Search form

Éxodo 26

La spasic ch'ulna pasbil ta nucul

(Ex. 36.8-38)

1“Paso jbej ch'ulna ta nucul, ta lajunlic lino poc' ti lec ts'otbile, xchi'uc ta yax'elan poc', ta ic'ic'tic sba stsajal, xchi'uc ta bats'i tsoj. Pasbo lec xluchal; loc'tao chib querubinetic. 2Scotol li poq'uetique co'ol smuc'tiquil xapas: ja' o'lol yoxlajunebal metro li snatile; ja' chib metro li sjamalile. 3Li vo'lique jmoj snitoj sba xats'is; ja' no'ox jech li yan vo'lique jmoj snitoj sba xats'is noxtoc. 4Li sba lical ti jmoj snitoj sba ta vo'lique, vomanbo jayibuc sat ta sti'; balo ta yax'elan no. Jech noxtoc li yan vo'lique xotananbo yav slasual li jlic ta slajeb ts'isbile. 5Li sba liquil poc' ti jmoj ts'isbile xchi'uc li xcha'liquile pasbo lajlajuneb yoxvinic (50) yav slasual ta jujujot noxtoc, yu'un jech lec snuboj sba chc'ot ta xcha'lical. 6Pasbo lajuneb yoxvinic (50) slucajtic taq'uinal ta c'anal taq'uin sventa chabaj o ta xcha'lical li poq'ue, jech jlic no'ox chc'ot o li spoc'al ch'ulnae.

7“Paso yan buluchlic jalbil tsotsil tentsun sventa smac sjol li ch'ulnae. 8Scotol li jalbil tsotsil tentsune co'ol smuc'tiquil xapas: ja' o'lol xchanlajunebal metro li snatile xchi'uc chib metro sjamalil. 9Li jvoq'ue jmoj ta vo'lic snitoj sba xats'is. Li yan jvoq'ue jmoj ta vaclic snitoj sba xats'is. Li svaclicale xapux. Ja' ti bu ta yeloval xa ch'ulna chc'ote. 10Pasbo lajuneb yoxvinic (50) ta vom sat ta sti' li jlic vo'lic ts'isbile. Jech noxtoc li yan ti jmoj ta vaclic ts'isbile, pasbo lajuneb yoxvinic (50) ta vom sat ta jot sti'. 11Pasbo lajuneb yoxvinic (50) slucajtic taq'uinal ta bronce taq'uin. Ja' te xaxojan o ti bu vomajtic sate, yu'un jech jlic no'ox chc'ot sventa chich' macbel o sjol li ch'ulnae. 12Ta sventa ti toj natic li spoc'al ch'ulnae, xu' te joc'ajtic chcom ta pat ch'ulna li c'u snatil sobraile. 13Jech li ch'ulnae lec macajtic chcom xcha'jotal xocon ta sventa li sobrail poq'ue: ja' cha'ch'ix xchi'uc chib c'ob chcom ta jujujot xocon.

14“Pasbo yan smac sjol li ch'ulnae, ja' ta snuculil chijetic bonbil ta tsoj xapas. Xchi'uc yan jlic lequil nuculetic ja' ta sba yac'ol chc'ot.

15“Pasbo noxtoc stenalte'al ta acacia te'; lec tuc' va'ajtic xavac'. 16Li jujupech tenalte'e ja' o'lol yo'bal metro snatil, ja' oxch'ix xchi'uc chib c'ob sjamalil. 17Li jujupech tenalte'e quechanbo jujujot sti' yu'un jech lec nubajtic chc'ot. Ja' jech xapas scotol li tenalte'etic sventa ch'ulnae. 18C'alal chapase, jtob (20) ta pech stenalte'al xavac'be li jot ta stuq'uil sure, 19Ac'bo cha'vinic (40) snacleb ta saquil taq'uin. Ja' chabchab snacleb xavac'be li jujupech tenalte' sventa chtun yu'un li xquechbenal ta jujujot sti'e.

20“Jech noxtoc li jot xocon ch'ulna ta stuq'uil nortee, ac'bo jtob (20) ta pech stenalte'al. 21Xchi'uc ac'bo cha'vinic (40) snacleb ta saquil taq'uin noxtoc, chib snacleb li jujupech tenalte'e. 22Ta jot xocon ch'ulna ta stuq'uil smaleb c'ac'ale, vacpech stenalte'al xavac'be. 23Xchi'uc ac'bo cha'pechuc tenalte' ta spat chiquinaetic. 24Li tenalte'etique tsc'an lec stsacoj sba xcha'pechal, xlic ta yoc xchi'uc ta sjol ti bu vomanbil sventa tstsac sbaic leque. Ja' jech xapas ta sventa li cha'jot chiquin nae. 25Ta scotole ja' vaxacpech tenalte' tsc'an xchi'uc vaclajuneb (16) snacleb ta saquil taq'uinetic, yu'un chabchab snacleb tsc'an li jujupeche.

26“Pasbo vo'ob sc'atubte'al ta acacia te' li stenalte'al jot xocon ch'ulnae. 27Pasbo yan vo'ob sc'atubte'al li yan jot xocone xchi'uc vo'ob sc'atubte'al li yan jot xocon ta stuq'uil smaleb c'ac'ale. 28Li sc'atubte'al ta o'lole ac'o jelovuc jutuc snatil xchi'uc li yantique. 29Xapix ta c'anal taq'uin li tenalte'etique, xchi'uc xapasbe slucajtic c'anal taq'uinal yu'un ja' te chaxoj jelovel li sc'atubte'al ti pixbil ta c'anal taq'uine. 30Ja'o xlic ava'an li ch'ulna jech chac c'u cha'al laj cac'bot avil senyail te ta vitse.

31“Paso jlicuc velo ta yax'elan poc', xchi'uc ta ic'ic'tic sba stsajal, ta bats'i tsoj, xchi'uc ta lino ti lec ts'otbile. Luchtao chib sloc'obal querubinetic. 32Pasbo chanib yoyal ta acacia te'; pixo lec ta c'anal taq'uin. Ac'bo jayibuc lucajtic taq'uin sventa chajoc'an o ta yoyal. Li yoyale pasbo snacleb ta saquil taq'uin. 33Ja' te xajoc'an ta lucajtic taq'uin li poq'ue. Ja' te xatic' ochel ta spat li xcaxail jmantale. Li poq'ue ja' sventa voc'ol chc'ot li ch'ul cuarto, xchi'uc li bats'i lequil ch'ul cuartoe. 34Ts'acal xavac'be smac li xcaxail jmantal ti te tiq'uil ta bats'i lequil ch'ul cuartoe. 35Ja' te ta jot spat poc' ta jot xocon ch'ulna ta stuq'uil norte xavac' li mexae. Te ta yolon ta stuq'uil sur ta yeloval mexa xavac' li candeleroe.

36“Li smac sti' ch'ulnae pasbo jlicuc poc' yax'elantic sba, xchi'uc ic'ic'tic sba stsajal, xchi'uc ta bats'i tsoj, xchi'uc ta lino ti lec ts'otbile. Lec c'upilic sba xluchal xapas. 37Li poq'ue pasbo vo'ob yoyal ta acacia te'. Pixo lec ta c'anal taq'uin, ac'bo lec snacleb ta bronce taq'uin, xchi'uc ac'bo jayibuc slucajtic taq'uinal pasbil ta c'anal taq'uin.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index