Search form

Éxodo 23

Mantaletic ta sventa c'usi tuc' ta pasel

1“Mu me xavalic c'usi mu meleluc; mu me xachi'inic li boch'otic chopolique, yu'un jech mu teuc xa'ochic ta j'epalc'op testigo yu'unic ta sventa li c'usi chopol tspasique.

2“Mu me ja'uc xats'aclinic ta spasel c'usi chopol li boch'o epique.

“C'alal chaval ava'yejic ta stojol jchapanvanejetique, mu me ja'uc xachanic c'usi chopol tspasic li boch'otic epique. Mu me ja'uc xavac' ta avo'ntonic li c'usi mu'yuc tuq'ue. 3Mu me xavovil tic' abaic ta spojel li me'onetic c'alal me oy smulique.

4“Me oy ch'ayem chataic jcotuc xvacax, o me sburo avajcontraique, ac'beic sutel. 5Mu me xaquechanic xc'uxubinel li boch'o chascontrainoxuque. Me oy chavilic balch'ujem xchi'uc yicats sburoe, coltaic ta syalesbel li yicatse.

6“Mu me xamacbeic scoltael ta stojol jchapanvanejetic li me'onetique.

7“Mu me xach'unic li tic'bil muliletique, xchi'uc mu me xavaq'uic ta milel li boch'o mu'yuc smule. Yu'un li vu'une mu'yuc ta jmucbe smul li boch'o oy smule.

8“Mu me xatsaquic taq'uin ti c'alal chachapanvanique, yu'un li taq'uine ja' tspasvan ta ma'sat, yu'un jech xu' mu xachapanbeic o sc'op li boch'otic mu'yuc smule.

9“Mu me xavilbajinic li yanlumetique, yu'un ja' jech yanlumoxuc ec ti c'alal te to'ox nacaloxuc ta Egiptoe. Ja' yu'un lec xana'ic c'u x'elan ti c'alal ta yanlum nacaloxuque.

Tsots sc'oplal tsc'an ac'o yac'beic xcux yosilic

10“Vaquib no'ox jabil xu' chaboj li avosilique, xu' chats'unbeic sbel, xu' chatsobic li c'usi chloc' avu'unique. 11Ta svucubal jabile mu xa xabojic: ac'beic to xcux. Me oy to c'usi chloc' tee, ja' ac'o sve'ic ec li me'onetic te nacalic ta alumalique. Jech noxtoc me oy to c'usi chcom yu'unique, ja' xa ac'o sve'ic ec li te'tical chonbolometique. Jech me xapasic scotol c'alal ta ts'usubtic, c'alal ta olivaetic avu'unic.

12“Vaquib no'ox c'ac'al xu' cha'abtejic. Ta svucubal c'ac'ale tsc'an chacux avo'ntonic, yu'un jech xu' chcuxic lec ec li avacaxique, li aburoique. Xchi'uc jech xu' chcuxic ec li amozoique xchi'uc li yanlumetique.

13“Pasic me scotol li c'usitic laj calboxuque. Me jutuc mu me xloc' ta aveic, mu me xavalbeic sbi li yantic diosetique.

Sc'oplal oxcoj muc'tic q'uinetic ta jabil

(Ex 34.18-26; Dt 16.1-17)

14“Pasic oxcoj q'uin ta jujun jabil sventa chavich'icun ta muc'. 15Pasic q'uin sventa pan ti mu'yuc yich'oj svolesubil xch'ute, jech chac c'u cha'al calojboxuc ono'oxe. Vucub c'ac'al xave'ic batel pan ti mu'yuc yich'oj svolesubil xch'ute. Li c'usi ual calojboxuc ono'oxe, ja' li u Abibe, yu'un ja' jech u ti laloq'uic tal ta Egiptoe. Mu'yuc boch'o xu' chtal ta jtojol ti me mu'yuc c'usi yich'oj tal jutuque.

16“Pasic noxtoc q'uin ta sventa li c'usitic chloc' avu'unique, ja' li sba sat c'usitic ats'unoj ta avosilique. Xchi'uc pasic q'uin ta jujun slajeb jabil c'alal chlaj atsobic scotol li c'usitic ats'unojique.

17“Acotolic li vinicoxuque ta jc'an chatalic li' ta jtojol oxib velta ta jabil.

18“C'alal chamilbicun jmotonin li ats'unub avovolique, li xch'ich'ale mu me xavac'bicun xchi'uc li pan ti yich'oj svolesubil xch'ute, xchi'uc mu me xanac'beic xepual sventa yoc'omal.

19“Li sba sat c'usitic ats'unoj ta avosilic ti toj lequique, ich'bicun tal ta Ch'ulna cu'un, vu'un li Muc'ul Diosun avu'unique.

“Mu me xapanic ta ya'lel xchu' sme' li unin ch'ium tentsune.

I'albatic ti ja' chtojobtasatic yu'un yaj'almantal Diose

20“A'yo ava'yic, ta jtac tal ta atojolic caj'almantal, yu'un ja' chaxchi'inoxuc batel ta be; ja' chayic'oxuc batel ti bu chapanbil avavilic cu'une. 21Mu me xavoc' abaic ta stojol; a'ibeic me li sc'ope. Mu me xabajbeic smantal, mu'yuc me xaspasboxuc perdón me laj ata amulique, yu'un ja' ta jventa ti ch-abteje. 22Me ta melel chach'unic, xchi'uc chapasic scotol li c'usi laj calboxuque, ja' cajcontra chc'ot ec li avajcontraique, xchi'uc ta xcac'be svocolic ec li boch'otic chayac'boxuc avocolique. 23Yu'un li j'almantal cu'une, ja' ba'yucbe chbat avu'unic; ja' chayic'oxuc batel ta yosilal li amorretic, li hetetic, li ferezetic, li canaanetic, li hevetic, xchi'uc li jebusetique. Yu'un li stuquique ta xculesic o ta j'ech'el. 24Mu me xachanic c'usitic chopol tspasic li yantic lum le'e. Mu me xavich'beic ta muc' li diosetic yu'unique; mu me xaquejan abaic ta stojol. Lilinic scotol li tonetic scuyoj ta sdiosique. 25Vu'un no'ox xavich'icun ta muc'; vu'un li Muc'ul Diosun avu'unique, jech ta xcac'be bendición li apanique xchi'uc li ava'alique.

“Mu'yuc ta xcac' taluc chamel ta atojolic. 26Mu'yuc ta xcac' chamanic ti c'alal mu to avorailicuque. Xchi'uc mu'yuc chloc' junuc ants ta alumalic ti chyal yole xchi'uc ti mu sna' x'alaje.

27“Vo'oxuc ta aventaic ta xcac' batel tsots jxi'elal ta buyuc no'ox. Scotol cristiano ta xi' avu'unic ti buyuc no'ox banamilal chajelovic batele. Ta xcac' jatovicuc batel avu'unic li avajcontraique. 28Ta jtac tal muc'ta xi'el xchi'uc ep chanul mumetic ti bu chajelovic batele, yu'un jech ta xjatovic batel avu'unic li hevetic, li hetetic, xchi'uc li canaanetique. 29Muc ta junuc no'ox jabil ta jnutsboxuc loq'uel scotol, yu'un jech mu xocoluc chcom li banamile, jech mu xbol li te'tical chonbolometique yu'un xu' ja' chlic sti'oxuc. 30Ta c'unc'un ta jnuts loq'uel ta atojolic, ja' to me labolic leque, xchi'uc ti me laj avich'ic o li avosilique. 31Li sts'aquil avosilique ja' jech chac li'i: Te xlic ta Tsajal Nab c'alal to ta nab yu'un filistaetic, xchi'uc te xlic ta xocol banamil c'alal to ta uc'um Éufrates. Li yajvaltac banamil le'e, cac'oj xa ta ac'obic sventa chanutsic loq'uel.

32“Mu me c'usi xachapan achi'uquic, xchi'uc mu me c'usi xachapanic ta sventa li diosetic yu'unique. 33Xchi'uc mu me xavaq'uic naquiicuc comel te ta alumalic, yu'un jech mu xlic ata amulic ta jtojol ta scojic. Yu'un me bat avich'beic ta muc' li diosetic yu'unique, lach'ayic xa o”, xi li Diose.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index