Search form

Deuteronomio 4

Li Moisese laj yalbe israeletic ti ac'o xch'unic li c'usi albilique

1“Jchi'iltac israeletic, a'yo me ava'yic li mantaletic xchi'uc li c'usitic yan la jchanubtasoxuque. Pasilanic me scotol ora yu'un jech jun avo'nton chanaquiic, xchi'uc jech chavich'ic li avosilic ti yaloj ono'ox Muc'ul Dios chayac'boxuque, ja' li Dios yu'un jmoltotactic ta vo'onee. 2Mu me xavepajesic, xchi'uc mu me xach'ayic li mantaletic chacalboxuc ava'yique. Ja' me ch'unic c'usi chal li mantaletic yu'un Muc'ul Dios li' chacalboxuc ava'yique. 3Li vo'oxuque laj avil ta asatic c'usi la spas Muc'ul Dios ta Baal-peor xchi'uc ti c'u x'elan la smil scotol te ta atojolic li boch'otic laj yich'ic ta muc' li dios te ta Baal-peore. 4Yan li vo'oxuc ti ja' no'ox laj avich'ic ta muc' li Muc'ul Dios cu'untique, cuxuloxuc to ta ora. 5Li vu'une laj calboxuc ava'yic scotol li mantaletique xchi'uc li c'usitic yan laj yalbun li Muc'ul Dios cu'une, yu'un jech ac'o apasilanic ti c'alal te xa'ox oyoxuc ta avosilic ti bu chavich'ique. 6C'otuc me ta pasel avu'unic, xchi'uc chanic me spasel scotol. Yu'un jech tsna'ic yantic lumetic ti oy lec abijilique xchi'uc ti xana'beic lec smelol c'usi lec ta pasele. C'alal cha'yic scotol li mantaletic avu'unique, jech chlic yalic: ‘Lec bijic xchi'uc lec sna'beic smelol li jun muc'ta lum le'e’, xi ac'oplalic. 7Yu'un mu'yuc yan lum toj muc', xchi'uc ti nopol oy diosetic ta stojolic jech chac c'u cha'al li' oy ta jtojoltic li Muc'ul Dios cu'untique, ti chijya'ibutic jc'optic jujun velta c'alal ta jc'opantique. 8Xchi'uc mu'yuc yan muc'tic lum oy tuq'uil mantaletic yu'unic xchi'uc c'usitic yan lec ta pasel jech chac c'u cha'al chcac'boxuc achanic li' ta orae. 9Ja' yu'un q'uelo me abaic. Mu me xch'ay ta avo'ntonic li c'usitic avilojique. Ja' me xanopilanic o. Albo me ya'yic li anich'nabique xchi'uc li amomnich'nabique.

Ic'opanatic yu'un Dios ta vits Horeb li israeletique

10“C'alal te tsoboloxuc ta stojol Dios cu'untic ta vits Horebe, jech laj yalbun li Muc'ul Diose: ‘Tsobo tal scotol li achi'iltaque yu'un ac'o ya'yic li c'usi chcale, xchi'uc ac'o xchanic c'u x'elan xu' chiyich'icun ta muc' ti jayib c'ac'al cuxulique, ja' no'ox jech xu' chlic xchanubtas xnich'nabic ec’, xiyutun. 11Jech lanopajic batel ta yoc vits ti bu iloc' ep yat c'oc' ta sbae, ti imuy batel ta toyole, ti ic'ataj ta epal ic'al toque. 12Jech te la sc'opanoxuc ta o'lol yat c'oc' li Muc'ul Diose. Pero ja' no'ox laj ava'ibeic li sc'ope, mu'yuc c'usi xavilic. 13Li Muc'ul Diose te laj yalboxuc ava'yic li c'usi xchapanoje, ja' li lajuneb mantaletic ti la sts'iba ta cha'pech tone. Laj yalboxuc ti ac'o ach'unic spasel li c'usitic chale. 14Vu'un laj yalbun ti ac'o jchanubtasoxuc ta mantaletique xchi'uc li c'usitic yan lec ta pasele, yu'un jech ac'o apasic ti c'alal te xa oyoxuc ta avosilic yo' bu chavich'ique.

Itaq'uiatic ti mu me xich'ic ta muc' sloc'obal c'usitic oye

15“C'alal la sc'opanoxuc ta o'lol yat c'oc' li Muc'ul Dios te ta vits Horebe, mu'yuc c'usi xavilbeic sloc'obal. Ja' yu'un bijanic me. 16Mu me xasa' amulic ta sventa li c'usi chapasique. Mu me xapasbeic sloc'obal, me vinic, o me ants. 17Mu me xapasbeic sloc'obal chonbolometic, mutetic, 18quiletel chonetic, xchi'uc choyetic. 19C'alal chaq'uelic muyel vinajele, te chavilic c'ac'al, xchi'uc u, xchi'uc c'analetic, xchi'uc c'usitic yantic. Mu me xlic avich'ic ta muc', yu'un scotol li c'usitic te oye, ja' spasben scotol li Muc'ul Dios cu'untique. Ja' yac'oj ta sventa chtun yu'un scotol cristianoetic ta banamil. 20Li Muc'ul Diose ja' la sloq'uesoxuc tal ti c'alal te to'ox tiq'uiloxuc ta yut li horno sventa yunijesbil stsatsal taq'uine, ja' li Egiptoe. Ja' li' laj yac'oxuc yo' bu oyoxuc li' ta orae, yu'un jech yu'unoxuc lac'otic o. 21Pero li vu'une laj yilintaun Muc'ul Dios ta scoj amulic li vo'oxuque. Laj yal o ta jamal ti mu xu' chijelov batel ta jot uc'um Jordane. Mu xu' chi'och te ta lequil osil yo' bu chayac'boxuc avich'ique. 22Ac'o me li' no'ox chicham li vu'une, yu'un mu xa xu' chijelov batel ta jot uc'um Jordán, pero li vo'oxuque ta ono'ox xajelovic batel. Ta ono'ox xbat avich'ic li lequil osil le'e. 23Pero bijanic me. Mu me xch'ay ta avo'ntonic li c'usi la xchapan Muc'ul Dios ta atojolique. Mu me c'usi xapasbeic sloc'obal jech chac c'u cha'al laj yalboxuc Muc'ul Dios cu'untic ti mu xu' chapasique. 24Yu'un li Muc'ul Dios cu'untique it'ix yo'nton me oy c'usi yan chbat co'ntontic yu'une. Li stuque xco'laj xchi'uc c'oc' ti xu' yu'un ta xchic' scotole.

25“C'alal me oy xa'ox anich'nabic xchi'uc amomnich'nabique, xchi'uc me lamalubic xa'ox li' ta banamile, me ts'acal chlic asoques abaic, me chlic apasbeic sloc'obal c'usitic oye, chata amulic ta stojol li Dios cu'untique. Jech chlic ilinuc ta atojolic. 26Me jech chapasique, ta jva'an comel ta testigo li vinajel xchi'uc banamil ti chachamic ta ora acotolic te ta avosilic yo' bu chavich'ic ta jot uc'um Jordane. Mu jaluc chach'iic te ta avosilic. Chavich'ic ulesel acotolic. 27Li Muc'ul Diose chaspucoxuc batel ta yantic lum. Jutuc xa no'ox cuxul chacomic te ta stojolic. 28Te chlic tunanic yu'un li diosetic ti pasbilic ta sc'ob cristianoetique, ti pasbilic ta te' xchi'uc ta ton, ti mu xilic osile, ti mu xa'yic c'ope, ti mu xve'ique, ti mu xich'ic iq'ue. 29Pero me te chlic asa'ic ta scotol ajol avo'ntonic li Muc'ul Dios cu'untique, ta ono'ox xataic. 30Me icuch avu'unic scotol li at-o'nton xchi'uc scotol li vocoletic le'e, me chlic sutanic tal yan velta ta stojol li Muc'ul Diose, me chlic ach'unbeic li smantale, 31mu'yuc chascomtsanoxuc. Mu'yuc chayulesoxuc yu'un li stuque toj lec yo'nton. Mu xch'ay ta yo'nton li c'usi xchapanoj ono'ox xchi'uc li amoltot ayame'ic ta vo'onee, yu'un yaloj ono'ox ti chc'ot ta pasele.

32“Jaq'uilanbo ava'yic li boch'otic sna'ojic c'usi ic'otan tal ta pasel ta vo'one ti c'alal lic spas sba vinic li' ta banamil li Diose. Batanic ta scotol banamil. Jaq'uilan ava'yic me oy bu jech c'otem ta pasel junuc velta, o me oy boch'o sna'oj ti oy c'usi tsots c'otem ta pasel jech chac c'u cha'al ic'ot ta pasel li'i. 33¿Me oy junuc lum laj ya'ibeic sc'opojel Dios ti muc xchamic jech chac c'u cha'al laj ava'yic ic'opoj Dios ta o'lol yat c'oc' li vo'oxuque? 34¿Me oy jech yan Dios la st'uj jun lum ta scotol yantic lumetic, xchi'uc ti la spas tsots senyailtac, xchi'uc sq'uelubiltac, xchi'uc muc'tic pleitoetique? Jac'o ava'yic me oy bu ivinaj tsots svu'el, xchi'uc me oy c'usi tsots la spas ti xi'balic sba jech chac c'u cha'al la spas ta atojolic te ta Egipto li Muc'ul Dios cu'untique. 35Ti jech laj yac' avilique, yu'un jech ac'o ana'ic ti ta melel ja' mero Muc'ul Dios stuque, ti mu'yuc yane. 36Ja' la sc'opanoxuc tal c'alal ta vinajel yu'un ac'o tuq'uibanic. Xchi'uc laj yac' avilic muc'ul c'oc' li' ta banamil. Te ta o'lol c'oc' laj ava'yic ic'opoj ta atojolic. 37Ja' la xc'uxubin li amoltot ayame'ic ta vo'onee. Ja' la st'ujbe noxtoc li smomnich'nabtaquique. Ta svu'el la scolta loq'uel tal ta mozoil te ta Egipto banamil. 38Ja' la snuts loq'uel ta atojolic li muc'tic lumetic ti toj epic, ti toj tsotsique, yu'un jech laj avu'uninbeic li slumalique. Ja' avosilic ic'ot o jech chac c'u cha'al c'otem xa ta pasel li' ta orae.

39“Ja' yu'un comtsano me lec ta ajol ta avo'ntonic ti ja' no'ox Dios stuc li Muc'ul Diose. Ja' Dios ta vinajel xchi'uc ja' Dios li' ta banamil, mu'yuc yan. 40Ch'unbeic me scotol li c'usitic chayalboxuque xchi'uc li smantaltaque, ja' ti chacalboxuc ava'yic li' ta orae. Me jech chapasique, xcuxet no'ox avo'ntonic li vo'oxuque xchi'uc li amomnich'nabique. Xchi'uc jal chacuxiic te ta avosilic yo' bu chayac'boxuc avich'ic li Muc'ul Dios cu'untique”, xi li Moisese.

Lumetic sventa snac'ubbail boch'otic chmilvanic

41Li Moisese la st'uj oxib lumetic ta jot uc'um Jordán ta stuq'uil sloq'ueb c'ac'al 42sventa te chbat snac' sbaic ta anil me oy boch'o muc ta yutsiluc yo'nton tsmil jun xchi'ile, ti mu'yuc ono'ox baq'uin scontrain sba xchi'uque, yu'un jech mu xich' milel ec. 43Li lumetique ja' li'i: Beser te ta stenlejaltic ta xocol banamil, ja' te oy ta yosilic li smomnich'nabtac Rubene; xchi'uc Ramot te ta Galaad ta yosilic li smomnich'nabtac Gad ta vo'onee; xchi'uc lum Golán te ta Basán ta yosilic li o'lol jchop smomnich'nab Manasese.

Sliqueb lo'il sventa lajuneb mantaletic

44Li'i ja' li mantal laj yac'be xchi'iltac ta israelal li Moisese, 45xchi'uc scotol li mantaletique xchi'uc li c'usitic yan ti laj ono'ox yalbe c'alal iloq'uic tal ta Egiptoe. 46Ja'o laj yalbe ti c'alal te to'ox oyic ta jot uc'um Jordán ta stuq'uil sloq'ueb c'ac'al ta stenlejaltic ta stuq'uil Bet-peor ta yosilal Sehón, ja' li ajvalil yu'un amorretique. Li Sehone te to'ox nacal ta Hesbón yo' bu inutsat loq'uel yu'un scotol li israeletic c'alal iloq'uic tal ta Egiptoe. 47Li israeletique ja' laj yich'beic scotol li yosilale xchi'uc li yosilal ajvalil Og ta Basane. Li chib ajvaliletic le'e ja' ajvaliletic yu'un li amorretic ti te to'ox nacalic ta jot uc'um Jordán ta stuq'uil sloq'ueb c'ac'ale. 48Li yosilalic chib ajvaliletique xlic ta Aroer ta ti' uc'um Arnón c'alal to ta vits Sirión, ja' li Hermón yan sbie, 49xchi'uc scotol li Arabá ta jot uc'um Jordán ta stuq'uil sloq'ueb c'ac'al, c'alal to ta Nab Muerto ta yoc vits Pisgae.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index