Search form

Deuteronomio 7

Itaq'uiatic ti mu xu' chich'ic ta muc' sloc'obal c'usitic oye

(Ex. 34.11-17)

1“Li Muc'ul Dios cu'untique ja' chayic'oxuc ochel ta banamil ti bu chayac'boxuc avich'ique. Xchi'uc ta snuts loq'uel ta atojolic li vucub muc'tic lum ti toj tsotsique: ja' li hetetique, li gergesetique, li amorretique, li canaanetique, li ferezetique, li hevetique, xchi'uc li jebusetique. 2C'alal me la sta yorail laj yac' ta ac'obic Muc'ul Dios cu'untic li muc'tic lumetic le'e, xchi'uc me laj xa atsalique, nopic me ti oyic o ta sventa chich'ic ulesele. Me jutuc mu me c'usi xachapan achi'uquic. Mu me abuluc sba chavilic. 3Mu me xavuts' avalalin aba achi'uquic, mu me xavaq'uic yic' sbaic aquerem atsebic xchi'uc li squerem stsebique. 4Yu'un li stuquique ja' tsc'anic ti ac'o scomtsanic Dios li avol anich'onique ti ja' ac'o yich'ic ta muc' li yan diosetique, yu'un jech ac'o ilinuc ta atojolic li Muc'ul Diose. Jech jmaq'uel no'ox ta satil xu' chlic smiloxuc acotolic. 5Li c'usi tsc'an chapasique, ja' tsc'an chajinesic scotol li scajleb smoton sdiosique. Lilinic scotol li tonetic xchi'uc li te'etic yich'ojic ta muq'ue. Chic'beic scotol li sloc'obal c'usitic yich'ojic ta muq'ue. 6Yu'un li vo'oxuque ja' jun lum ti voc'biloxuc sventa ac'o avich'ic ta muc' stuc li Muc'ul Diose. Li Muc'ul Diose st'ujojoxuc loq'uel ta stojol li yantic lumetic li' ta banamile yu'un jech ac'o c'otanic ta mero steclumal.

Sc'oplal c'usitic oy ta sventaic spasel li israeletique

7“Ti jech la st'ujoxuc li Muc'ul Diose, ma'uc yu'un vo'oxuc toj muc'oxuc yu'un li yantic lumetique. Vo'oxuc bats'i biq'uitoxuc yu'unic. 8Li Muc'ul Diose ja' la sloq'uesoxuc tal ta Egipto ti bu to'ox tiq'uiloxuc ta mozoile. Ta svu'el ta stsatsal la spojoxuc loq'uel tal ta sc'ob li faraone yu'un toj c'uxoxuc ta yo'nton, xchi'uc ja' laj yac' c'otuc ta pasel li c'usi xchapanoj ono'ox xchi'uc jmoltotactic ta vo'onee. 9Ja' yu'un na'ic me ti ja' mero Dios stuc li Muc'ul Dios cu'untique. Jayc'oluc cristianoetic chjelov, me tsc'anic li Diose, me chch'unbeic smantaltaque; li Muc'ul Diose mu sjel yo'nton o. Persa chac' c'otuc ta pasel ta stojolic li c'usi xchapanoj ono'oxe. 10Yan li boch'otic tscontrainic Diose, ta xules scotol. Chac'be stojol li c'usi tspasique. Ta ora no'ox chac'be stoj c'usi tspasic li boch'otic mu xich'ic ta muq'ue. 11Ja' yu'un pasic me batel scotol li mantaletic yu'un Diose xchi'uc li c'usitic yan yaloj ti chacalboxuc ava'yic li' ta orae. Chanic me spasel batel.

Tsta bendición li boch'otic chch'unbeic smantal Diose

(Lv 26.3-13; Dt 28.1-14)

12“Me chach'unic, me chapasic scotol li c'usitic laj xa ava'yic li'i, li Muc'ul Dios cu'untique jun yo'nton chac' c'otuc ta pasel li c'usi xchapanoj ono'ox xchi'uc jmoltotactic ta vo'onee. 13Lec chasc'anoxuc. Chayac'boxuc ep bendición, xchi'uc chasbolesoxuc. Chac'be bendición noxtoc li anich'nabique xchi'uc li c'usitic oy avu'unique, ja' li trigoe, li ts'usube, xchi'uc li aceitee. Xchi'uc lec chch'i yol li avacaxique xchi'uc li achijique. Yu'un jech ono'ox yalojbe jmoltotactic ta vo'one ti chayac'boxuc scotol c'alal me te xa oyoxuc ta avosilique. 14Li vo'oxuque ep bendición chavich'ic; ja' mu sta jech li yantic lumetique. Mu'yuc bu chloc' vinic antsetic avu'unic ti mu sna' x'alaj xnich'najique. Jech noxtoc mu'yuc bu chloc' yol ats'unub avovolic ti mu sna' x'alaj xnich'najique. 15Li Muc'ul Diose mu xac' taluc chamel ta atojolic, xchi'uc muc xac' taluc li c'usitic toj chopolique, ti toj xi'balic sba jech chac c'u cha'al ava'yojbeic sc'oplal ic'ot ta pasel ta Egiptoe. Yan li avajcontraique chcac' taluc ta stojolic scotol, yu'un ac'o sta ep svocolic. 16Li vo'oxuque ulesic me scotol li lumetic ti bu chayac'boxuc ta ac'obic li Muc'ul Diose. Mu me abuluc sba chavilic. Mu me xavich'beic ta muc' li c'usitic scuyoj ta sdiosique yu'un le'e ja' chaxch'ayoxuc ta be.

17“Li vo'oxuque oy yic'al oy jech chlic anopic: ‘Li muc'tic lum le'e ja' toj ven epic; vu'utic mu'yuc eputic. ¿C'u x'elan xu' cu'untic ta jnutstic loq'uel?’, xachiic. 18Pero mu me xaxi'ic yu'un. Na'ic me c'usi la spas Muc'ul Dios ta stojol li faraone xchi'uc ta stojol scotol li egiptoetique. 19Na'ic me c'u x'elan li muc'tic sq'uelubiltac stsatsal laj yac' ta ilele. Vo'oxuc testigooxuc, yu'un laj avil ta asatic ti ta svu'el ta stsatsal la sloq'uesoxuc tal ta Egiptoe. Ja' no'ox jech xu' ta spas ta atojolic noxtoc te ta lumetic ti chaxi'ic yu'une. 20Jech noxtoc me oy to bu cuxajtic chcomic, o me oy bu nac'ajtic chcomique, li Muc'ul Diose ta stac tal muc'ta xi'el ta stojolic, ja' ta x'ulesatic o. 21Ja' yu'un mu me xaxi'ic yu'un. Yu'un li Muc'ul Dios avu'unic ti toj ech'em smuc'ul ti toj ech'em stsatsale, te xchi'inojoxuc. 22Ta c'unc'un ta snuts loq'uel ta atojolic li cristianoetic ta muc'tic banamil le'e. Mu xu' ti ta jun no'ox velta chlaj avu'unic scotole. Yu'un me ta jun no'ox velta chlaj avu'unic scotole, ja' chbol ta ora li te'tical chonbolometique. Xu' ja' chlic yilbajinoxuc. 23Pero li Muc'ul Dios avu'unique ta ono'ox xlic yac'boxuc ta ac'obic li muc'tic lum le'e, jech xu' chlic amilic ja' to me mu xa junuc chcom te ta atojolique. 24Chayac'boxuc ta ac'obic noxtoc li ajvaliletic yu'unique. Vo'oxuc chalajesbeic sc'oplal li' ta banamil, yu'un jech mu'yuc xa boch'o tsna' o. Me junuc mu'yuc boch'o xu' chastsaloxuc. Ja' vo'oxuc chavulesic scotol. 25Chic'beic noxtoc li sloc'obaltac sdiosique, pero mu me xpich'aj avo'ntonic yu'un li c'anal taq'uin xchi'uc li saquil taq'uin ti yich'ojan li sloc'obaltac sdiosique, yu'un me laj avich'ique, ja' xa laj apasic li c'usi toj chopol chil Muc'ul Diose. 26Ja' yu'un mu me xavich'ic batel ta anaic li c'usi chopol chil Muc'ul Diose yu'un jech mu co'oluc chavich'ic ulesel achi'uquic. Yu'un le'e chapal chich' ulesel yu'un Dios, ja' yu'un li vo'oxuque ja' tsc'an ti chopol chavilique.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index