Search form

Génesis 19

Ti Diose ta stubbe sts'unubal ti jteclum Sodomae xchi'uc ti jteclum Gomorrae

1Ta xa x'ic'ub talel osil c'alal c'ot ti chib ánjeletic ta jteclum Sodomae. Jech ti Lote, ja' o chotol ta ochebal yu'un ti jteclume, ti bu ono'ox ta xc'ot stsob sbaic ti jnaclejetique. C'alal jech laj yile, va'i batel ta snupel ta be, ti snupilan xa banomil laj spatan sba ta lume. 2Va'i un, xi laj yale:

—Jtot jme'tac, abolajanic, avocolicuc, ech'uc avu'unic ti ac'ubaltic ta sna ti avajtunelune. Xu' xapoc avacanic tey. Sob oc'om xu' xatam batel ti abeique.

Ti stuquique xi laj yalique:

—Mo'oj, colaval. Xu' ta x'ech' cu'uncutic ti ac'ubal ta osiltique.

3Manchuc mi jech laj yalic un, ti Lote tey ono'ox mu xa'ibe xchiquinal ta pajesvanej. Jech o xal un, ch'unbat, jmoj batic xchi'uc ta snae. C'alal c'otique, jech ti Lote lic xchapan lec xoc' xch'utic, yu'un laj smeltsan pan ti ch'abal yich'oj spajubtasobile. Jech ti jvu'laletique ve'ic.

4Mu'yuc to ta xvayic c'alal ja' o xc'uletic c'otel scotol viniquetic yu'un ti jteclum Sodomae, c'alal ta moletic ta queremetic, svoliojic c'otel ti nae. 5Xi lic yavtaic ti Lote:

—¿Bu oy ti viniquetic ti talic ta ana ti ac'ubal li'e? ¡Loq'ueso talel! ¡Yu'un ta jc'an ta jchi'in ca'icutic ta vayel!

6Va'i un, ti Lote laj smac lec comel ti sti' sna c'alal bat sc'opon ti viniquetique. 7Xi laj yale:

—Avocolicuc, chi'lactic, mu xapasic ti c'usi toj chopol ta j'ech'ele. 8Oy li' chib cantsil nich'on mu'yuc to yilojic viniquetic, ja' ta jloq'uesboxuc talel yo' jech xu' xapasic ta stojol ti c'usi lec ta xava'iique. Ja'uc ti viniquetic li'e, mu xapasbeic ti c'usi chopole, yu'un ja' cajvu'laltac.

9Ja'uc ti stuquique xi laj staq'uique:

—¡Q'uejo aba loq'uel! C'usi xa ono'ox xal o ta xtal spasuncutic ta mantal jyanlum jech c'u cha'al ti vo'ote. Avi tana li' une, ta xcac'cutic ep avocol ta yilbajinelot, ja' mu sta ta xich' ti stuquique.

Ta jech to yepal lic yilbajinic ti Lote, nopajic batel ta ti'nae yo' jech ta svoq'uic ochel. 10Jech ti yajvu'laltac ti Lote laj xach'ic loq'uel ti sc'obique, laj snitic ochel ta yut na ti Lote. Laj smaquic lec ti ti'nae. 11Ja'uc ti viniquetic ti comic ta pat ti'nae, pas ta ma'satetic yu'unic. Yu'un scotolic comic ta ma'sat ti moletic xae xchi'uc ti queremetic toe. Va'i un, lubtsajic ta sa'olanel ti ti'nae. 12Ti jvu'laletique xi laj yalbeic ti Lote:

¿Mi oy to yan avuts' avalaltac li' ta jteclume? Ic'o loq'uel ti aqueremtaque, ti atsebtaque, ti ani'obtaque, xchi'uc scotol ti c'usi x'ayan avu'un ta jteclum li'e. Loq'ueso batel. Ic'o batel ta nom. 13Yu'un ta jtubbecutic sts'unubal ti jteclum li'e. Yu'un xa ep c'ot parteal ta stojol Dios ta scoj ti jteclum li'e. Jech o xal laj stacuncutic talel ta stubbel sts'unubal ti jteclum li'e.

14Jech ti Lote bat sq'uel ti sni'obtac ti ja' to no'ox smacojic ti tsebetique, ti xi laj yalbe ya'iique:

—¡Batanic, loc'anic batel li'e, yu'un ti Diose ta stubbe sts'unubal ti lum li'e!

Ja' no'ox un, ti sni'obtaque mu'yuc laj xch'unic ti va'i s'elan albat yu'un ti Lote. 15C'alal po'ot xa sacub talele, ti ánjeletique xi laj yalbeic ti Lote:

—Sujo aba, batan ta anil. Ic'o batel ti avajnile xchi'uc ti cha'vo' avantsil nich'one mi mu xac'anic ti jmoj capal ta xachamic c'alal ta xcac'becutic castigo ti lum li'e.

16Ti ánjeletic ti xch'ayet no'ox ta xilic ti Lote, laj snitbeic batel sc'ob, ja' ti tal to xc'uxul yo'nton ti Dios ta stojole. Ja' jech xtoc nitbil batel sc'ob ti yajnile xchi'uc ti yantsil nich'one. Loq'uesatic batel ta lum yo' jech ta xcolic. 17C'alal loq'uic xa batel ta lume, ti jun ánjele xi laj yalbe ti Lote:

—Anilajan, pojo aba. Mi ja'uc xaq'uel sutel tal apat. Mi ja'uc xapajes aba ta xanobal ta stenlejtic. Batan c'alal to te'tic mi ta to xac'an ta xach'i xac'opoj ava'ie.

18Ja' no'ox un, ti Lote xi laj yalbee:

—¡Mu xapasic jech, jtot jme'tac, avocolicuc! 19Yu'un ti vo'oxuque ep laj acoltaicun. Yu'un toj lec avo'ntonic laj apojicun ti mu'yuc xichame. C'u stu un, mu xa xic'ot ta vitstic. Yu'un yic'al staun ta be ti tsots vocole, ja' to licham unbi. 20Oy ch'in jteclum ti li' no'ox nopole ¡Ac'o ave ati' jatavcuncutic batel ti bu taje yo' jech mu xicham! Ta melel teye, ja' uni biq'uit jteclum.

21Xi albat yu'un ti june:

—Laj xa ca'i, ja' jech ta jpas jech c'u cha'al laj ac'ane. Mu'yuc ta jtubbe sts'unubal ti jteclum laj avalbun sc'oplal taje. 22Ja' no'ox un, xanavan no'ox me ach'a un. Batan, yu'un mu'yuc c'usi xu' stac' ta jpas mi mu to ta xac'ot teye.

Jech o xal un, laj sbiin Zoar ti jteclum taje.

23C'alal ta xa sacub ti osile, ti Lote c'ot xa ox ta Zoar. 24Jech ti Diose laj yac' taluc c'oc' xchi'uc azufre. Yal talel ta sba ti jteclum Sodomae xchi'uc ti jteclum Gomorrae. 25Jmoj laj stubbe sc'oplal, xchi'uc scotol ti c'usi cuxajtique, xchi'uc ti c'usi xch'i ta stenlejaltique. 26C'u stu un, yajnil ti Lote lic sq'uel sutel spat ti jech nabal batele, va'al icom o un. C'ataj ta ats'am ton ti bu taje.

27Sob xa ta yoc'omal un, ti Abrahame bat ti bu laj sc'opon sbaic xchi'uc ti Diose. 28Laj sq'uel batel ta stuq'uil bu oy ti jteclum Sodomae, xchi'uc ti jteclum Gomorrae, xchi'uc scotol ti stenlejaltique. Laj yil ti xtomet no'ox ta xmuy batel xch'ailal ti co'ol s'elan xch'ailal jun jornoe. 29Ja' jech c'ot ta pasel yu'un Dios ti laj stubbeic sc'oplal ti jteclumetic oy ta stenlejaltique, ti bu to ox nacal ti Lote. Ja' no'ox un, ti Diose laj to svules ta sjol c'usi sc'anoj ti Abrahame. Jech o xal laj sloq'ues batel ti Lot bu oy ti vocole.

Xi s'elan lic talel sts'unubalic ti moabitaetique xchi'uc ti amonitaetique

30Ti Lote lic xi'uc ti jech nacal ta Zoare. Bat nacluc ta muc'tiquil vitstic xchi'uc ti chib yantsil nich'one. Naquiic ta jun nail ch'en. 31Oy jun c'ac'al, ti vixile xi laj yalbe ti smuque:

—Mol xa ti jtotique. Ti jech li' nacalotique, mu'yuc viniquetic ta xiyic'otic jech c'u cha'al oy ono'ox sc'oplale. 32Ja' lec, la' jyacubtastic ti jtotic un cha'e. Vaycutic xchi'uc yo' jech ta xcolinbetic ti xnich'one.

33Ta ac'ubaltic taj une, laj yac'beic yuch' vino ti stotique. Ti vixil une vay xchi'uc ti stote. Jech ti stot une mi ja'uc laj ya'i c'usi ora ay taatuc, c'usi ora loc' batel. 34Ta yoc'omal un, ti vixile xi laj yalbe ti smuque:

—Ay ava'i, ti samele laj jchi'in ta vayel ti jtotique. Ti ac'ubaltic tana li'e, ta jyacubtastic xtoc yo' ta xachi'in ta vayel ec, yo' jech ta xcolinbetic ti xnich'one, yo' jech oy coltic ti jchibaltique.

35Ti jech ac'ubal taje, laj xcha'yacubtasic ta vino ti stotique. Jech ti muquile laj xchi'in ta vayel ti stote. Jech ti Lote mi ja'uc laj ya'i ti c'usi ora ay taatuc, c'usi ora loc' batel. 36Jech ti cha'vo' yantsil nich'on Lote, lic xchi'in yolic ta sventa ti stotique. 37Voc' yol ti vixile. Laj yac'be sbi Moab, totil yu'unic ti moabitaetc avi tana li'e. 38Jech ti muquile, voc' ti yole. Laj yac'be sbi Ben-amí, totil yu'unic ti amonitaetic avi tana li'e.