Search form

Éxodo 24

Ta xich' pasel ti c'usi ta xal ti tratee

1Ti Diose xi laj yalbe ti Moisese:

—Ti bu oyune, muyan talel xchi'uc ti Aarone, ti Nadabe, ti Abiue, xchi'uc ti lajuneb xchanvinic (70) ta vo' moletic yu'un ti Israele, ti nom nom xavac' abaic xtoque. Ti bu taje, tey xaquejan abaic. 2Yu'un ja' no'ox vo'ot xu' xanopaj talel ta jtojol. Ja'uc ti yane tsots sc'oplal ti mu me xnopajic talele. Mi ja'uc xtoc ti oy yan achi'iltac xachi'in muyel talele.

3Jech ti Moisese loc' batel, bat yalbe ya'i ti israeletic scotol ti c'u s'elan pasatic ta mantal yu'un ti Diose. Scotolic, jun sc'opic xi laj yalique:

—Ta jpascutic scotol ti c'u s'elan laj yal mantal ti Diose.

4Va'i un, ti Moisese laj sts'iba scotol ti c'u s'elan albat yu'un ti Diose. Sob xa lic ta yoc'omal. Laj smeltsan jun altar ta yoc ti vitse, ti laj slats lajcha'bej (12) t'ujbil tone, ti jujubej yu'unic ti jujuvoc' snitilultac ti Israele. 5Laj taj une, laj yalbe mantal jun chibuc querem israeletic ti ac'o smilic tot vacaxetic ti ta xac'beic ta smoton ti Diose, ti ta xchiq'uic ta sventa ti lajesobil o'ntonale. 6Jech ti Moisese laj xch'am j'olol ti ch'ich'e. Ti jlome, laj yac'anan ta yaviltac. Ti o'lole, laj svij ta altar. 7Ts'acal to un, laj stsac svunal ti tratee. Tey laj yavtabe ya'i ti israeletique. Ti stuquique xi laj yalique:

—Ta jts'etan lec jchiquincutic ta ya'yiel ta spasel ti c'u s'elan ta xal mantal ti Diose.

8Jech ti Moisese laj stsac ti ch'ich'e, ti xi laj yal ti laj svijbe ta sba ti c'u yepal tey oyique:

—Ti ch'ich' li'e, ja' ta xac' ta na'el ti lic xa abtejuc ti trate ti laj spas ti Dios ta atojolique, ti ja' sliqueb ti mu xch'ay ta be scotol ti c'opetique.

9Va'i un, ti Moisese muy batel ta vits xchi'uc ti Aarone, ti Nadabe, ti Abiue, xchi'uc ti lajuneb xchanvinic (70) ta vo' moletic yu'un ti Israele. 10Ti bu taje, xi s'elan laj yilic ti Dios yu'un ti Israele: Ti ta yoc ti bu oye, ta xac' xojobal jech c'u cha'al ti yax'elan baxtone, ti ja' xa ti yaxts'ijan vinajel stuc yilele. 11Ti Diose mu'yuc c'usi chopol laj spasbe ti banquilaletic yu'un ti israeletic ti c'alal laj yilic ti Diose. Ve'ic yuch'ic vo' xtoc.

Ti Moisese oy ta vits Sinaí

12Va'i un, ti Moisese xi albat yu'un ti Diose:

—Muyan batel ta vits ti bu oyune. Tey xamalaun, yu'un ta xcac'bot jpech cha'pechuc ton, ti bu laj jts'iba ti oy c'usi tsots sc'oplal albile, xchi'uc ti jmantaltaque yo' jech ta xachanubtas ti israeletique.

13Jech ti Moisese, xchi'uc ti Josué ti ja' yajcoltaobbae, muyic batel ta vits yu'un ti Diose. 14Xi laj yalbe ya'i ti moletique:

—Malauncutic li'e, ja' to ti mi lisutcutic talele. Yu'un li' ta xcom xchi'inoxuc ti Aarone xchi'uc ti Hure. Ti mi oy buch'u oy sc'ope, ac'beic xchapan.

15C'alal jech laj yal ti Moisese, muy batel ta vits ti ja' volibil ta toque. 16Va'i un, ti yutsilal slequilal ti Diose, c'ot ta vits Sinaí. Vaquib (6) c'ac'al volibil ta toc. Ta yucubal (7) c'ac'al un, c'oponat talel ti Moisés ta toc yu'un ti Diose. 17Ti yutsilal slequilal ti Diose, laj yac' sba iluc ta sba ta sat ti israeletique jech c'u cha'al junuc c'oc' ti ta xchic'van ti c'ot ta toyol vitse. 18Ti Moisese och batel ti bu ti toque, yu'un muy batel ta vits. Joc'tsaj cha'vinic (40) c'ac'al xchi'uc cha'vinic (40) ac'ubal.