Search form

Éxodo 17

Iloc' vo' ta ch'en

(Num 20.1-13)

1Scotol li israeletique iloq'uic batel ta xocol banamil ta Sin; c'unc'un ixanovic batel yu'un jech albilic yu'un li Muc'ul Diose. Te c'ot spas scarpanaic ta Refidim, pero mu'yuc la sta vo' yuch'ic te. 2Jech te lic yutic li Moisese; jech laj yalbeic:

—Ac'bun vo' cuch'cutic —xutic.

Itac'ov li Moisese:

—¿C'u yu'un ti chavuticune? ¿C'u yu'un chaq'uelbeic yo'nton li Muc'ul Diose? —xut.

3Pero li israeletique taquin yo'ntonic, jech te chopol ic'opojic ta stojol li Moisese. Jech laj yalbeic:

—¿C'u yu'un ti laj aloq'uesuncutic tal ta Egiptoe? ¿Me yu'un ja' no'ox li' tal amiluncutic ta taqui-o'nal xchi'uc calab jnich'nabcutic xchi'uc scotol li jts'unub covolcutique? —xutic.

4Ja' yu'un li Moisese tsots la sc'anbe vocol li Muc'ul Diose, jech laj yalbe:

—¿C'usi ta xcut li jchi'iltaque? ¡Yu'un jutuc xa muc chismilicun ta ton! —xut.

5Itac'ov li Muc'ul Diose:

—Jelovan batel ta ba'yucbe, ic'o batel achi'in jayibuc li banquilaletic yu'un achi'iltaque. Batan, ich'o batel noxtoc li anamte' ti laj amaj o uc'um Niloe. 6Te chajmalaot ta vits Horeb ta ba ch'en. Xc'ot amaj li ch'ene; te chloc' tal li vo'e, jech tsta yoxo' yuch'ic li achi'iltaque —x'utat li Moisese.

Li Moisese te ta sat banquilaletic yu'un israeletic la smaj li ch'ene. 7Jech Meriba laj yac'beic sbi li banamile, yu'un te iliquic ta bic'talvulajetel li israeletique. Masah laj yac'beic yan sbi noxtoc yu'un ja' te la sq'uelbeic yo'nton li Muc'ul Diose, jech laj yalic: “¿Me li' oy ta jtojoltic li Diose, o me mu'yuc?”, xiic.

Li israeletique la spasic pleito xchi'uc amalequetic

8Li amalequetique ibatic ta Refidim yu'un bat stsaquic ta pleito li israeletique. 9Li Moisese jech laj yalbe li Josuee:

—T'ujo jayibuc viniquetic bat pasic pleito achi'uquic li amalequetique. Yan li vu'une oc'om te chibat ta toyol vits, chquich'be batel li ste' Diose —xut.

10Li Josuee la spas jech chac c'u cha'al i'albat yu'un li Moisese; bat spasic pleito xchi'uquic li amalequetique. Ja'o ibatic ta toyol vits ec li Moisés, xchi'uc Aarón, xchi'uc Hure. 11C'alal stoyoj sc'ob li Moisese, ja' itsalvanic li israeletique. C'alal la syales sc'ob li Moisese, ja' itsalvanic li amalequetique. 12Ta sventa ti ilub sc'ob li Moisese, lic stsacbeic tal jbej ton xchotlebin. Li Aarón xchi'uc Hure lic stoybeic sc'ob li Moisese, jun ta jujujot xocon. Te stoyojbeic o c'alal to ich'ay c'ac'al. 13Jech li Josuee ivu' yu'un la smilic ta espada scotol li amalequetique.

14Li Muc'ul Diose jech laj yalbe li Moisese:

—Albo Josué ti j'ech'el ta jtu'pbe o sts'unubalic ta banamil li amalequetique. Xchi'uc ts'ibao ta vun sventa svulesubil ta avo'ntonic —xut.

15Li Moisese la spas jun scajleb smoton Dios. “Li Muc'ul Diose ja' bandera cu'un”, xi sbi laj yac'be. 16Jech laj yal:

“Li Muc'ul Diose te stsacoj ta sc'ob li bandera yu'une.

Te tspas pleito xchi'uc li Amaleque

xchi'uc ti jayc'ol yalab xnich'nabique”, xi.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index