Search form

Éxodo 20

Lajuneb mantal yu'un Dios

(Dt 5.2-21)

1Ic'opoj li Diose, jech laj yal chac li'i:

2“Vu'un Muc'ul Diosun avu'unic. Vu'un la jloq'uesoxuc tal ta Egipto ti bu to'ox tiq'uiloxuc ta mozoile.

3“Mu me xavich'ic ta muc' yan diosetic. Jtuc no'ox xavich'icun ta muc'.

4“Mu me xapas yan adiosic. Mu me xapas ta adiosic li c'usitic oy ta vinajel, ta banamile, xchi'uc ta nabetique. 5Mu me xaquejan abaic ta stojol; mu me xavich'ic ta muc'. Yu'un vu'un jtuc Muc'ul Diosun avu'unic, vu'un Diosun ti toj it'ix co'nton me yan c'usi chavich'ic ta muq'ue. Li boch'o mu xiyich'un ta muq'ue ta xcac'be xcuch smulic c'alal to xchanc'olal smomnich'nabic. 6Pero li boch'o chiyich'un ta muq'ue, me chch'unbun jmantale, ep c'ux ta co'nton, ac'o me c'alal to jmil (1,000) ta c'ol smomnich'nabic.

7“Mu me xavixtanbicun jbi, vu'un li Muc'ul Diosun avu'unique. Yu'un li boch'o chiyixtanbun jbie ta me xcac'be stoj smul.

8“Na'ic me li sc'ac'alil chacux avo'ntonic sventa chavoc'bicun ta jventae. 9Vaquib no'ox c'ac'al xu' cha'abtejic, xu' chapasic scotol li avabtelique. 10Yan li svucubal c'ac'ale ja' xcuxubil avo'ntonic; ja' sventa chavich'icun ta muc', vu'un li Muc'ul Diosun avu'unique. Mu me boch'o spas jchopuc abtel avu'unic li jun c'ac'al le'e. Manchuc me vo'ot, me aquerem, me atseb, me amozo, me aquiara, me aca', me avacax, me yanlum ti co'ol te nacaloxuc achi'uquique. 11Yu'un ta vaquib no'ox c'ac'al la jpas li vinajel banamile, li nabe, xchi'uc scotol li c'usitic oye. Yan ta svucubal c'ac'ale la jcux co'nton. Ja' yu'un li jun c'ac'ale ts'u'iltasbil cu'un; ja' ch'ul c'ac'al comen ta aventaic.

12“Ich'o ta muc' atot ame', yu'un jech jal chacuxi te ta banamil ti bu chacac'boxuc vu'un li Muc'ul Diosun avu'unique.

13“Mu me xamilvanic.

14“Mu me xamulivajic.

15“Mu me xa'elc'ajic.

16“Mu me xanopbe smul achi'ilic.

17“Mu me xapich'-o'ntabe sna achi'ilic. Mu me xapich'-o'ntabe yajnil achi'ilic, me smozo, me squiara, me xvacax, me sburo, o c'usiuc no'ox yantic oy yu'un”, xi li Diose.

Ep ixi'ic yu'un Dios li israeletique

(Dt 5.22-33)

18Li israeletique laj yil, xchi'uc laj ya'ay stuquic ti tsots ibac' chauque, xchi'uc li sacsevule, xchi'uc ti tsots i'oc' oq'uese, xchi'uc ti macal ta ch'ayil li vitse. Pero ixi'ic ta jyalel; nom bat sva'anan sbaic. 19Jech laj yalbeic li Moisese:

—Vo'ot no'ox xac'opanuncutic, ta jch'uncutic li c'usi chavale. Mu xa me xisc'opanuncutic li Diose yu'un naca me lichamcutic —xutic.

20Itac'ov li Moisese:

—Mu xaxi'ic. Ja' no'ox sventa tal sq'uelboxuc avo'ntonic li Diose xchi'uc c'u cha'al mu xch'ay ta avo'ntonic yich'el ta muc', jech mu xasa' amulic ta stojol —xi.

21C'alal nom va'alic batel li israeletique, li Moisese inopaj batel ta ic'al toc yo' bu oy li Diose.

I'albatic mantal c'u x'elan tspasic li scajleb smoton Diose

22Li Muc'ul Diose jech laj yalbe li Moisese:

“Jech xavalbe ya'yic li achi'iltac ta israelale: ‘Laj xa avilic la jc'opanoxuc yalel tal ta vinajel. 23Mu me xapas adiosic ta c'anal taq'uin, o me ta saquil taq'uin yu'un chavich'ic ta muc' jech chac c'u cha'al vu'un. 24Pasbicun jun scajleb jmoton pasbil ta lum. Te xamilbicun, te xachic'bicun jmotonin achijic avacaxic sventa co'ol co'ntontic. Buyuc no'ox chacac'boxuc avilic yavil ti ta jc'an chavich'icun ta muq'ue, te chtal cac'boxuc bendición. 25Me chapasbicun scajleb jmoton ta tone, mu me xavajanic li tone. Yu'un me chavajan ta avabtejebic li tone, chabolibtasic li scajleb jmotone. 26Mu me xavac'beic scajal-cajal stec'ubal li scajleb jmotone, yu'un jech mu xavac' ta ilel abec'talic ti c'alal chamuyique’, uto li achi'iltaque”, xi li Diose.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index