Search form

Éxodo 13

1Ti Diose xi laj yal ti c'alal laj sc'opon ti Moisese:

2“T'ujbun loq'uel ti sba xnich'nabic ti israeletique, xchi'uc sba yoltac ti xchon bolomique, yu'un ja' cu'untac.”

3Va'i un, ti Moisese xi laj yalbe ya'i ti xchi'iltaque: “Mu xach'ay ta avo'ntonic ti c'ac'al li'e. Ja' o yorail ta smuc'ul stsatsal ti Diose, laj sloq'uesoxuc talel ta Egipto, ti bu to ox tiq'uiloxuc ta mosovile. Tsots sc'oplal ti mu xave'ic ti pan ti yich'oj spajubtasobile. 4Ti c'ac'al ta xaloq'uic batel tanae, ja' yual Abib. 5Jech me yual ta xapasic ti q'uin Colele c'alal mi j'ech'el laj xa yac' ochanic batel ti Dios ta banomil ti bu co'ol s'elan vo' ta xbein ti chu' vacaxe, ti ajapome. Yu'un ti osil taje, ja' yosilic ti cananeoetique, ti hititaetique, ti amorreoetique, ti heveoetique, xchi'uc ti jebuseoetique, ti albilic ono'ox ti amolmuc'totic ti ta xa'ac'batique. 6Vucub c'ac'al (7) sjalil ta xave'ic pan ti mu'yuc ac'bil ti spajubtasobile. Ti ta stsutseb yucubal (7) c'ac'ale, ta xapasic q'uin ta sventa yich'el ta muc' ti Diose. 7Yu'un vucub (7) c'ac'al sjalil, ta xave'ic pan ti mu'yuc yich'oj spajubtasobil ti buyuc no'ox nacaloxuque, ti tsots sc'oplal ti ch'abaluc yich'oj spajubtasobil ti pan ta xave'ique. 8Xi xavalbeic ya'iic ti anich'nabic jech c'ac'al li'e: ‘Ti jech ta jpascutic li'e, ja' senyail ti c'u s'elan laj sloq'uesuncutic talel ta Egipto ti Diose. 9Ti jech bejel ta o'ntonal avu'unic taje, co'ol s'elan avich'ojic marca ta ac'obic, mi ta ati'baic. Ti jech taje, ja' svulesobil ta ajolic ti tsots sc'oplal ta xalo'iltabe abaic ti oy c'usi tsots albil yu'un ti Diose. Yu'un ta smuc'ul stsatsal, laj sloq'uesuncutic talel ta Egipto. 10Jech o xal un, pasic ti q'uin jujun jabil ti ta x'ech' batel ti c'usi ual ta xc'ote.’

11“C'alal mi laj xa stic'oxuc ochel ti Dios ta slumalic ti cananeoetique, mi laj xa yac'boxuc ta avoc ta ac'obic xcaltique, jech c'u cha'al albiloxuc ono'ox xchi'uc ti amolmuc'totic ti ta xa'ac'batique, 12ja' yu'un un, tsots sc'oplal ta xavaq'uic ta stojol Dios scotol ti sba nich'oniletic ti ja' quereme, xchi'uc scotol ti sba yoltac ti chon bolometic ti stot chlaj voc'uque, yu'un ja' yu'un ti Diose. 13Yan ti sba yoltac ti me' burro ti stot chlaj voc'uque, sc'an jcotuc ch'iom tot chij, mi ch'iom tot tentsun ta sventa xq'uexol. Yan ti mi mu xac'beic ti xq'uexole, ac'o yich' c'asbel snuc' ti ch'iom tot burroe. Ti jujun sba nich'onil querem chlaj voq'uicuque, ac'o yaq'uic matanal ta sventa xq'uexolic. 14Mi oy bu ta xc'ot ta pasel ti xi ta xlic sjac'boxuc ti anich'nabic ta ts'acale: ‘¿C'usi smelol ti jech ta xich' pasel le'e?’ xi xatac'beique: ‘Yu'un ja' o laj sloq'uesuncutic talel ta smuc'ul stsatsal ti Dios ti c'alal tiq'uiluncutic to ox ta mosovil ta Egiptoe. 15C'alal pucujib yo'nton ti faraón ti c'alal mu xiyac' loc'uncutic talele, jech o xal ti Diose laj smilbe sba xnich'onic ti jujuchop jnaclej egipcioetique, xchi'uc scotol sba yoltac ti xchon sbolomique. Jech o xal ta xcac'becutic ta smoton Dios scotol sba yoltac ti chon bolometic ti stot chlaj voc'uque. Ja' yu'un un, ta xcac'cutic jcot matanal sventa xq'uexol ti sba nich'onil querem ta xvoq'uique. 16Ti jech taj une, co'ol s'elan oy smarcail avu'unic mi ta ac'obic, mi ta ati'baic. Ti va'i s'elan liquem ta xich' pasel taje, ja' ta xac' ta na'el ti ta smuc'ul stsatsal ti Dios laj sloq'uesuncutic talel ta Egiptoe.’ ”

Ti voletel toc ti ta xjoybij ta c'oq'ue

17C'alal laj yac' loc'uc batel israeletic ti faraone, jech ti Diose ma'uc laj yic' batel ta sbelel slumal ti filisteoetique, ac'o mi ja' tuq'uil be. Yu'un laj snop ti Diose ti mu sc'an xletovajic ti israeletic ti mi oy bu ta xc'ot ta pasele, yu'un yic'al xc'ot ta pasel ti ta xcha'sutic ta Egiptoe. 18Jech o xal un, ech' sjoy sbeic yu'un ta sbajtical banomil ti ta xc'ot ta Tsajal Nabe.

Yu'un ti c'alal loq'uic batel ta Egipto ti israeletique, svoc'ol-voc' xcholoj sbaic batel jech c'u cha'al ti soldadoetique. 19Ti Moisese laj yich'be loq'uel sbaquil ti Josee. Yu'un ti Josee laj sc'ubanbe ti xnich'nab Israele ti ac'o yalic ta jamal ti xu' ta spasic jeche. Yu'un xi laj scaj'albee: “Ta melel ta xtal scoltaoxuc ti Diose. Ja' yu'un un, ti c'alal jech ta xc'ot ta pasele, ich'beicun me loq'uel ti jbaquiltaque.”

20Ti israeletic ti iloq'uic talel ta Sucote, c'ot svol sbaic ta Etam ti bu sliqueb xa sbajtical banomile. 21Ja' jba'be batel yu'unic ti Diose. Ti ta c'ac'altique, ta xac' sba iluc ta jun voletel toc yo' jech ta xtojobtasvan batel ta be. Ti ta ac'ubaltique, ta xac' sba iluc ta jun muc' ta tilemal c'oc' yo' ta xil sbeic yu'un. Ja' jech cuch yu'unic ti xanvil ta c'ac'al ac'ubale. 22Mu'yuc ictabilic yu'un ti voletel toque. Jba'be batel yu'unic sjunul c'ac'al. Yan ti ta ac'ubale, ja' jun muc' ta tilemal leb c'oc' ta xc'ot yu'unic.