Search form

Números 4

Ti yabtelic ta xich'ic ti levitaetique

1Ti Diose xi laj yalbe ti Moisés xchi'uc ti Aarone ti c'alal laj sc'opon talele:

2“Liqueso tsacob-biil ti jvoc' ta sventa ti jujuchop totil me'iletic yu'un ti levitaetic ti ja' snitilultac ti Coate. 3Tsacbo ta vun sbiic ti buch'utic yich'ojic xa lajuneb xcha'vinic (30) jabile, ti xc'ot c'alal to ta lajuneb yoxvinic (50) jabile, ti baxbolic ta sventainel ti Axibalna ti bu nupel ta bee.

4“Ti yabtelic ta xich'ic snitilultac ti Coate, yu'un ja' ch'ul abtel ta j'ech'el ti xi s'elane: 5C'alal ta xc'ot ta pasel ti ta xlic stam batel sbeic ti israeletique, jech ti Aarone xchi'uc ti xnich'nabe ta sjitunic ti muc' ta poc' ti lich'il ta ochebal sti' ti Bats'i Cuxul Ch'ul Cuartoe, ti ja' smacoj o xcaxail ti tratee. 6Ti ta sba xcaxaile, ta slamanic batel jayc'oluc jun yutsiquil nucul. Ti ta sba taje, ta slamanbeic talel jc'ol jun yutsil ic'-ic' losantic tsajal poc' ti jlic no'ox meltsanbile. Tey ta xac'beic te'etic yo' jech ta xich' chechel batel. 7Ta slamanic xtoc jlic ic'-ic' losantic tsajal poc' ta sba mexa ti oy ta jtojolale. Ti ta sbae, ta xaq'uic ti sets'etique, ti muc'tic lechetique, ti bisetique, ti jarruetic ti ja' yaviltac ti vinoe, xchi'uc ti pan ti ta xich' aq'uel jujun c'ac'al ti mu'yuc ac'bil ti spajubtasobile. 8Ti ta sba scotol taje, ta sq'uibeic talel jlic tsajal poc', xchi'uc ta smaquic ta jaylicuc ta jun yutsiquil nuculetic, xchi'uc ta xac'beic te'etic yo' jech ta xich' chechel batel. 9Mi laj taj une, ta stsaquic talel jlic ic'-ic' losantic tsajal poc' ti ja' ta smaquic o ti pajleb cantilae, ti lamparaetique, ti slots'obil ac'ale, ti bic'tal sets'etique, xchi'uc scotol ti vasuetic ti ta xtun yu'unic ta yavil aceitee. 10Scotol taj une, ta xich' volel ta jun yutsiquil nuculetic, ti ta scajanic ta ba te'etic yo' jech ta xich' chechel batele.

11“Ja' jech xtoc ta slambeic talel junuc ic'-ic' losantic tsajal poc' ta sba ti altar ti ja' oroe, ti ta svolic ta junuc yutsiquil nucule. Tey ta scajanic batel te' yo' jech ta xich' chechel batel. 12Mi laj taj une, ta xlic stsobic ti c'usitic jtunel ta sventa ti Bats'i Cuxul Ch'ul Cuartoe. Ta svolic ta jlicuc ic'-ic' losantic tsajal poc', xchi'uc ta svolic ta jun yutsiquil nucul, ti chechbil ta xbat ta te' yu'unique. 13Yu'un tsots sc'oplal ta scusic lec ti xepu'e xchi'uc ti tan ti oy ta altare. Ts'acal to un, ta svolic ta yax'elan poc'. 14Ti c'usitic ta xtun ta ch'ulna ta sventa ti c'usi ta xich' ch'unele, xi s'elan ti c'usitic ta xich' scajanel batel scotol ta sbae: Ti xch'amleb ac'ale, ti slots'obiltaque, ti slupobile, ti lech-lech taq'uine, ja' xa ti c'usitic ta xtun ta altare, scotol taje, ta svolic batel ta jun yutsiquil nucul, ti ta xac'beic te' yo' jech ta xich' chechel batele. 15C'alal mi laj xa svolic lec ta pixel ti Aarón xchi'uc ti xnich'nabe scotol ti trasteetic ti ac'bil xa ta ventainele, ti chapalic xa ta stam batel ti sbeique, xu' ta xtalic snitilultac ti Coate yo' jech ta xchechic batel scotol ti c'usitic taje. Ja' no'ox un, ti c'usitic ac'bil xa ta ventainele, mi ja'uc xu' ta spiquic yo' jech mu xchamic. Yu'un scotol ti c'usitic oy ta Axibalna ti bu nupel ta bee, ja' sbainojic ta xchechel batel snitilultac ti Coate. 16Ti Eleazar ti ja' xnich'on ti pale Aarone, ja' ta sbain ta sq'uelel ti aceite yu'un ti lamparaetique, ti muil pome, ti matanal sat ts'unubiletic ti ta ono'ox xiyac'beique, xchi'uc ti jtunel aceitee. Ja' jech xtoc ja' ta sbainic ta sq'uelel ti Axibalnae xchi'uc scotol ti c'usitic x'ayane, xchi'uc xchaplej lec ti c'usitic ac'bil xa jelavel ta ventainele.”

17Ti Diose xi laj yalbe ti Moisés xchi'uc ti Aarone ti c'alal laj sc'opon talele:

18“Mu xavac' ave ati' ti ta xtub sts'unubalic jujuchop snitilultac ti Coat ta stojol ti levitaetique. 19Yo' jech mu sta svocolic ta xchamic ta scoj ti ta spiquic ti c'usitic ac'bil xa jelavel ta ventainele, tsots sc'oplal ti xi s'elane: Ti Aarón xchi'uc ti xnich'nabe, ja' ta sbainic ta yalbel ta jujun tal ti c'usi spasique, xchi'uc ti c'usitic ta xich'ic batele. 20Ja' yu'un un, mi sbalin to xa'i sbaique, mi ja'uc xu' x'ochic ta sq'uelelic ti c'usitic ac'bil xa jelavel ta ventainele.”

21Ti Diose xi laj yalbe ti Moisés ti c'alal laj sc'opon talele:

22“Liqueso junuc tsacob-biil xtoc ta jujuvoc' ti jujuchop snitilultac ti Gersone, 23ja' ti buch'utic yich'ojic xa lajuneb xcha'vinic (30) jabile, xchi'uc ti xc'ot c'alal ti buch'u yich'oj xa lajuneb yoxvinic (50) jabile, ti baxbolic ta tunel ta Axibalna ti bu nupel ta bee.

24“Ti yabtelic ti snitilultac ti Gersone, xi s'elan jech c'u cha'al li'e: 25Ja' yabtelic ta xich'ic batel ti poq'uetic yu'un ti ch'ulnae, ti Axibalnae, ti jun yutsiquil nucul ti ja' yaxibe, ti poc' ti oy ta ochebal sti' ti Axibalna ti bu nupel ta bee. 26Ma'uc no'ox taje, ta xich'ic batel xtoc ti poq'uetic ti ja' smac ti yamaq'uile, ti poc' ti oy ta ochebal sti' ti amac' ti ja' sjoyoj ta maquel ti Axibalnae xchi'uc ti altare, ti jujutos yaq'uiltaque, xchi'uc scotol ti abtejebaletic ta xtun ta sventa ti yabtelique. 27Ti Aarone xchi'uc ti xnich'nabe, ja' ta sbainic ta stojobtasel snitilultac ti Gersone ta scotol ti yabtelic ti sc'an pasele, xchi'uc ti c'usitic ta xchechic batele. Vo'oxuc ta xabainic ta yalbel ti c'usitic ta spasique. 28Ja' jech yabtelic ta xich'ic ti jujuchop snitilultac ti Gersone, ti ta xtunic ta Axibalna ti bu nupel ta bee, ti ja' tojobtasbilic yu'un ti Itamar ti ja' xnich'on ti pale Aarone.

29“Liqueso junuc tsacob-biil xtoc ta sventa ti jujuchop snitilultac ti Merarie. 30Tsacbo ta vun sbiic ti buch'u yich'ojic xa lajuneb xcha'vinic (30) jabile xchi'uc ti xc'ot c'alal ti buch'u yich'oj xa lajuneb yoxvinic (50) jabile, ja' ti buch'utic baxbolic ta xtunic ta Axibalna ti bu nupel ta bee. 31Ti smelol ti yabtel ta xich'ic ta sventa yu'un ti Axibalna ti bu nupel ta bee, ja' ta sbainic ta yich'el batel stenel-te'altac ti ch'ulnae, ti sc'atlomte'altaque, ti yoyaltaque, ti spajlebtaque. 32Ma'uc no'ox taje, ja' ta sbainic ta yich'el batel xtoc ti oyetic ti ta xtun ta sjoylej smac ti ch'ulnae, ti spajlebtaque, ti spajobte'altaque, ti yaq'uiltaque, xchi'uc scotol ti c'usitic ta xtun ta sventa yabtelique. Vo'ot ta xavalbe jujunic ti c'usitic ta xich'ic batele. 33Ja' jech smelol yabtelic ta Axibalna ti bu nupel ta bee, ti ta sbainic ti jujuchop snitilultac ti Merarie, ti ja' tojobtasbilic yu'un ti Itamar ti ja' xnich'on ti pale Aarone.”

34Ti Moisese, ti Aarone, xchi'uc ti banquilaletic yu'un ti israeletique, laj stsacbeic sbi ti jujuvoc' ta jujuchop snitilultac ti Coate, 35ja' ti buch'u yich'ojic xa lajuneb xcha'vinic (30) jabile, xchi'uc ti xc'ot c'alal ti buch'u yich'ojic xa lajuneb yoxvinic (50) jabile, ti baxbolic ta xac' sbaic ta tunel ta Axibalna ti bu nupel ta bee. 36Ti c'u yepal loc' ta chapel ti viniquetic ti laj xa yich' tsacbel ti sbiique, ja' loc' ta chapel ta scotole cha'mil xchi'uc o'lol xvaxaquibal ciento (2,750) ta vo'. 37Ja' jech yepal loc' ta chapel snitilultac ti Coate ti ta xac' sbaic ta tunel ta Axibalna ti bu nupel ta bee, ti c'u s'elan laj spas tsacob-biil ti Moisese, ti Aarone, ti ja' co'ol s'elan jech c'u cha'al albat mantal ti Moisés yu'un ti Diose.

38Ti ja' sc'oplal jujuvoc' ti jujuchop snitilultac ti Gersone, 39ti yich'ojic xa lajuneb xcha'vinic (30) jabile, xchi'uc ti xc'ot c'alal to ti buch'u yich'ojic xa lajuneb yoxvinic (50) jabile, ti baxbolic ta xac' sbaic ta tunel tey ta Axibalnae, 40ja' loc' ta chapel cha'mil xchi'uc lajuneb xcha'vinic yucubal ciento (2,630) ta vo'. 41Ja' jech yepal loc' ta chapel snitilultac ti Gersone, ti xu' yu'unic ta xac' sbaic ta tunel ta Axibalna ti bu nupel ta bee c'alal tsacbatic ti sbiic yu'un ti Moisese xchi'uc ti Aarone ta sventa smantal ti Diose.

42Laj yich' chapel xtoc ti jujuvoc' ta jujuchop snitilultac ti Merarie, 43ti yich'ojic xa lajuneb xcha'vinic (30) jabile, xchi'uc ti xc'ot c'alal ti buch'u yich'ojic xa ta lajuneb yoxvinic (50) jabile, ti baxbolic ta xac' sbaic ta tunel ta Axibalna ti bu nupel ta bee. 44Ja' loc' ta chapel xtoc ta scotol oxmil xchi'uc lajunvinic (3,200) ta vo'. 45Taje, ja' jech yepal snitilultac ti Merarie, ti xu' yu'unic ta xac' sbaic ta tunel ta Axibalna ti bu nupel ta bee, ti c'alal laj stsaquic biil ti Moisese xchi'uc ti Aarone, ja' co'ol s'elan jech c'u cha'al albat mantal ti Moisés yu'un ti Diose.

46Ti c'u yepal ta scotolic ti levitaetic ti laj yich'ic chapel yu'un ti Moisese, ti Aarone, xchi'uc ti banquilaletic yu'un ti israeletique, ti jujuvoc' yu'un ti jujuchop xchi'uc ti xnich'nabique, 47ti yich'ojic xa lajuneb xcha'vinic (30) jabile, xchi'uc ti xc'ot c'alal ti buch'u yich'ojic xa ta lajuneb yoxvinic (50) jabile, ti baxbolic ta xac' sbaic ta tunel ta Axibalna ti bu nupel ta bee, 48ja' loc' ta chapel, vaxacmil xchi'uc chanvinic svaquibal ciento (8,580) ta vo'. 49Ti tsacob-biil ti laj yich' pasel taje, ja' co'ol s'elan jech c'u cha'al albat ono'ox mantal ti Moisés yu'un ti Diose. Jech xtoc albatic ta jujun ti c'usi ta spasique xchi'uc ti c'usi ta xich'ic batele, ja' co'ol xchi'uc jech c'u cha'al albat mantal ti Moisés yu'un ti Diose.