Search form

Éxodo 2

Sc'oplal c'alal ivoc' Moisés

1Oy jun vinic liquem ta jchop yu'un Leví laj yic' jun ants te no'ox ta jun sts'unubalic. 2Li antse lic xchi'in yol, jech ivoc' li yole. C'alal laj yil ti toj lec c'upil sba li yole, oxib u la snac'. 3Pero c'alal mu xa xu' yu'un jal snaq'uele, te lic spas jun biq'uit moch. La spac' lec ta chapopote xchi'uc ta xuch' ti bu bevajtique yu'un jech mu x'och vo' ta yut. Te la stic' ochel li yole; bat yac' ta yut ajtic ta ti' uc'um Nilo. 4Li xvix olole te icom sq'uel ta nom c'usi chc'ot ta pasel.

5Ts'acal te ibat ta atimol stseb li faraone. C'alal ja'o te chanovic ta ti'ti' uc'um li squiarataque, laj yil li unin moch te oy ta yut ajtique. Ja' yu'un li stseb faraone la stac batel jun squiara yu'un ac'o bat yich' tal. 6C'alal la sjam li unin moche, ja' to laj yil ti unin querem te ch-oq'ue. Li stseb faraone toj abul sba laj yil, jech laj yal:

—Li'i ja' unin hebreo querem —xi.

7Li xvix unin quereme jech bat yalbe li stseb faraone:

—Me xac'ane chbat quic' tal jun hebreo ants yu'un ac'o sts'ites, ac'o yac'be xchu' —xut.

8—Xu', bat ic'o tal cha'e —xi li stseb faraone.

Ja' yu'un li tsebe ja' bat yic'be tal sme' li unin quereme. 9Li stseb faraone jech laj yalbe li antse:

—Ic'o li unin querem li'i; ts'itesbun. Vu'un ta jtojbot ac'ac'al —xut.

Li sme' unin quereme laj yic' batel li yole; la sts'ites. 10C'alal ich'i yu'une, bat yac'be li stseb faraone. Jech li stseb faraone la scuy ta bats'i yol stuc. Moisés laj yac'be sbi, yu'un jech laj yal:

—Vu'un la jloq'ues tal ta vo' —xi.

Li Moisese ijatov loq'uel ta Egipto

11C'alal sva'lej xa'ox li Moisese, oy jun c'ac'al ibat svu'lan li xchi'iltac ta israelale. Te laj yil ti toj tsots li yabtel ac'bilique. Ts'acal laj yil noxtoc jun egipto chac'be majel jun israel vinic. 12Jech te lic sq'uel ta jujujot. C'alal laj yil ti mu'yuc boch'o te oye, la smil li egipto vinique; te la smuc comel ta yi'tic. 13Ta yoc'omal iloc' batel noxtoc. Te laj yil tsmaj sbaic chib hebreo viniquetic. Jech la sjac'be li boch'o chmajvane:

—¿C'u yu'un ti chamaj achi'il ta israelale? —xut.

14Itac'ov li hebreo vinique:

—¿Boch'o laj yac'bot avabtel? ¿Me yu'un vo'ot banquilalot, me vo'ot jchapanvanejot cu'uncutic? ¿Me chac amilun ava'ay noxtoc jech chac c'u cha'al laj amil jun egipto vinique? —xi.

C'alal jech laj ya'ay li Moisese, ixi'. Yu'un laj ya'ay ti vinajem xa ti la smil jun egipto vinique. 15C'alal laj ya'ay faraón ti la smil jun Egipto vinic li Moisese, lic yal mantal ti ac'o yich' t'unel bu oye, yu'un ac'o yich' milel. Pero li Moisese ijatov batel. Te ic'ot nacluc ta Madián banamil; te ic'ot chotluc ta nopol jch'oj joc'.

16Oy jun vinic Reuel sbi. Ja' pale te ta Madián banamil. Oy vucub stsebetic. Ta sc'ac'alil le'e te italic ta joc' li tsebetique yu'un tal slupic loq'uel vo'; chaq'uic ta jomte' sventa chac'beic yoxo' yuch' xchij li stotique. 17Oy yan jchabichijetic te tal staquic loq'uel li tsebetique. Li Moisese la spoj li tsebetique; te laj yac'be yoxo' yuch' li chijetique. 18C'alal isutic batel yo' bu oy li stotique, jech la sjac' li totile:

—¿C'u yu'un ti ta ora no'ox lasutic tale? —xi.

19Itac'ovic:

—Yu'un la scoltauncutic jun Egipto vinic ti c'alal muc xi'ac'bat jlupcutic vo' yu'un li yantic jchabichijetique. Ja' la slupbuncutic loq'uel tal li vo'e; laj yac'be yoxo' yuch' li jchijtique —xiic.

20Li Reuele jech laj yalbe:

—¿Bu oy li vinique? ¿C'u yu'un ti te laj acomtsanic stuque? Ja' lec bat iq'uic tal; ac'o tal ve'uc —xi.

21Li Moisese lec laj ya'ay ti te icom ta sna li Reuele. Ts'acal to li Reuele te laj yac'be yic' jun stseb, Séfora sbi. 22Li Seforae ivoc' jun yol. Gersón laj yac'be sbi li Moisese, yu'un jech laj yal: “Vu'un yanlum vinicun ti li' oyun tal ta yan banamile”, xi.

23C'alal i'ech' xa'ox jayibuc c'ac'ale, icham li ajvalil ta Egiptoe. Li israeletique te ono'ox x'oc' x'avanic o ta scoj li tsots mozoinele, xchi'uc te tsc'anilanbeic o vocol li Diose. Ja' yu'un i'aybatic yoq'uel yavanelic yu'un li Diose. 24Li Diose laj ya'ay ti x'ayetic no'oxe, xchi'uc te it'ab ta yo'nton c'usi xchapanojic ono'ox xchi'uc li Abrahame, li Isaaque, xchi'uc li Jacobe. 25I'ilatic yu'un Dios ti c'u x'elan svocolique, jech ituc'ulanatic.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index