Search form

Éxodo 14

Ijelovic ta Tsajal Nab li israeletique

1Li Muc'ul Diose la sc'opan yan velta li Moisese, jech laj yalbe:

2“Albo li israeletique le' ac'o sjoyic batele; te ac'o c'ot spas scarpanaic ta yeloval Pi-hahirot ti cacal ta o'lol yu'un li Migdol xchi'uc li nab ta stuq'uil Baal-zefone. Ja' te ac'o spas scarpanaic ta ti'nab. 3Yu'un jech ac'o snop li faraone: ‘Li israeletique mu sna' bu chbatic. Te chch'ayic ta be ta xocol banamil’, ac'o xiuc. 4Jech li vu'une ta jtsatsubtasbe yo'nton li faraone yu'un jech ac'o bat snutsoxuc ta be, jech te chcac'be yil xchi'uc yajsoldadotac ti c'u x'elan jtsatsale. Jech scotol egiptoetic chlic sna'ic ti vu'un Muc'ul Diosune”, xut.

Li israeletique te la sjoyic batel. 5C'alal laj ya'ay faraón xchi'uc xchi'iltac ta abtel ti iloq'uic xa batel li israeletique, lic yanijuc yo'ntonic ta stojol li israeletique. Jech laj yalbe sbaic: “¿C'u yu'un laj cac'tic loc'uc batel li israeletique yu'un laj xa scomtsanic li cabteltique?”, xut sbaic.

6Ta ora lic yal mantal ti ac'o xchapanic caretaetic sventa pleitoe, jech laj yic' batel ta ora yajsoldadotac. 7La st'ujic batel vaquib ciento (600) ta cot caretaetic ti ven lequique xchi'uc scotol scaretaic li egiptoetique. Jujun banquilal soldado icajiic batel ta jujun careta. 8Li Muc'ul Diose la stsatsubtasbe yo'nton li faraone, jech bat snuts ta anil li israeletic ti c'alal iloq'uesatic batel ta svu'el stsatsal Muc'ul Diose.

9Li soldadoetic yu'un egiptoetique bat snutsic ta be li israeletique. Yic'oj batel scaretaic xchi'uc sca'ic. Te spasoj scarpanaic c'ot staic ta ti'nab ta Pi-hahirot ta stuq'uil Baal-zefón. 10C'alal laj yilic israeletic ti nopol xa xtalic li faraón xchi'uc egiptoetique, toj ep ixi'ic ta jyalel, jech lic sc'anic coltael yu'un li Muc'ul Diose. 11Jech laj yalbeic li Moisese:

—¿Me yu'un mu'yuc muquinaltic te ta Egipto ti laj aloq'uesuncutic tal, ti li' tal chamcuncutic ta xocol banamil avu'une? ¿C'u yu'un ti jech laj apasbuncutique? ¿C'u yu'un ti laj aloq'uesuncutic tal ta Egiptoe? 12Jech ono'ox laj calbotcutic te ta Egipto: ‘Comtsanuncutic li'i; li' chi'abtejcutic yu'un li egiptoetique’, xichicutic ono'ox. Ja' lec ti teuc chismozoinuncutic li egiptoetique; ja' toj chopol ti li' chichamcutic ta xocol banamile —xutic li Moisese.

13Itac'ov li Moisese:

—Mu xaxi'ic. Junuc avo'ntonic. Tana li'i chavilic c'u x'elan chascoltaoxuc li Muc'ul Diose. Li egiptoetic ti chavilic le' xa xtalique, mu'yuc xa bu chavilic o yan velta. 14Li vo'oxuque junuc avo'ntonic, yu'un ja' stuc Muc'ul Dios ta stsalboxuc li avajcontraique —xi li Moisese.

15Li Muc'ul Diose jech laj yalbe li Moisese:

—¿C'u yu'un ti xavocoletic ta jtojole? Albo achi'iltac ti ac'o xanovicuc batele. 16Li vo'ote toyo li anamte'e, becho ac'ob ta sba li nabe, voc'o ta cha'voc'. Ja' te ac'o jelovicuc batel achi'iltac ta o'lol nab ti bu taquin chcome. 17Li vu'une ta jtsatsubtasbe yo'nton li egiptoetique yu'un ac'o snutsoxuc batel. Jech xu' chcac'be yil jvu'el jtsatsal li faraone, xchi'uc li yajsoldadotaque, xchi'uc li scaretaique, xchi'uc li sca'ique. 18C'alal me laj xa cac'be yil jtsatsal li faraone, xchi'uc li scaretaic, xchi'uc li sca'ique, scotol egiptoetic chlic sna'ic ti vu'un Muc'ul Diosune —xut.

19Li yaj'almantal Diose xchi'uc li toc ti ba'yucbe ital yu'un li israeletique ta ora la sjel ti bu oyique; te bat yac' sbaic ta spat li israeletique. 20Li toque te laj yac' sba ta o'lol yu'un li egiptoetic xchi'uc li israeletique. Li yeloval toc ta stojol egiptoetique ic' ta jyalel. Yan te ta stojol israeletique lec yac'oj xojobal. Ja' yu'un li egiptoetique mu'yuc c'usi laj yut tal staic li israeletique, yu'un sbejel ac'ubal toj ic' li osile.

21Li Moisese la stoy sc'ob ta sba li nabe, jech li Muc'ul Diose laj yac' taluc tsots ic' ta sloq'ueb c'ac'al. Sbejel ac'ubal ven tsots li iq'ue. Jech la svoc' sba ta o'lol li nabe. Taquin icom li banamil ta yut nabe. 22Li israeletique ixanovic ochel ta taqui banamil ta yut nab. Li nabe tuc' la stselan sba muyel ta bats'ic'ob, ta ts'etc'ob.

23Scotol li egiptoetique i'ochic tal ta yut nab xchi'uc li ca'etic li caretaetic yu'un faraone. Te nabalic tal ta spat li israeletique; la snutsic tal c'alal ta o'lol nab. 24C'alal ta xa'ox sacub osile, li Muc'ul Dios ti te oy ta toc xchi'uc ta c'oq'ue la sq'uel li soldadoetic yu'un egiptoe, jech te isoquic ta be. 25Xchi'uc laj yac' noxtoc ti mu xa xjoyibaj lec yacan li scaretaique, jech solel mu xa xanov lec yu'unic. Ja' yu'un li egiptoetique jech laj yalic:

—Jatovcutic loq'uel ta stojol li israeletique. Yu'un li Muc'ul Diose ja' ta scolta ta pleito li israeletic sventa chiscontrainutic li vu'utique —xiic.

26Li Muc'ul Diose jech laj yalbe li Moisese:

—Toyo ac'ob ta sba li nabe; ac'o snu'p sba yan velta, yu'un ac'o muquicuc ta vo' li egiptoetique, xchi'uc li scaretaic, xchi'uc li sca'ique —xi.

27Jech li Moisese la stoy sc'ob ta sba li nabe. C'alal sac xa'oxe, la snu'p sba yan velta li nabe. Pero toj ech'em stsatsal li vo'e. C'alal yu'un xa'ox chjatovic loq'uel li egiptoetique, te la snup sbaic ta be xchi'uc li nabe. Jech li Muc'ul Diose te laj yac' muquicuc o ta vo'. 28C'alal la snu'p sba yan velta li vo'e, te imuc li caretaetique, xchi'uc li ca'etique, xchi'uc scotol li yajsoldadotac faraón ti i'ochic tal ta nab tal snutsic li israeletique. Me junuc mu'yuc cuxul icom yajsoldado li faraone. 29Yan li israeletique lec ta taqui banamil ijelovic batel ta jot nab. Ja' te ijelovic batel ta o'lol ti bu xch'acoj sba li nab ti tselajtic muyel jot ta bats'ic'ob, jot ta ts'ete.

30Li Muc'ul Diose ja' jech ora la scolta loq'uel ta sc'ob egiptoetic li israeletique. Li israeletique laj yilic ti te xcajtecajte ta ti'ti' nab li egiptoetique, puru animaetic xa. 31C'alal laj yilic israeletic c'u x'elan svu'el stsatsal Muc'ul Dios la spas ta stojol egiptoetique, laj yich'ic ta muc'. La xch'unic o ti ja' chcoltaatic yu'une, xchi'uc laj yich'beic ta muc' li yajtunele, ja' li Moisese.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index