Search form

Deuteronomio 5

Lajuneb mantaletic laj yal Dios ta vits Sinaí

(Ex 20.1-17)

1Li Moisese lic stsob scotol li israeletique, jech laj yalbe:

“Jchi'iltac israeletic, a'yo me ava'yic li mantaletique xchi'uc li c'usitic chacalboxuc li' ta orae. Chanic me lec. Pasilanic me scotol ora.

2“Li Muc'ul Dios cu'untique oy c'usi la xchapan ta jtojoltic te ta vits Horeb. 3Mu ja'uc no'ox oy c'usi la xchapan xchi'uc li jmoltotactic ta vo'onee. Ja' no'ox jech la spas ta jtojoltic ec vu'utic ti li' tsobolutic ta orae. 4Li Muc'ul Diose la sc'opanoxuc ta vits Horeb ta ye stuc ti c'alal ic'opoj tal ta o'lol yat c'oq'ue. 5Li vu'une oyun ta o'lol yu'un Muc'ul Dios xchi'uc li vo'oxuque sventa vu'un chacalboxuc c'usi laj yal li Muc'ul Diose. Yu'un li vo'oxuque laxi'ic yu'un li c'oq'ue, jech muc xamuyic batel ta vits. Li Muc'ul Diose jech laj yal:

6‘Vu'un Muc'ul Diosun avu'unic ti la jloq'uesoxuc tal ta Egipto banamil c'alal te to'ox tiq'uiloxuc ta mozoile.

7‘Mu me xavich'ic ta muc' yan diosetic; jtuc no'ox xavich'icun ta muc'’, xi.

8‘Mu me xapas atuquic li c'usi chavich'ic ta muq'ue. Mu me xaloc'taic c'usitic oy ta vinajel xchi'uc c'usitic oy ta banamil xchi'uc ta nabetic. 9Mu me xaquejan abaic ta stojol. Mu me xavich'ic ta muc' yu'un jtuc no'ox Muc'ul Diosun avu'unic. Vu'un Diosun ti toj it'ix co'nton me oy c'usi yan chavich'ic ta muq'ue. Yu'un me mu xavich'icun ta muq'ue, ta me xcac'boxuc atoj amulic li vo'oxuque xchi'uc c'alal to ta xchanc'olal amomnich'nabic. 10Yan li boch'o chiyich'un ta muq'ue, me chixch'unbun jmantale, ja' c'ux ta co'nton ac'o me ep ta mil ta c'ol smomnich'nabic.

11‘Mu me xavixtanbicun jbi, vu'un li Muc'ul Diosun avu'unique. Li boch'o chiyixtanbun jbie ta xcac'be stoj.

12‘Na'o me li c'ac'alil chacux avo'ntonic sventa chavich'icun ta muc' jech chac c'u cha'al calojboxuc ono'oxe. 13Vaquib no'ox c'ac'al xu' cha'abtejic, xu' chapasic scotol li c'usi sc'an pasel avu'unique. 14Yan ta svucubal c'ac'ale ja' sc'ac'alil chacux avo'ntonic. Ja' voc'bil cu'un, vu'un li Muc'ul Diosune. Mu me junuc boch'o x'abtej avu'unic li jun c'ac'al le'e, manchuc me aquerem, me atseb, me amozo, me aquiara, me aca', me avacax, me aburo, me jcotuc c'usitic oy avu'unic, me yanlum cristiano ti te nacal ta alumalique. Ja' tsc'an co'ol chacux avo'nton achi'uc li amozoic xchi'uc li aquiaraique. 15Na'ic me ti jech to'ox mozoinbiloxuc te ta Egipto ec li vo'oxuque. Pero vu'un li Muc'ul Diosun avu'unique la jloq'uesoxuc tal ta jvu'el ta jtsatsal. Ja' yu'un li' chacalboxuc ti ac'o me avich'ic ta muc' li sc'ac'alil chacux avo'ntonique.

16‘Ich'o ta muc' atot ame'ic, jech chac c'u cha'al calojboxuc ono'ox vu'un li Muc'ul Diosun avu'unique. Jech lec chabatic, xchi'uc jech jal chacuxiic te ta avosilic ti bu chacac'boxuque.

17‘Mu me xamilvanic.

18‘Mu me xamulivajic.

19‘Mu me xa'elc'ajic.

20‘Mu me xanopbe smul achi'ilic.

21‘Mu me xac'upinbe yajnil achi'ilic. Mu me xac'upinbe sna achi'ilic. Mu me xac'upinbe yosil, me smozo, me squiara, me xvacax, me sburo, xchi'uc c'usitic yan oy yu'un. Mu me xpich'etuc avo'ntonic yu'un’, xi li Muc'ul Diose.

Sc'oplal c'u x'elan chich'ic ta muc' Dios israeletic

(Ex 20.18-26)

22“Li'i ja' li c'usitic laj yal Muc'ul Dios ti c'alal tsots ic'opoj tal ta o'lol yat c'oc', xchi'uc te ta o'lol ic'al toc c'alal te jmoj tsobolutic ta yoc vitse. Ts'acal mu'yuc xa c'usi yan laj yal. Ja' xa no'ox la sts'iba ta cha'pech ton scotol. Ts'acal laj yac'bun. 23Pero c'alal laj ava'yic li c'op chloc' tal yo' bu ic'uben osile, xchi'uc c'alal laj avilic tsanem li vitse, acotolic c'alal ta banquilaletic ta jujuchop jchi'iltactic xchi'uc c'alal ta moletic ital ac'opanicun. 24Jech laj avalbicun: ‘Ta melel, li Muc'ul Dios cu'untique laj xa yac'butic quiltic c'u x'elan li slequilale xchi'uc li svu'ele. Laj xa ca'ibetic li sc'op ti iloc' tal ta o'lol yat c'oq'ue. Laj xa jna'tic ti xu' chc'opanat yu'un Muc'ul Dios li cristianoe pero mu'yuc ta xcham. 25Pero ac'o me jech laj quiltic, ¿c'u yu'un ti li' no'ox ta jc'antic chijchamutic ta scoj li c'oc' ti toj xi'bal sbae? Yu'un me tal to sc'opanutic yan velta li Muc'ul Dios cu'untique, xu' chijchamutic. 26Mu'yuc boch'o xu' yu'un cha'ibe sc'opojel li cuxul Dios ta o'lol c'oc' jech chac c'u cha'al laj ca'itic, ti muc boch'o xcham cu'untique. 27Ja' lec nopajan batel li vo'ote. A'yo tal lec c'usi chal li Muc'ul Dios cu'untique. Ts'acal xu' chavalbun ca'icutic ec, jech xu' ta jpascutic scotol li c'usi chayalbote’, xavuticun.

28“C'alal ja'o chac'opanicune, li Muc'ul Dios cu'untique laj ya'ay scotol li c'usi laj avalbicune. Jech laj yalbun: ‘Laj ca'ay scotol c'usi laj yal li achi'iltac li'i. Toj lec chca'ay li c'usi laj yalique. 29Toj lec ti jechuc yo'ntonic o scotol c'ac'ale, xchi'uc ti jechuc chiyich'icun o ta muq'ue, xchi'uc ti spasicuc o scotol ora c'usi chal li mantaletic cu'une. Yu'un jech xcuxet no'ox yo'nton chcuxiic xchi'uc yalab xnich'nabic ti jechuque. 30Batan, bat albo ya'yic ti ac'o suticuc batel ta scarpanaique. 31Pero li vo'ote coman li'i, yu'un chacalbot scotol li mantaletique xchi'uc li c'usi chapanbil cu'une. Yu'un vo'ot chavalbe ya'yic ti jech ac'o spasic scotol c'ac'al te ta avosilic bu chacac'boxuque’, xiyutun. 32Ja' yu'un ch'unic me scotol c'usi chayalboxuc li Muc'ul Dios cu'untique. Me jutuc mu me xacomtsanic spasel. 33Ja' me xat'unic o li be laj yac'boxuc avilic Muc'ul Dios cu'untique, yu'un jech lec chabatic, xchi'uc jech jal chacuxiic te ta avosilic ti bu chayac'boxuque.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index