Search form

Éxodo 27

Ti c'anal taq'uin altare

(Ex 38.1-7)

1“Meltsano junuc altar ta acacia te' ti co'ol sjamlej xchanjotale, ti ja' buluch-ch'ix xchi'uc o'lol jquejlej (2.25mts.) ti jujujote, ti vac-ch'ix xchi'uc o'lol jquejlej (1.25mts.) ti stayleje. 2Meltsanbo chanib xulub. Jujun xavac'be ti jujujot xchiquine, ti snitoj sba xchi'uc ti altare. 3Scotol ti c'usi ta xtun ti ta altare, xi s'elan ti ta xich' meltsanel ta c'anal taq'uine: ti xch'amlebtac tanil c'oq'ue, ti slupobile, ti lech-lech taq'uinetique, ti slats'obiltac ac'ale, ti yaviltac stileb ac'ale. 4Meltsano xtoc chaj-chaj c'anal taq'uin. Ac'bo xot-xot c'anal taq'uin ta jujujot xchiquin. 5Va'i un, ti chaj-chaj taq'uine, joc'ano yalel ta yolon svelbenal sti' ti altare yo' jech smacoj lec ta xc'ot o'lol ti c'u staylej ti altare. 6Meltsano xtoc ta acacia te' sc'atlomte'altac ti altare. Bono ta c'anal taq'uin. 7Ti sc'atlomte'ale, tey ta xich' xojel jelavel ta sat ti xotbil c'anal taq'uine, ti c'atal ta xcom ta jujujot xocon ti altare yo' jech xu' ta xtun ta sventa xchechobil. 8Ti altare, sc'an pujul yut ti meltsanbil ta tenel-te'e, co'ol jech c'u cha'al laj avil ta vitse.

Yamaq'uil ti Axibalnae

(Ex 38.9-20)

9“Meltsano yamaq'uil ti Axibalnae. Ti xi ta stuq'uil yolon ti yac'ol xocon sloq'ueb c'ac'al yu'un ti amaq'ue, lich'ano batel saquiquil poc' ti polajtic sts'otbenale, ti yich'oj vo'ob yoxvinic (45) metro ti snatile. 10Ac'bo jtob ta bej yoyal, xchi'uc jtob stsaclebtac yoc ti naca ta c'anal taq'uine. Jech xtoc ti sluc-luc taq'uinaltaque xchi'uc ti xot-xot staq'uinaltaque, ja'uc me naca plata ta xich'. 11Ja' no'ox jech xtoc ti jot ti xi oy ta stuq'uil yolon ti yolon xocon sloq'ueb c'ac'ale, ta xajoc'anbe poq'uetic ti vo'ob yoxvinic (45) metro snatil yich'oje, jtob (20) ta bej yoyal xchi'uc jtob (20) spajlebtac ti meltsanbil ta c'anal taq'uine, xchi'uc sluc-luc taq'uinaltac xchi'uc xot-xot taq'uinaltac ti meltsanbil ta platae. 12Yan ti jot xocon ti xi oy ta yeloval smaleb c'ac'ale, chib xcha'vinic metro xchi'uc o'lol (22.50mts.) sjamlej ta xalich'an batel ti poq'uetique. Ti ja' jech sjamlej ti amaq'ue, ta xich' lajuneb yoyal xchi'uc lajuneb spajlebtac. 13Yan ti jot xocon ti xi oy ta yelov sloq'ueb c'ac'ale, ti c'u sjamlej ti yamaq'uile, ja' no'ox jech chib xcha'vinic metro xchi'uc o'lol (22.50mts.) ti ta xajoc'anbe batel ti poq'uetique. 14Yan ta jot xocon ti bu oy ti ochebale, vucubuc metro sjamlej ta xich' joc'anbel ti poq'uetique, xchi'uc oxib yoyal, xchi'uc oxib spajleb. 15Jech xtoc ti jot xocon ti bu oy ti ochebale, vucubuc metro sjamlej ta xich' joc'anbel ti poq'uetique, xchi'uc oxib yoyal, xchi'uc oxib spajleb. 16Ti ta ochebal yamaq'uile, oyuc me baluneb metro sjamlej poq'uetic ti ic'-ic' losantic sba stsajale, ti yax'elan xyaxale, ti tsajal poq'ue, ti saquil poc' ti polajtic sts'otbenal ti luchbil lec xnichimale. Oyuc xtoc chanib yoyal xchi'uc ti chanib spajlebe. 17Scotol ti yoyaltac ti oy ta sjoylej ti amaq'ue, bats'i platauc me yich'oj ti xot-xot staq'uinaltaque, ti sluc-luc taq'uinaltaque, ta c'anal taq'uinuc me ti spajlebtac yoyale. 18Ti yamaq'uile, ja'uc me vo'ob yoxvinic (45) metro ti snatile. Ja'uc o'loluc yoxvinic (22.50) metro sjamlej ti jujujote. Ti staylej ta jujujote, yich'ojuc buluch-ch'ix xchi'uc o'lol jquejlej (2.25mts.). Ti smaque, ja'uc me bats'i saquil poc' ti polajtic sts'otbenale, xchi'uc c'anal taq'uin ti spajlebtac yoyale. 19Scotol ti c'usitic ta xtun ti c'alal ta spasbeic yich'obil ta muc' Dios ti ta Axibalnae, nacauc ta c'anal taq'uin jech c'u cha'al ti spajobte'altaque, xchi'uc ti spajobte'altac ti ta xtun ta yamaq'uile.

Yaceiteal ti lamparaetique

(Lv 24.1-4)

20“Albo ya'iic ti israeletique ti ac'o yich'ic talel ti bats'i yaceiteal olivoe yo' jech oy o ya'lel ti lamparaetic ta xtile. 21Jech ti Aarone xchi'uc ti xnich'nabe ta sbainic ta sq'uelel ti lamparaetique yo' jech tsanal sbejel ac'ubal ta stojol Dios ta ch'ul cuarto ti bu nupel ta be xchi'uc Dios ta yeloval ti bu lich'il ti muc' ta poc' ti ja' smacoj ti xcaxail tratee. Ti va'i s'elan taje, ja' jbel ti tsots sc'oplal ti ch'unbil ta xc'ot ti jech ac'o spasic o ti israeletic xchi'uc ti snitilulique.