Search form

Éxodo 35

Mantaletic ta sventa sc'ac'alil chcux yo'ntonic

(Ex. 31.12-17)

1Li Moisese la stsob scotol li jaychop israeletique, jech laj yalbe: “Li Muc'ul Diose ja' jech mantal laj yal ti tsc'an ta jpastique: 2‘Vaquib no'ox c'ac'al xu' cha'abtejic. Yan ta svucubal c'ac'ale ja' ts'u'iltasbil cu'un, voc'bil o sventa chacux avo'ntonic yu'un chavich'icun ta muc', vu'un li Muc'ul Diosune. Me oy boch'o junucal ch-abtej avu'unic li jun c'ac'al le'e, ac'o yich' milel. 3Ta buyuc no'ox nacaloxuc, mu xu' chatsan ac'oq'uic ta sc'ac'alil chacux avo'ntonic’, xi li Muc'ul Diose”, xut xchi'iltac li Moisese.

Laj yaq'uic smoton Dios sventa tspasic ch'ulna pasbil ta nucul

(Ex. 25.1-9)

4Li Moisese jech laj yalbe yan velta scotol li xchi'iltac ta israelale: “Li'i ja' li c'usi yaloj Muc'ul Dios tsc'an ta jpastique: 5Tsc'an chavac'beic smoton li Muc'ul Diose. Scotol li boch'otic chc'ot ta yo'nton, ti yutsil yo'nton chaq'uique, ac'o yich' tal c'anal taq'uin, saquil taq'uin, bronce taq'uin, 6yax'elan poc', ic'ic'tic sba stsajal, bats'i tsoj, poc' pasbil ta lequil lino no, xchi'uc jalbil tsotsil tentsun. 7Xchi'uc ac'o yich' tal nuculil chij bonbil ta tsoj, lequil nuculetic, acacia te', 8aceite sventa candiletic, sperfumeal aceite sventa boch'o chich' yabtel, xchi'uc ta sventa pom ti c'u cha'al lec mu yiq'ue. 9Xchi'uc ac'o yich' tal ónice ton xchi'uc yantic lequil tonetic sventa chich' nabanel ta mocan c'u'il xchi'uc ta vorxapoc' sventa tslap li banquilal palee.

Sc'oplal c'usitic chtun te ta ch'ulna pasbil ta nucul

(Ex. 39.32-43)

10“Scotol li boch'otic oy lec sbijilic ta spasel li c'usitic lec c'upilic sbae ja' ac'o tal spasic scotol li c'usitic laj yal Muc'ul Dios tsc'an pasele. 11Ja' li ch'ulnae, xchi'uc li nuculetique, xchi'uc li poq'uetique, li lucajtic taq'uine, li tenalte'etique, li sc'atubte'altaque, li yoyaltaque, li snaclebtaque, 12li caxa xchi'uc xq'uechubiltaque, li smaque, li poc' sventa chich' maquel o caxae, 13li mexa xchi'uc xq'uechubiltaque, xchi'uc li c'usitic chtun yu'une, xchi'uc li pan te oy o ta stojol Diose. 14Xchi'uc ja' tspasic noxtoc li candelero sventa candiletique xchi'uc li c'usitic chtun yu'une, li scandilaltaque, li yaceiteale, 15li scajleb xchic'ubil pom xchi'uc xq'uechubiltaque, li aceite sventa ich'ub abtelale, li pome, xchi'uc li poc' sventa smac sti' ch'ulnae, 16xchi'uc li scajleb smoton Diose, xchi'uc li xchajchajtaq'uinal pasbil ta broncee xchi'uc li xq'uechubiltaque xchi'uc scotol li c'usitic chtun yu'une, xchi'uc li perole xchi'uc li snaclebe. 17Xchi'uc ja' tspasic noxtoc li poq'uetic sventa smac scoralil yamaq'uil ch'ulnae, xchi'uc li yoyaltaque, li snaclebtaque, li poc' smac sti' yamaq'uil ch'ulnae, 18xchi'uc li bic'tal te'etic sventa chich' nituanel o li ch'ulnae, xchi'uc li scoralile, xchi'uc li yaq'uiltaque. 19Xchi'uc ja' tspasic noxtoc li jalbil c'u'il sventa tslap c'alal tspas yabtel te ta ch'ulna li palee, xchi'uc li yan ch'ul c'u'il sventa pale Aarone, xchi'uc li c'u'iletic sventa paleal ta sventa xnich'nabe”, xi li Moisese.

Li israeletique laj yich'ic tal c'usitic oy yu'unic sventa smoton Dios

20Scotol li israeletique iloq'uic batel ta stojol li Moisese. 21Li boch'otic lec ic'ot ta yo'ntonique, ti tsots sc'oplal laj ya'yique, ta scotol yo'ntonic tal yac'beic smotonin Muc'ul Dios li c'usitic oy yu'unique. Yu'un ja' sventa chich' pasel o li ch'ulna pasbil ta nucule, xchi'uc scotol li c'usitic chtun tee, xchi'uc li ch'ul c'u'iletic sventa yabtel Diose. 22Italic c'alal ta vinic ta antsetic. Ta scotol yo'ntonic laj yich'ic tal cadenaetic, staq'uinal xchiquinic, net' joliletic, yixtolal sc'obic, yixtolal ste'el sc'obic, xchi'uc scotol li c'usitic lec c'upilic sba pasbilic ta c'anal taq'uine. Scotolic laj yich'ic tal ta stojol Muc'ul Dios li c'anal taq'uinetic ti oy yu'unique. 23Scotol li boch'otic oy yu'unic yax'elan poq'uetic, ic'ic'tic sba stsajal, bats'i tsoj, lequil lino no, jalbil tsotsil tentsun, nuculil chij bonbil ta tsoj, xchi'uc lequil nuculetique laj yich'ic tal scotol. 24Scotol li boch'otic ic'ot ta yo'ntonic chaq'uic saquil taq'uin xchi'uc bronce taq'uine laj yich'ic tal ta stojol Muc'ul Dios scotol. Li boch'o oy acacia te' yu'unique laj yich'ic tal ta sventa ac'o yich' pasel li c'usitic chtune. 25Jech noxtoc li antsetic ti lec bijique lic jalubajicuc, laj yich'ic tal ta smoton Dios li sjolobique, ja' li yax'elan poq'ue, ti ic'ic'tic sba stsajale, ti bats'i tsoje xchi'uc li poc' pasbil ta lequil lino noe. 26Li antsetic ti scotol yo'nton tsc'an tspasic li abtele, ti lec sna' xnaojique, lic sjalic tsotsil tentsunetic. 27Li banquilaletique laj yich'ic tal ónice ton xchi'uc yantic lequil tonetic sventa chich' nabanel ta mocan c'u'il xchi'uc ta vorxapoc' sventa tslap li banquilal palee. 28Xchi'uc laj yich'ic tal perfumeetic, aceite sventa candiletic, xchi'uc aceite sventa ich'ub abtelal, xchi'uc aceite sventa lec mu yic' li pome.

29Scotol li israel viniquetic xchi'uc li antsetic ti tsots sc'oplal laj ya'yic chaq'uic ta yutsil yo'ntonic li c'usitic chtun sventa li abtel jech chac c'u cha'al i'albat yu'un Muc'ul Dios li Moisese laj yich'ic tal ta stojol Dios scotol li c'usitic iloc' ta yo'ntonic chaq'uic tunuc yu'un Muc'ul Diose.

It'ujat yu'un Dios li Bezaleel xchi'uc Aholiabe

(Ex. 31.1-11)

30Li Moisese jech laj yalbe li israeletique: “A'yo ava'yic, li Muc'ul Diose t'ujbil xa yu'un li Bezaleel liquem ta jchop yu'un Judae, ja' li xnich'on Uri, smomnich'on Hure. 31Ac'bil xa lec sbijil yu'un li Diose; lec sna' snopel c'usi tspas. Oy sbijil ta sventa scotol abtel. 32Lec sna' sbisel, lec sna' yich'el ta poroval c'usi tspas, xchi'uc lec sna' x'abtej ta c'anal taq'uin, ta saquil taq'uin xchi'uc ta bronce taq'uin. 33Xchi'uc lec sna' xch'ulel, lec sna' snabanel li lequil tonetique, xchi'uc lec sna' xch'ulel tenalte'etic, xchi'uc lec xu' yu'un c'usiuc no'ox abtelal. C'usiuc no'ox tsbis lec sna' yich'el ta poroval. 34Xchi'uc ac'bil ep sbijil sventa chchanubtasvan. Li Bezaleel xchi'uc Aholiab, xnich'on Ahisamac liquem ta jchop yu'un Dane, 35ac'bil xa lec sbijilic ta sventa c'usiuc no'ox tsc'an pasel, me xch'ulel, o me sbisel li c'usi pasel tsc'ane, me spasbel xnichimal yax'elan poc', me ic'ic'tic sba stsajal, o me bats'i tsajal poc', o me poc' pasbil ta lequil lino no. Xchi'uc lec sna'ic sjalel c'usiuc tsc'an pasel ti c'upilic sbae.

Bible in Tzotzil de Chenalhó with Deuterocanon

Biblia en Tzotzil de Chenalhó

Texto © Sociedades Bíblicas Unidas, A. C. 1997

SOCIEDAD BÍBLICA DE MÉXICO, A. C.

More Info | Version Index