Search form

Deuteronomio 2

Te xjoyetic ta xocol banamil cha'vinic (40) jabil li israeletique

1“Ts'acal to lijloc'utic batel ta xocol banamil, lijbatutic ta sbelal Tsajal Nab jech chac c'u cha'al yalojbun ono'ox li Muc'ul Diose. Ep c'ac'al te xijoyetutic ta vitsetic yu'un Seir. 2Li Muc'ul Diose jech laj yalbun: 3‘Ep xa c'ac'al ti li' no'ox xajoyetic ta vitsetique. Li' ta orae, batanic xa te ta stuq'uil norte. 4Jech xavalbe ya'yic scotol li achi'iltaque: Batanic, te xajelovic batel ta yosilal li smomnich'nabtac Esaue, ja' ti jun amoltot achi'uquic ta vo'one, ti te nacalic ta Seire. Pero li stuquique ta xi' avu'unic, ja' yu'un li vo'oxuque lecuc me avo'ntonic. 5Mu me xbat acontrainic yu'un mu'yuc chacac'boxuc jutebuc li yosilique, yu'un li osil te ta Seire ja' cac'ojbe o ta sventaic li smomnich'nabtac Esaue. 6Ja' no'ox albeic ti ac'o xchonboxuc li ave'elique xchi'uc li vo' chavuch'ique, pero tojbeic me, uto li achi'iltaque’, xiyutun li Muc'ul Diose. 7Li Muc'ul Dios cu'untique yac'ojboxuc xa bendición ta sventa scotol li c'usi chapasique. Te xchi'inoxuc o ti c'alal te chaxanovic ta muc'ta xocol banamil cha'vinic (40) jabile. La xchi'inoxuc scotol c'ac'al ti buyuc no'ox laxanovique, jech mu'yuc c'usi sc'an avu'un laj ava'yic.

8“Jech la jcomtsantic li sbelal Arabá chlic tal ta Elat xchi'uc ta Ezión-gebere. Te lijelovutic tal ta yosilalic li cuts' calaltique, ja' li smomnich'nabtac Esaú ti te nacalic ta Seire. Te la jpastic velta, ja' la jtambetic batel sbelal li xocol banamil te ta Moabe. 9Li Muc'ul Diose jech laj yalbun: ‘Mu me xavuts'intaic li moabetique. Mu me xapasic c'op achi'uquic, yu'un ja' smomnich'nabtac li Lote. Mu'yuc chacac'boxuc jutebuc li yosilique, yu'un ja' cac'ojbe sventainic scotol li osil te ta Are’, xiyutun. 10Ta vo'onee ja' to'ox te inaquiic li cristianoetic ti emita sbiique, ja' li muc'tic viniquetic ti toj epique xchi'uc ti toj natic, jech chac c'u cha'al li smomnich'nabtac Anaque. 11Li cristianoetique la xch'unic ti ja' sts'unubalic li refaetique, ac'o me emitas i'ac'batic sbiic yu'un li moabetique. 12Li osil te ta nopol Seire, te to'ox inaquiic ta vo'one li horetique, pero li smomnich'nabtac Esaue la snutsic loq'uel. La smilic, jech laj yich'beic li yosilique. Te inaquiic o jech chac c'u cha'al la jpastic ta jlumaltic ti bu laj yac'butic Diose. 13Jech laj yal li Diose: ‘Batanic, ech' tuch'ic li uc'um Zerede’, xi. Jech te lijelovutic batel ta jot uc'um.

14“C'alal lijloc'utic tal ta Cades-barnea c'alal to lijelovutic tal ta jot uc'um Zerede, i'ech' xa'ox vaxaclajuneb xcha'vinic (38) jabil. Ichamic xa'ox scotol li boch'otic xu' yu'unic paspleito c'alal te inaquiic ta scarpanaique, yu'un jech ono'ox yalojbutic Dios ti te chchamique. 15Ja' yu'un li Diose laj yac' chamicuc ta stsatsal svu'el. Jech te ichamic scotolic.

16“C'alal chamenic xa'ox scotol li boch'otic xu' xa'ox yu'unic paspleitoe, 17li Muc'ul Diose la sc'opanun. Jech laj yalbun: 18‘Tana chajelovic batel ta yosilal li Moabetique. Tuc' xabatic ta Ar. 19Pero c'alal chac'otic te yo' bu nacal li amonetic, ja' li smomnich'nabtac Lote, mu me xavuts'intaic. Mu me xapasic pleito achi'uquic. Yu'un mu xu' chavich'beic jutebuc li yosilique, ja' yu'un stuquic cac'ojbeic’, xi. 20Ta banamil le'e ja' to'ox te inaquiic ta poco' vo'one li refaetique. Li amonetique zomzomeo laj yac'beic sbi. 21Li slumalic to'oxe bats'i muc', xchi'uc bats'i epic noxtoc. Lec natil viniquetic jech chac c'u cha'al li smomnich'nabtac Anaque. Pero li Muc'ul Diose laj yac' ti ac'o bat smilic li amonetique. Jech te laj yich'beic o comel li yosilique; te inaquiic o. 22Ja' co'ol jech chac c'u cha'al la spasic li smomnich'nabtac Esaú ti te inaquiic ta Seire yu'un la smilic scotol li horetique, jech laj yich'beic comel li yosilique. 23Ja' co'ol jech chac c'u cha'al ic'ot ta pasel ta stojolic noxtoc li hevetic ti te to'ox nacalic ta tsobtsobnaetic ta nopol Gazae. Pero imilatic yu'un li filistaetic ti iliquic tal ta Cretae. Jech te inaquiic o. 24Jech laj yalbutic noxtoc li Muc'ul Diose: ‘Batanic; xanovanic; jelovanic batel ta jot uc'um Arnón. Vu'un ta xcac'boxuc ta ac'obic li amorreo vinic, Sehón sbie, ja' li muc'ta ajvalil te ta Hesbone, chacac'boxuc ta ac'obic c'alal ta yosilal. Ochanic batel ta yosilal, bat pasic pleito achi'uquic ta ora. 25Tana ta xcac' ti chlic xi'icuc avu'unic scotol li cristianoetic li' ta banamile. C'alal cha'yic ac'oplalique ta xlic nicuc yo'ntonic ta xi'el’, xi li Muc'ul Diose.

Li israeletique la stsalic ajvalil Sehón

(Nm 21.21-30)

26“C'alal te oyutic ta xocol banamil Cademote, la jtac batel boch'o chbat slequil c'opan li Sehone, ja' li ajvalil ta Hesbone. Jech c'ot yalbe: 27‘Ta jc'an chijelovcutic batel ta avosilal. Ja' no'ox ta jt'uncutic batel li muc'ul bee. Mu'yuc chi'ochcutic ta yut avosilal. 28Li jve'elcutique xchi'uc li vo' chcuch'cutique ta jtojcutic. Ja' no'ox ta jc'anbot me xavac' xijelovcutic batel ta avosilalic 29jech chac c'u cha'al laj yac' jelovcuncutic li smomnich'nabtac Esaú te nacalic ta yosilal Seire, xchi'uc li moabetic te nacalic ta yosilal Are, ja' to me lijelovcutic batel ta jot uc'um Jordán, me lic'otcutic yo' bu chiyac'bun cosilcutic li Muc'ul Diose, ja' li Dios cu'uncutique’, xut c'otel.

30“Pero li ajvalil Sehone muc xac' jelovcutic batel ta yosilalic, yu'un li Muc'ul Dios cu'untique la stsatsubtasbe yo'nton ta sventa xu' chijyac'butic ta jc'obtic jech chac c'u cha'al oy xa ta jc'obtic li' ta orae.

31“Ja' yu'un li Muc'ul Diose jech laj yalbun: ‘Li' ta orae ta xcac'bot ta ac'ob li ajvalil Sehone xchi'uc scotol li yosilale. Ochanic batel. Ich'beic li yosilique’, xi li Muc'ul Diose.

32“Li ajvalil Sehone iloq'uic tal scotolic xchi'uc yajsoldadotac, tal stsacutic ta pleito te ta Jahaza. 33Li Muc'ul Dios cu'untique laj yac' ta jc'obtic, jech tsalbil ic'ot cu'untic li Sehón, xchi'uc xnich'nabe, xchi'uc scotol li yajsoldadotaque. 34Jech te i'och ta jc'obtic scotol li yosilalique. Jech la jmiltic noxtoc scotol li viniquetic, li antsetic xchi'uc c'alal ta ololetique. Me junuc mu'yuc boch'o cuxul la jcomtsantic. 35Ja' xa no'ox laj quich'tic li vacaxe, xchi'uc li c'usitic toyolic stojol la jtatic te ta yosilalic 36ti xlic ta yosilal Aroer ta nopol ti uc'um Arnone, xchi'uc ta lum te ta stenlejaltic c'alal to ta Galaade, me junuc muc boch'o xvu' yu'un la spoj sbaic ti c'alal la jpastic pleito jchi'uctique. Li Muc'ul Dios cu'untique laj yac' jtsaltic scotol li lumetique. 37Ja' xa no'ox ti bu muc x'ay jpastic pleito jchi'uctique ja': li amonetique, xchi'uc scotol li yosilal uc'um Jaboque, xchi'uc li lumetic te ta vitsetique, xchi'uc li yantic lumetic ti laj yal Muc'ul Dios mu'yuc chbat jpastic pleito jchi'uctique.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index