Search form

Éxodo 29

Li Aarón xchi'uc xnich'nabe voc'bil icomic sventa paleal

(Lv 8.1-36)

1“C'alal chavoc'bicun ta sventa paleal li Aarón xchi'uc xnich'nabe, tsc'an jech chapasbe chac li'i: Tsaco jcotuc ch'ium tot vacax, xchi'uc cha'cotuc tot chij ti bu ven lequique. 2Xchi'uc paso panetic xchi'uc yantic pan ti mu'yuc yich'oj svolesubil xch'ute ti vots'bil ta aceitee. Xchi'uc paso bic'tal jayal vajetic vijbil ta aceite. Paso ta lequil arina pasbil ta trigo. 3Ac'o ta jun biq'uit moch; ich'o batel ta ch'ulna xchi'uc li ch'ium vacaxe xchi'uc li cha'cot chije. 4Ja'o xavic' batel xchi'uc xnich'nab li Aarón te ta sti' ch'ulna pasbil ta nucule. Albo ti ac'o atinicuque. 5Ja'o xatsac li c'u'iletic sventa palee. Li Aarone ja' xavac'be slap li natil c'u'il ti mu'yuc sc'obe, xchi'uc li yan natil c'u'ile, xchi'uc li mocan c'u'ile, xchi'uc li vorxapoq'ue. Chucbo lec noxtoc li xchuquilal mocan c'u'ile. 6Ac'bo noxtoc li xpix sjole. Te ta xpix sjol xavac'be li ch'ul pech'pech' c'anal taq'uin sventa svinajeb ti voc'bil o ta paleal cu'une. 7Tsaco li aceite sventa ich'ub abtelale. Malbo ta sjol, jech voc'bil chcomic o. 8Ja' no'ox jech ec li xnich'nabtaque, ac'bo slapic li natil c'u'iletique. 9Chucanbo lec li xchuquilal sc'u'ic jech chac c'u cha'al chapasbe li Aarone, xchi'uc meltsanbo lec li xpix sjolique. Jech yich'oj yabtel chcomic o avu'un. Jech mantal chcom ti ja' yabtelic oe.

10“Ts'acal xavic' batel ta ch'ulna pasbil ta nucul li ch'ium vacaxe, yu'un ac'o yac' sc'obic ta sjol li Aarón xchi'uc xnich'nabe. 11Li ch'ium vacaxe te xamil ta jtojol ta yochebal ch'ulna pasbil ta nucul, vu'un li Muc'ul Diosune. 12Ts'ajo sbic'tal ac'ob ta xch'ich'al; bono ta xchanibal xulub li scajleb jmotone. Li scomelale malo te ta yoc li scajleb jmotone. 13Loq'uesbo scotol li xepual sbiquil, xepual secub, xchi'uc li xepual xchibal srinyone. Chic'o te ta scajleb jmoton. 14Yan li sbec'tale, li sbel xch'ute, xchi'uc li snuculile bat chiq'uic ta spat to ti bu apasoj acarpanaique yu'un ja' matanal ta sventa mulil.

15“Jech noxtoc tsaquic jcotuc li chije ac'o yac' sc'obic ta sjol li Aarón xchi'uc xnich'nabe. 16Ja'o xamil. Li xch'ich'ale vijo ta sba li scajleb jmotone xchi'uc ta spat xocon. 17Ts'acal xabic'tal bojilan li chije. Sapbo lec li sbiquile xchi'uc li yoc-sc'obe. Te jmoj xavac' xchi'uc ti bu bic'tal bojanbile xchi'uc ti bu oy sjole. 18Ts'acal te xavac' scotol ta scajleb jmoton yu'un ja' matanal sventa chavich'icun ta muc', xchi'uc ja' chic'bil matanal ta jventa ti lec mu yiq'ue.

19“Ts'acal xatsaquic noxtoc li yan jcot chije. Li Aarón xchi'uc xnich'nabe ac'o yac' sc'obic ta sjol. 20Milo li chije. Li xch'ich'ale bonbo ta slajeb xlechlechil sbats'ichiquinic li Aarón xchi'uc xnich'nabe, xchi'uc ta sme' sbats'ic'obic xchi'uc ta sme' sbats'i-acanic. Li scomelale bat vijo ta sba scajleb jmoton xchi'uc ta spat xocon. 21Li ch'ich' te ts'anajtic chcom ta sba scajleb jmotone xchi'uc li aceite sventa ich'ub abtelale vijbo ta sba yac'olic li Aarón xchi'uc xnich'nabe, xchi'uc ta sc'u' spoq'uic. Jech voc'bil chcomic o li Aarón xchi'uc xnich'nabe, xchi'uc li sc'u' spoq'uique.

22“Ts'acal xatsobbe li xepualtac sne, xepualtac sbiquil, xepualtac secub, xchi'uc li chib srinyon c'alal ta xepuale, xchi'uc li sbats'i-o'e. Yu'un ja' sventa chich' yabtelic o li paleetique. 23Tsaco junuc sepsep pan, xchi'uc jun pan vots'bil ta aceite, xchi'uc jun unin biq'uit jayal vaj ti te oy ta biq'uit moche. Ja' li panetic te oy ta jtojol ti mu'yuc yich'oj svolesubil xch'ute. 24Scotol le'e ac'bo ta sc'ob li Aarón xchi'uc xnich'nabe; ac'o sye'ilanic ta jtojol, vu'un li Muc'ul Diosune. 25Ts'acal xavich'be sutel. Bat chic'o ta scajleb jmoton ta sba li jmoton te chc'ac' ti lec mu yiq'ue. Ja' jun matanal chich' chiq'uel sventa chavich'icun ta muc', vu'un li Muc'ul Diosune.

26“Li sna yo'nton chij sventa chich' yabtelic o li Aarone tsaco, toyo muyel ta jtojol, vu'un li Muc'ul Diosune. Le'e ja' xa avu'un chc'ot o. 27Slecoj xavac' li sna yo'nton xchi'uc li jec yo' chich' aq'uel ta jtojol sventa chich' yabtelic o li Aarón xchi'uc xnich'nabe. 28Le'e ja' yu'unic chcom li Aarón xchi'uc xnich'nabe. Ja' jech jmantal chcom o ta atojolic, vo'oxuc li israeloxuque. Li matanal chaq'uic israeletique ja' li matanal ye'bil ta jtojole xchi'uc li milbil matanal ta sventa lec chquilic vu'un li Muc'ul Diosune.

29“Li ch'ul c'u'iletic yu'un Aarone ja' chlic stunesic ec li smomnich'nabtac c'alal chich' yabtelique, jech voc'bil chcomic o ta paleal. 30C'alal me ja' xa'ox ochem ta xq'uexol smomnich'on li Aarone, ac'o slap ochel li c'u'il c'alal ch-och spas yabtel ta ch'ulna pasbil ta nucule. Vucub c'ac'al te ac'o slap.

31“Ts'acal xatsac li sbec'tal chij sventa ich'ub abtelale. Te no'ox xapan ti bu oy li ch'ulna pasbil ta nucule. 32Li Aarón xchi'uc smomnich'nabe ja' ac'o sti'ic li sbec'tal chije xchi'uc li pan te ta biq'uit moche. Te ac'o sti'ic ta ti'ch'ulna pasbil ta nucul. 33Ti jech tsti'ique, yu'un ja' ac'bil ta sventa chch'aybat smulic ti c'alal chich'ic ts'u'iltasel c'alal chich' yabtelic ta sventa paleale. Pero mu boch'ouc no'ox xu' tsti' yu'un ja' ch'ul matanal. 34Pero me icom scomelal sventa yoc'omale xchi'uc li pan sventa ich'ub abtelale, chiq'uic ta c'oc'. Mu me boch'o sti' avu'unic, yu'un ja' ch'ul matanal.

35“Ja' jech xapasbe li Aarón xchi'uc xnich'nab jech chac c'u cha'al la jchanubtasote. Vucub c'ac'al tsc'an chalecubtas. 36Ta jujun c'ac'al xamilic jcot ch'ium vacax sventa chch'aybat smulic. Ts'u'iltaso li scajleb jmoton c'alal chachic' li matanal ta sventa mulile. Maltao ta aceite. 37Vucub c'ac'al te xachic' ta scajleb jmoton li matanal sventa mulile, jech ts'u'iltasbil chcom li scajleb jmoton, vu'un li Diosune. Jech bats'i ch'ul scajleb matanal chcom o. Scotol li c'usiuc no'ox chtal li' ta scajleb jmotone, ts'u'iltasbil chc'ot.

Sc'oplal matanaletic chaq'uic ta jujun c'ac'al

(Nm. 28.1-8)

38“Li jmoton tsc'an chavaq'uic ta jujun c'ac'ale ja' li'i: cha'cot ch'ium chij ti jun to jabil svoq'uele. 39Jcot xavaq'uic ta sob; jcot ta bat c'ac'al. 40Li sba cotal ch'ium chij chavaq'uique, ac'beic chibuc kilo lequil arina capbil ta jun litro yaceiteal oliva, xchi'uc maltao ta jun litro ya'lel ts'usub. 41Ja' jech co'ol xapas xchi'uc li jcot ch'ium chij sventa bat c'ac'ale. Ac'bo yarinail xchi'uc ya'lel sts'usubal. Ja' chic'bil matanal chc'ot ta jtojol ti lec mu yiq'ue. 42Le'e ja' li chic'bil matanaletic tsc'an chavaq'uilanic o ta jtojol achi'uc avalab anich'nabic te ta sti' li ch'ulna pasbil ta nucul yo' bu chajtaoxuc ta c'opanele. 43Ja' te ta jtaoxuc ta c'opanel, vo'oxuc li israeloxuque. Ti bu ta jc'opan jbatique, ts'u'iltasbil chcom o cu'un. 44Li ch'ulna pasbil ta nucul, xchi'uc li scajleb jmotone ts'u'iltasbil chcom o cu'un. Jech ec li Aarón xchi'uc xnich'nabe ja' ch'ul paleetic chcom o cu'un. 45Te chajchi'inoxuc, vo'oxuc li israeloxuque. Vu'un Diosun avu'unic o chic'ot. 46Jech chana'ic o ti vu'un no'ox jtuc Muc'ul Diosun avu'unic la jloq'uesoxuc tal ta Egipto banamil sventa chajchi'inoxuc ta naclej, vu'un li Muc'ul Diosun avu'unique.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index