Search form

Éxodo 25

Laj yaq'uic smoton Dios sventa chich' pasel ch'ulna

(Ex. 35.4-9)

1Li Muc'ul Diose jech laj yalbe yan velta li Moisese:

2“Albo achi'iltac ti ac'o yich'bicun tal jmotone. Ac'o yich'ic tal scotol li boch'otic chc'ot ta yo'ntonic chaq'uique. 3Li c'usitic ta jc'an chaq'uique ja' li'i: c'anal taq'uin, saquil taq'uin, cobre taq'uin, 4yax'elan poc', ic'ic'tic sba stsajal, bats'i tsoj, lequil lino no, jalbil tsotsil tentsun, 5nuculil chij bonbil ta tsoj, lequil nuculetic, acacia te', 6aceite sventa candiletic, smuibtasbil aceite sventa lecubtasel, xchi'uc sventa pom ti c'u cha'al lec mu yiq'ue. 7Ac'o yich'ic tal noxtoc cornalina ton xchi'uc yantic lequil tonetic sventa chich' aq'uel ta mocan c'u'il sventa banquilal pale. 8Pasbicun junuc jch'ulna sventa te chajchi'inoxuc. 9Ti c'u x'elan chacac'bot avil senyaile, xchi'uc li c'usitic chacalbot tsc'an te chtune, ja' jech xapas.

Sc'oplal c'u x'elan chich' pasel xcaxail smantal Dios

(Ex. 37.1-9)

10“Jech noxtoc paso junuc caxa ta acacia te', ja' o'lol svacch'ix snatil, oxch'ix xchi'uc oxc'ob sjamalil, xchi'uc oxch'ix xchi'uc oxc'ob stayalil. 11Pixo lec ta bats'i c'anal taq'uin li yut xchi'uc spate. Lec c'upil sba xquechelquechel ta c'anal taq'uin xapas ta joyob. 12Paso chanib xotxot c'anal taq'uin; te xabaj ta xchanibal yacan, chabchab chcom ta jujujot. 13Pasbo xq'uechubiltac ta acacia te'; pixo lec ta c'anal taq'uin. 14Te xaxoj jelovel ta xotxot taq'uinal ta jujujot li caxae, yu'un jech xu' chich' q'uechel ti c'alal chich'ic batele. 15Mu me xaloq'uesic; te xojluc comuc o. 16Ja' te xatic' ochel ta yut caxa li jmantal chacac'bote.

17“Pasbo smac noxtoc li caxae; ta bats'i c'anal taq'uin xapas. Ja' o'lol svacch'ix snatil, oxch'ix xchi'uc oxc'ob sjamalil. 18Ac'o chib sloc'obal querubinetic ta jujujot sjol pasbil ta c'anal taq'uin, tenbil lec ta martillo xapas. 19Li smac caxa xchi'uc li sloc'obal querubinetique jmoj snitoj sba xapas, jun ta jujujot sjol li smac caxae. 20Snupul satioj sbaic xapas; ac'o sq'uelic yalel li smac caxae. Lich'ajtic xic' xapas; ja' ac'o smaquic o li smac caxae. 21Te xatic' ochel ta yut caxa li jmantal chacac'bote; ja'o xavac'be li smaque. 22Te ta toyol ta o'lol yu'unic li chib sloc'obal querubinetique ja' te ta jc'opan jbatic; te chacalbot mantaletic sventa chavalbe li achi'iltaque.

Sc'oplal xmexail pan tsc'an chaq'uic ta stojol Dios

(Ex. 37.10-16)

23“Paso junuc mexa ta acacia te', o'lol yo'ch'ix snatil, cha'ch'ix xchi'uc oxc'ob sjamalil, oxch'ix xchi'uc oxc'ob stayalil xapas. 24Pixo ta bats'i c'anal taq'uin, xchi'uc oy c'usi lec c'upil sba xaloc'taan ta c'anal taq'uin ta joyob. 25Tselajtic muyel sti' xapas ta joyob; ja' chanc'ob ac'o muyuc ta joyob. Xchi'uc oy c'usi lec c'upilic sba xaloc'taan ta c'anal taq'uin ta joyob noxtoc. 26Ac'bo chanib xotxot taq'uin pasbil ta c'anal taq'uin; te xabaj ta xchanjotal xchiquin ti bu chlic yalel li jujun yacane. 27Ta yolon stseltselil sti' xabaj, yu'un jech xu' te chich' xojel jelovel li xq'uechubiltaque, jech xu' chich' q'uechel batel. 28Li xq'uechubiltac sventa chich' q'uechel batel li mexae, paso ta acacia te'; pixo lec ta c'anal taq'uin. 29Paso ta bats'i c'anal taq'uin li platoetique, li muc'tic cucharaetique, li jarroetique, xchi'uc li vasoetic ta sventa c'usi sts'anlajet chich' aq'uel ta jmotone. 30Te xavaq'uic ta ba mexa scotol c'ac'al li pan ac'bil ta jtojole”, xi li Muc'ul Diose.

Sc'oplal candelero pasbil ta c'anal taq'uin

(Ex. 37.17-24)

31“Paso noxtoc jun candelero ta bats'i c'anal taq'uin. Teno lec ta martillo. Pasbo snacleb, ste'el, scopailtac, snacleb xnich, xchi'uc li mero xnichtaque, jmoj snitoj sba xapas ta scotol. 32Pasbo vacxol sc'ob, ox-ox ta jujujot xocon. 33Ta jujun li vaquib sc'ob candeleroe tsc'an oy oxcoj xnich volajtic jech chac c'u cha'al xnich almendro, xchi'uc tsc'an oy snacleb xnich. 34Li mero ste'el cacal ta o'lole tsc'an chavac'be chancoj xnich volajtic jech chac c'u cha'al xnich almendro, xchi'uc pasbo lec snaclebtac li xniche. 35Ta scotol li vaquib sc'obc'obe tsc'an oy jujun svolvolil ti bu chc'obinan muyele. 36Li jujubej svolvolil jujujec sc'obe tsc'an jmoj no'ox snitoj sba o ta scotol xchi'uc li sc'obc'obe. Ta puru c'anal taq'uin xapas; teno lec ta martillo. 37Pasbo vucub scandilaltac, yu'un jech ac'o yac' batel xojobal ti c'alal chatsane. 38Li xtuch'ubiltac sc'aq'uemal xmechail xchi'uc li yavil stanile ta bats'i c'anal taq'uin xapas. 39C'alal chapas li candelero xchi'uc li c'usitic yan chtun yu'une, ja' ta oxlajuneb xcha'vinic (33) kilo c'anal taq'uin xapas o. 40Bejeluc jech xapas jech chac c'u cha'al laj cac'bot avil senyail te ta vitse.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index