Search form

Éxodo 21

Mantaletic ta sventa mozoetic

(Dt 15.12-18)

1“Li'i ja' mantaletic ti tsc'an chavalbe ya'yic li achi'iltaque:

2“Me oy chaman amozoic ti achi'ilic no'ox ta israelale, vaquib no'ox jabil xu' ch-abtej avu'unic. Ta svucubal jabile xu' xa chacoltaic batel, pero me jutuc mu me c'usi stoj comel ti c'alal chacoltaic batele. 3Me stuc no'ox i'och ta amozoique, stuc no'ox ac'o batuc. Yan me xchi'uc yajnile, ac'o batuc xchi'uc yajnil. 4Me te i'ac'bat yajnil yu'un yajvale, me i'ayin squerem stsebique, li mozoe stuc no'ox ac'o loc'uc batel. Li yajnil xchi'uc xnich'nabe ja' yu'un li yajvale. 5Yan me mu sc'an xloc' batel ta sventa ti lec sc'anoj li yajnil xnich'nab xchi'uc yajvale, 6li yajvale ac'o yic' batel ta stojol Dios; te ac'o c'ot sva'an ta sts'el smac ti'na, o ta smarcoal ti'na, ac'o svombe xchiquin ta jich'il taq'uin. Jech xu' chcom o ta smozo scotol c'ac'al.

7“Me oy boch'o ta xchon ta quiarail stsebe, mu'yuc ta xcol loq'uel jech chac c'u cha'al li viniquetic ti ochemic ta mozoile. 8Me muc teuc x'ic'at yu'un yajval ta sventa ti mu sc'an iq'uele, ac'o yac' comel taq'uin me oy boch'o chic' loq'uele. Pero mu xu' chich' chonel batel ta yanlum cristiano. 9Yan me laj yac'be yic' xnich'one, ac'o scuy o ta bats'i stseb. 10Pero me lic sa' yan yajnil li vinique, li sba antse ac'o scuy lec ta yajnil. Mu me sjalanbe sve'el. Ac'o yac'be lec sc'u' spoc' xchi'uc ac'o xchi'in sbaic o, yu'un ja' yajnil. 11Pero me mu spas li oxchop li'i, xu' ac'o loc'uc batel li antse. Mu persauc tstoj comel ta taq'uin.

Mantaletic ta sventa boch'o ta xmajvanic xchi'uc ta xmilvanic

12“Li boch'o tsyayijes xchi'ile, me icham o yu'une, ac'o yich' milel ec. 13Pero me mu'yuc snopoj tsmil li xchi'ile, me yu'un xa jech la jc'an te chcham oe, vu'un chacalboxuc ava'yic bu xu' chbat snac' sba li boch'o imilvane. 14Pero me yu'un stsoq'uet yo'nton yu'un li xchi'ile, xchi'uc me chbat smil ta mucule, persa chat'unic. Ac'o me te chbat snac' sba ta sts'el scajleb jmoton, jochic loq'uel tal, ac'o yich' milel.

15“Li boch'o ta smaj stot sme'e, ac'o yich' milel.

16“Li boch'o ta xelc'an jun cristianoe, me la xchon batel, o me te to oy ta sc'obe, ac'o yich' milel.

17“Jech noxtoc li boch'o yan xich' xalbe stot sme'e, ac'o yich' milel.

18“Jech noxtoc me oy boch'o tscontrain sbaique, me oy jun boch'o chac' ton, o me majele, me muc xcham yu'un li xchi'ile, pero me imochi o ta svayab yu'une, 19li boch'o imajvane mu xu' chich' milel ti me itsatsub jutuc li boch'o iyich' majele, me te to xoc'xun ta namte'al chloc' ta xoraltique. Ja' no'ox ac'o stojbe sc'ac'al, xchi'uc ac'o yac'be stojol xpoxil.

20“Me oy boch'o tsmaj ta te' smozo, o me squiarae, me icham yu'une, ac'o yich'be spacol. 21Yan me itsatsub ta jun chib c'ac'al no'oxe, mu'yuc ta stoj smul yu'un ja' smozo stuc te ta sna.

22“Me oy chib viniquetic tsmaj sbaique, me la snet'ic o jun ants ti oy xa xch'ute, me mu'yuc xcham yu'unic, me ja' no'ox iyal yole, li boch'o inet'vane ac'o yac' taq'uin jech chac c'u cha'al yepal tsc'an smalal li antse, xchi'uc ja' ti c'u x'elan chchapaj yu'unic li jchapanvanejetique. 23Pero me icham o ta jyalel li antse, ac'o chamuc ec li vinique. 24Li boch'o ta stu'pbe sat xchi'ile, ac'o yich' tu'pbel sat ec. Li boch'o tscolesbe stanal ye xchi'ile, ac'o yich' colesbel stanal ye ec. Me ta sc'ob chac'be xchi'ile, ac'o yich' ac'bel ta sc'ob ec. Me ta yacan chac'be xchi'ile, ac'o yich' ac'bel ta yacan ec. 25Li boch'o ta xchic'vane, ac'o yich' chiq'uel ec. Li boch'o ta syayijesvane, ac'o yich' yayijesel ec. Li boch'o ta smaj xchi'ile, ac'o yich' majel ec.

26“Li boch'o ta smajbe sat smozo, o me squiarae, me soquem icom o sat yu'une, ac'o scolta loq'uel ta jech no'ox ta scoj ti la soquesbe sate. 27Li boch'o tscolesbe stanal ye smozo, o me squiarae, ac'o scolta batel ta jech no'ox ta scoj ti la scolesbe stanal yee.

Mantaletic ta sventa boch'o chulvan xvacaxic

28“Me oy jcot vacax ta xul jun vinic, o me antse, me icham o yu'une, li vacaxe ac'o yich' milel ta ton, pero mu'yuc chich' ti'el, jech ec li yajvale mu xu' tstoj smul. 29Yan me yu'un nopen xa'ay xulvanej o li vacaxe, me mu stuc'ulan li yajvale, me oy tsmil jun vinic, o me antse, ac'o yich' milel ta ton li vacaxe xchi'uc li yajvale. 30Pero me tsc'an chac' taq'uin ta sventa mu xich' milele, persa ac'o yac' ti c'u yepal chc'anbate, yu'un ja' xq'uexol chc'ot li boch'o ichame. 31Ja' jech co'ol chich' pasel me oy ilaj ta xulel ta vacax jun querem, o jun tseb, jech chac c'u cha'al chal li mantal li'i. 32Me oy jcot vacax ta xul jun mozo, o me jun quiarae, li vacaxe ac'o yich' milel ta ton. Li yajval mozo, o me quiarae, ac'o yich' ac'bel lajuneb xcha'vinic (30) ta sep saquil taq'uin.

33“Me oy boch'o jamal tscomtsan sjoq'ue, o me oy boch'o tsjoc' ya'al ti mu'yuc tsmacbe sti'e, me ibalch'uj yalel jcot vacax, o me jcot buroe, 34li yajval joq'ue ac'o stojbe li boch'o oy c'usi icham yu'une. Pero li yajval joq'ue te ac'o yich' comel li c'usi ichame.

35“Me oy jcot vacax bat xulbe xvacax yan vinique, li vacax ti bu cuxul chcome ac'o yich' chonel. Ac'o spasbeic ta o'lol li stojole, xchi'uc ac'o spasic ta o'lol li chamen vacaxe. 36Pero li yajval vacax ti sna'oj ono'ox toj ech'em xulvan li xvacaxe, me yu'un mu sventauque, ac'o yac' jcotuc xvacax ta xq'uexol li vacax ichame. Ja' ac'o yich' ec li chamen vacaxe.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index