Search form

Éxodo 22

Mantaletic sventa c'usi tspasic me oy c'usi chch'ay, o me oy c'usi chlaj ta sts'unub yovolic

1“Me oy boch'o ta xelc'an jcotuc vacax, o me jcotuc chije, me la smil, o me la xchon batele, ac'o yac' vo'cotuc vacax ta xq'uexol li jcot vacax laj yelc'ane. Xchi'uc ac'o yac' chancotuc chij ta xq'uexol li jcot chij laj yelc'ane.

2“Me oy jun j'elec' ti sbats'il elec' chtaat ta jun nae, me imajat, me te icham oe, li boch'o chmilvane mu'yuc smul chcom. 3Yan me ta c'ac'altic jech chc'ot ta pasele, li boch'o chmilvane, oy smul chc'ot.

“Li boch'o ch-elc'aje, ac'o stoj ti c'u yepal stojol c'usi laj yelc'ane. Yan me mu'yuc stojol yu'une, ja' ac'o yich' chonel stuc, jech ta xtoj o li c'usi laj yelc'ane.

4“Me te to cuxul chich' tabel li c'usi yelc'anoje, ac'o stoj chib velta jech chac' c'u cha'al stojol ono'oxe, ac'o me vacax, me buro, me chij.

5“Me oy boch'o tscolta batel sts'unub yovol yu'un ac'o sa' sve'ele, me bat ve'uc ta yosil, o ta ts'usubtic yu'un yan xchi'ile, ac'o xq'uextabe sve'ub; ja' ac'o yac' li c'usi toj lequic chloc' ta yosile xchi'uc li sts'usub lequic chloc' yu'une.

6“Me oy boch'o chac' c'oc', me i'och batel tocalte' yu'une, me la xchic' trigo ti jmoj xa tsobbile, o me ja' ic'ac' ti bu taquin xa ti yorail xa chich' tuch'ele, xchi'uc me ic'ac' yantic ts'unubiletic yu'une, li boch'o chac' c'oq'ue ac'o stoj li c'usitic chc'ac' yu'une.

7“Me oy boch'o chac'be xchabi saquil taq'uin yuts' yalal, o me ja' li c'usi toj toyolic stojole, me tal elc'anbatuc loq'uel ta sna li boch'o xchabioje, me laj yich' tael li j'eleq'ue, ac'o stoj chib velta ti c'u yepal stojol c'usi laj yelc'ane. 8Yan me muc xich' tael li j'eleq'ue, li yajval nae ja' ac'o yich' iq'uel batel ta stojol Dios yu'un ac'o yich' q'uelel me mu ja'uc la stsac stuc li c'usi xchabioje.

9“Me oy boch'o ta scuy ta yu'un jcot vacax, me buro, me chij, me c'u'iletic, o me c'usiuc yan chch'aye, me oy boch'o jech chale ‘ja' cu'un’, me xie, li chibic jech chalique, ac'o yich'ic iq'uel batel ta stojol Dios. Me ivinaj li boch'o ja' no'ox tsc'an chelc'ane, ac'o stojbe chib velta stojol li boch'o ja' yu'une.

10“Me oy boch'o chac'be xchabi yuts' yalal me sburo, me xvacax, me xchij, o c'usiuc no'ox sts'unub yovol chac' ta chabiele, me icham, me iyayij, o me muc xilic ay yich' elc'anele, 11li boch'o xchabioje ac'o yalbe ta jamal yajval ta stojol Muc'ul Dios ti muc ja'uc laj yich' stuc li c'usi ac'bil xchabie. Li yajvale ac'o xch'unbe li c'usi chale; mu me xac'be tstoj. 12Pero me te sq'ueloj laj yich' elc'anel batele, ac'o stojbe li yajvale. 13Yan me yu'un ilaj ta ti'el ta jti'val chonbolome, xu' chac'be ta ilel scomelal ti ta melel ilaj ta ti'ele, jech mu stoj o.

14“Me oy boch'o chch'amanbe jcotuc sts'unub yovol xchi'ile, me te chcham ta sc'ob, o me oy c'usi spas yu'une, me mu'yuc te sq'ueloj li yajvale, ac'o stoj li boch'o la xch'amane. 15Yan me te sq'ueloj li yajvale, mu xu' tstoj. Me sc'oplal chac'be sloq'ue, ja' no'ox ac'o yac' ti c'u yepal sloq'ue.

Mantaletic ta sventa c'usi lec ac'o spasic

16“Me oy boch'o ta slo'la jun tseb ti mu'yuc to ac'bil ta c'abale, me la xchi'ine, ac'o stoj ti c'u yepal tstoj sbaique; ac'o yic' o li tsebe. 17Pero me mu xac'be yic' stseb li totile, ac'o stojbe ono'ox jech chac c'u cha'al chich'ic tojel li tsebetic ti mu'yuc to yilojic vinique.

18“Li j'ac'chameletique, mu me xavaq'uic cuxiuc.

19“Li boch'o ta xchi'in sba xchi'uc chonbolometique, ac'o chamuc.

20“Li boch'o ta smilbe smoton yan diosetic, ti ja' mu xac'be smoton li Muc'ul Diose, ac'o yich' milel.

21“Li yanlumetique mu me xavuts'intaic, mu me xavutic, yu'un ja' jech yanlumoxuc ec ti c'alal te to'ox oyoxuc ta Egiptoe.

22“Mu me xavuts'intaic li me'on antsetique xchi'uc li me'on ololetique, 23yu'un me abul sba avu'unique, chisc'anbicun vocol ta jtojol, ja' ta jcoltaic ta xca'ibe li sc'opique. 24Me jech chapasique, chi'ilin ta atojolic; ta xcac'oxuc ta milel ta espada. Jech chcomic ta me'on ants ec li avajnilique; chcomic ta me'on olol ec li anich'nabique.

25“Me oy ta xq'uexboxuc ataq'uinic li me'on te achi'uquic ta nacleje, mu me xapasic jech chac c'u cha'al li jc'ulejetique, xchi'uc mu me xac'anbeic sjol li ataq'uinique. 26Me chayac'bot comel ta prentail sc'u' ta sventa ti chq'uexbot ataq'uinique, xbat me asutesbeic ta sbatel no'ox c'ac'al. 27Yu'un me ja' no'ox jlic oy yu'une, bal to xa'ay smac o sic. Yu'un me mu xbat asutesbee, ¿c'usi tsmac sba o ti c'alal chvaye? Me la sc'anbun vocol ta jtojole, ta me xca'ibe sc'op, yu'un li vu'une jtalel jc'uxubinvanejun o.

28“Mu me c'usi yan xavich' xavalic ta stojol li Diose, xchi'uc mu me xachopolc'opojic ta stojol li banquilaletic avu'unic te ta alumalique.

29“Mu me xjalij avu'unic ti chavich'bicun tal jmotonin li sba sat c'usitic chloc' avu'unique xchi'uc li ya'lel ats'usubique.

“Voc'bicun me li sba aqueremique. 30Ac'bicun noxtoc li sba yol avacaxic achijique. Te to ac'o xchi'in vucubuc c'ac'al li sme'ique; ta xvaxquibal c'ac'al svoq'uel xu' xa chavac'bicun ta jtojol.

31“Li vo'oxuque tsc'an ch'ul vinic chapas abaic ta jtojol.

“Mu me xati'beic scomelal sbec'tal ats'unub avovolic ti lajem xa ta ti'el yu'un jti'val chonbolometique; ac'beic sti' ts'i'etic.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index