta hatahori Yahudi

(Mateos 15:21-28)

24Basa boe ma Yesus asa laꞌo ela mamanak naa, de reni kota esa reu nade Tirus. Losa naa boe ma ara maso reni uma esa dale reu, nahuu Yesus ta nau hatahorir bubuluk Ndia nai naa. Tehuu Ana ta bisa nafuni nala aon.

25-26Numa naa hambu inak esa fo ta hatahori Yahudi. Ndia neni bonggin numa nusa Fenisia nai profensi Siria. Neu ana namanene Yesus mai, de ana neu noke-hule Yesus fo husi heni nitu numa ana feton neu.

27Tehuu Yesus tee mbolek nae, “Kakanak kara muste raꞌa rakahuluk, dei fo nggari nanaꞌa lenan fee busa.” [Ma sosoan bei nefunik nae, Yesus muste tulu-fali Ndia hatahori Yahudin nakahuluk, dei fo bisa tulu-fali hatahori laen.]

28Tehuu inak naa naselu nae, “Tebe, Papa! Tehuu busa naa nai mei fengga dalen. Ana oo naꞌa hata fo tuda numa kakanak naa pinggan dale mai boe.” [Ma sosoan nae, kakanak kara raꞌa, na, busa oo hambu naꞌa boe. Leo mae Yesus tulu-fali Ndia hatahorin oo, tehuu Ana muste susuri-memete hatahori laen boe].

29Yesus namanene nala naa, boe ma nafada nae, “Awii! Mama kokolak ndaa tebe! Dadi mama fali muu ngga leo, te nitu naa kalua numa mama anan mai ena.”

30Basa boe ma inak naa fali neu ngga. Ana losa uma, te anan mana sunggu selik. Memak nitu naa kalua tebe ena.

Lamatuak Yesus tao nahai hatahori nggoak ma mbakek esa

31Basa boe ma Yesus asa kalua laꞌo ela kota Tirus, laꞌok tungga tasi tatain resik kota Sidon. Numa naa mai ara laꞌo rakandoo losa dano Galilea. Boe ma ara laꞌo reni nusa kota salahunuk fo rasiꞌe roken rae, ‘Dekapolis’. 32Nai mamanak naa hambu hatahori esa nggoak ma mbakek. Ndia nonoon nara roon neni Yesus neu. Ara roke-hule Yesus ndae liman neu hatahori naa, fo tao nahain. 33Boe ma Yesus laꞌo ela hatahori noꞌuk kara raa, de Ana fiti feꞌe no kada hatahori naa. Yesus tao lima kukun neni hatahori naa ndiꞌi doon dua sara dale neu. Basa boe ma Ana tao ambe neu lima kukun de nafaroe hatahori naa maan. 34Yesus nasare mbali lalai neu, de leꞌa hahaen, boe ma ana parenda pake sira dedeꞌan nae, “Efata!” (Sosoa-ndandaan nae, “Buka leo!”)

35Ana kokolak talo kada naa, boe ma hatahori naa ndiꞌi doon namanene tutik kana. Hatahori naa maan fo mana barakaik naa, bangganaꞌu tutik ka, de ana mulai kokolak no malole.

36Basa boe ma dua sara fali reni hatahori noꞌuk kara reu. Yesus ndindia sara nae, “Nenene, ee! Ei boso mafada hatahori mae, Au tao ahai hatahori ia ena.” Leo mae Yesus ndindia nahere sara, tehuu ara tui-bengga sudi nai bee. 37Hatahori fo mana ramanene tutuik naa, ara heran ralan seli. Ara bese kola rae, “Ta neni babanggak! Hatahori ia tao basan dadi neu malole. Hatahori mbakek bisa namanene. Hatahori nggoak bisa kokolak.”

Manetualain Dede'a-kokolan: Hehelu-bartaa Beuk no Tutui Makasososak

© Wycliffe Bible Translators, Inc. with  (UBB) Unit Bahasa dan Budaya

More Info | Version Index